Deuteronomi

9 E AKARONGO mai ana, e Iseraela e: Akonei koe e aere ei ki tetai pae Ioridana, kia aere ki roto, e kia rauka ia koe te au iti-tangata mamaata, e te ririnui to ratou i toou ra; e au oire mamaata, e te patuia ki runga roa i te rangi ra,

2 E aronga mamaata e te roroa, e tamariki na te ngati Anaka ra, ko taau i kite ra, e taau i akarongo i te tua ra e, Koai te mou ki mua i te aroaro o te tamariki a Anaka!

3 E teianei kia kite mai oki koe e, ko to Atua ra ko Iehova, te aere na mua ia koe akonei, mei te ai kakai ra, nana ratou e rave akapou, e kia vi ratou ki mua i to aroaro na: e eke rava ratou ia koe kare e mamia, e naau e akapou takiri rava ia ratou, mei ta Iehova i tuatua mai kia koe na.

4 Kia eke ratou ki mua ia koe i to Atua ra ia Iehova, auraka koe e tuatua ua i roto to ngakau na, ka na ko ei e, No taku nei tuatua-tika i arataki mai ei a Iehova iaku kia rauka iaku teianei enua: no te tuatua kino oki o teianei au iti-tangata i tuaru ke ei a Iehova ia ratou ki mua ia koe na.

5 Kare no taau ra tuatua-tika, e no te tiratiratu anga o toou ra ngakau, e tae ei koe ki runga i to ratou ra enua e noo: no te tuatua kino ra o teianei au motia e tuaru ke ei to Atua ra ko Iehova ia ratou ki mua i to aroaro, e kia akatupu oki aia i te tuatua i ta Iehova i taputou atu ki toou ai metua ra, kia Aberahama, kia Isaaka, e kia Iakoba.

6 E tenana, kia kite mai koe na e, kare no taau ra tuatua-tika e orongaʼi nei to Atua ra ko Iehova i teianei enua meitaki ei nooanga noou ra; e iti-tangata kaki ketaketa oki koe na.

7 Ka akamaara ana, auraka oki kia ngaropoina ia koe, e i akakoko ana koe i to Atua ra ia Iehova i riri ei i te medebara ra: mei te rā mairai i aere ei kotou mei te enua maira mei Aiphiti, e tae rava mai nei kotou i ko nei, e aronga meameaau kotou ia Iehova.

8 E i Horeba katoa oki kua akakoko rai kotou ia Iehova kia riri, mei mate oki kotou i reira i te maata o to Iehova riri ia kotou na.

9 Iaku oki i aere ki runga i te maunga e tiki i nga papa toka ra, i nga papa koreromotu ta Iehova i papau atu ia kotou ra, noo iora au ki runga i te maunga e a akera ngauru anga o te ao, e a oki ngauru o te po, kare rai au i kaikai, kare oki i inu i te vai:

10 Kua tuku mairā Iehova i nga papa toka e rua kiaku i reira, i tataia e te rima o te Atua ra; ko te au tuatua ta Iehova i tuatua mai kia kotou i runga i te maunga, i rotopu i te ai, i te rā uruoaanga ra, tei tataia ki rungao ra.

11 E ope akera nga ao e a ngauru e nga po e a ngauru ra, kia oronga mai a Iehova i nga papa toka e rua kiaku ra, i nga papa koreromotu ra,

12 Kua tuatua mairā Iehova kiaku, Ka tu, ka aere viviki ki raro; kua kino to au tangata taau i arataki mai mei Aiphiti maira; kua tatipake vave io nei ratou i te arataa taku i akaue ia ratou e, e na reira; kua anga ratou i te tiki akato no ratou.

13 E kua tuatua mairai a Iehova kiaku, na ko maira, I akara ua ana au i teianei aronga, e i na, e au tangata kaki ketaketa rai:

14 E vaio ua ana koe iaku, kia tairipoti takiri au ia ratou, e kia taparapara au i to ratou ingoa i raro ake i te rangi nei: e ka akariro au ia koe ei iti-tangata maata rava e te maroiroi maata i to ratou ra.

15 Kua anga maira au, eke maira au ki raro mei runga mai i taua maunga ra, te ka ua ra te maunga i te ai: e tei oku rima ra nga papa koreromotu e rua ra.

16 Kua akara maira au, e i na, kua ara kotou i to kotou Atua ra ia Iehova, kua anga kotou i te punua puakatoro akato no kotou; kua akaruke vave iora kotou i te arataa ta Iehova i akaue mai ia kotou, e, e na reira:

17 Kua rave iora au, kua titiri iora i nga papa i oku rima ra ki raro, ngaangaa rava akera ki mua i to kotou mata.

18 Kua tipapa iora au ki raro ki mua ia Iehova, mei tei muatangana ra, e a akera ngauru anga o te ao e a oki ngauru anga o te po; kare au i kaikai, kare oki i inu i te vai, i ta kotou au ara katoa i raveia e kotou ra, i te rave anga i te mea kino ki mua i te aroaro o Iehova, ei akakoko anga atu iaia kia riri.

19 Mataku akera oki au i te riri e te otooto anga o te riri o Iehova, tana i riri ia kotou, e e rave tamate rava ia kotou. Kua akarongo mairā Iehova iaku i reira katoa.

20 Mei mate oki a Aarona ia Iehova i te maata oki o tona riri iaia; kua pure katoa ra au ia Aarona i reira.

21 Kua rave iora au i te punua puakatoro i ara ai kotou ra, ta kotou i anga ra, kua taʼu iora ki te ai, reru iora e ungaungātiti rava akera, mei te one-pueu ra te tu; e kua titiri atura au i to reira ungaunga ki raro i te vai no runga mai i te maunga ra.

22 Kua akakoko oki kotou ia Iehova e riri atura i Tabera, e i Masa, e i Kiberota-hataava ra.

23 Ka tono ei oki a Iehova ia kotou i Kadesa-barenea, ka tuatua mai ei ra e,

24 Ka aere, ka rave i te enua taku e oronga atu nei no kotou; kua akatokā kotou i te akaue a to kotou Atua ra a Iehova i reira, kare i akarongo iaia, kare i akono i tona reo. Kua meameaau kotou ia Iehova mei te rā mairai i kite ei au ia kotou na.

25 Kua tipapa oki au ki raro ki mua i te aroaro o Iehova e e a akera ngauru anga o te ao, e a oki ngauru o te po, mei taku i tipapa ki raro i muatangana ra; no te mea e, kua tuatuā Iehova e akapou takiri aia ia kotou.

26 Kua pure iora au kia Iehova, e karanga atura, E te Atu e, e Iehova e, auraka koe e akapou i toou ra au tangata, i taau ra tuanga, i akaoraia e koe i toou ra mana; i tei aratakiia mai e koe i te rima marōrō mei Aiphiti maira.

27 E akamaara ana i to au tavini ra ia Aberahama, ia Isaaka, e ia Iakoba; auraka koe e akara i te māro o teianei aronga, e to ratou kino, e ta ratou ara:

28 Ko te tuatua aea to te enua taau i arataki mai ia matou mei reira maira e, No te mea kare akera ratou i maranga ia Iehova kia apai aia ia ratou ki te enua tana i akakite mai no ratou ra, e no te mea kua makitakita aia ia ratou ra, kua arataki aia ia ratou ki te medebara e ta.

29 E tangata anake rai ratou noou, e e tuanga oki naau, i taau oki i arataki mai i to mana maata ra, e to rima i akatikaia ra.