Iosua

1 EI muringao i te matenga o te tavini o Iehova ra ko Mose, kua tuatua mairā Iehova kia Iosua te tamaiti a Nuna ra, i te tauturu ia Mose ra, na ko maira,

2 Kua mate akenei toku tavini ko Mose; e teianei ka tu ki runga, ka aere ki tetai pae Ioridana nei, ko koe, e teianei au tangata ravarai, ki te enua taku e oronga atu no ratou, no te tamariki a Iseraela ra.

3 E te au ngai katoa e takaiia e to kotou tapuae ra, ko taku ïa e oronga atu no kotou, ko taku i karanga atu kia Mose ra.

4 Mei te medebara mai e Lebanona nei, e tae ua atu ki te kauvai maata ra, ko te kauvai ra ko Eupharati, ko te enua katoa o te ngati Heta ra, ka aere roa atu ei ki te tai maata ra, ki te pae i te opunga o te rā ra, ko ta kotou ïa kotinga.

5 Kare rava e tangata e mou ki mua i to aroaro i toou au rā katoa i te ora anga na; mei iaku i vaitata katoao ia Mose ra, ei vaitatao oki au ia koe: kare rava oki au e akaruke atu ia koe, kare oki e taka ke ia koe.

6 Kia matutu koe, e kia maroiroi; naau oki e tua atu i te enua ei nooanga no teianei aronga, ko taku i taputou atu ki to ratou ai metua ra e, e oronga au no ratou.

7 Kia matutu ra koe, e kia maata rava te maroiroi, kia akono koe e kia rave i te ture katoa ta taku tavini ta Mose i akaue ia koe ra; auraka koe e anga ke i te reira ki te rima katau e te rima kaui, kia manuia oki koe i toou au aerenga katoa.

8 Auraka teianei buka ture kia taka ke atu i roto i to vaa; kia akamaara tikai ra koe i te reira i te po e te ao, kia akono koe e kia rave i tei tata katoaia i roto ra: ei reira e meitaki ei toou aerenga, e ei reira koe e manuia aroaʼi.

9 Kare aina au te akaue atu na ia koe? Kia matutu, e kia maroiroi roa, auraka e mataku, auraka oki e ngarangara, tei vaitata katoao oki to Atua ko Iehova ia koe i to au aerenga katoa ra.

10 Kua akaue aturā Iosua i te aronga rangatira o te au tangata ra i reira, na ko atura,

11 Ka takai ana i te nuku, e akaue atu i te tangata, e karanga atu, E akateateamamao i te kai, e toru rā toe ka tae ei kotou ki tetai pae Ioridana nei, e aere kotou ki runga i te enua ta to kotou Atua ra, ta Iehova, e oronga mai no kotou na kia rauka.

12 Kua karanga aturā Iosua ki te ngati Reubena, e te ngati Gada, e te kopu veenga o Manase ra, na ko atura,

13 E akamaara i te tuatua ta te tavini o Iehova ta Mose i akaue mai kia kotou na, ko tei tuatua maira e, Kua oronga mai to kotou Atua ko Iehova i te akaangaroianga, e kua oronga i teianei enua no kotou.

14 Ka noo rai ta kotou au vaine, ta kotou au tamariki, e ta kotou au puaka, i teia pae Ioridana, i te enua ta Mose i oronga mai no kotou nei; ka aere ra kotou ko te aronga toa ririnui mataku kore katoa ra, mei te tangata tamaki, na mua i to kotou ai taeake, ei tauturu ia ratou:

15 E kia oronga mai a Iehova i te akaangaroianga no to kotou ai taeake mei tana i oronga mai no kotou na, e kia rauka ia ratou te enua ta to kotou Atua ta Iehova e oronga mai no ratou: ei reira kotou ka oki mai ei ki ta kotou ra tuanga enua ka kai ei, i ta te tavini o Iehova ta Mose i oronga mai no kotou, i teia pae Ioridana i te itinga o te rā nei.

16 Kua tuatua maira ratou kia Iosua, na ko maira, Ko taau katoa i akaue mai ia matou ra, ko ta matou ïa e akono, e te au ngai ravarai taau e tono ia matou ra, ka aere ïa matou i reira.

17 Ka akarongo katoa matou kia koe, mei ia matou i akarongo i te au tuatua ravarai a Mose ra; ei vaitata katoao ra to Atua ko Iehova ia koe, mei iaia i vaitata katoao ia Mose ra.

18 Ko te akatokā atu i taau tuatua, e kare e akarongo kia koe i te au tuatua katoa taau i akaue mai kia matou ra, ka taia ïa: kia matutu ra koe, e kia maroiroi.