Isaia

56 TE NA ko mairā Iehova, E akono i te tuatua-tau, e rave i te tuatua-tika: kua vaitata mai oki te ora naku i te tae mai, e te tuatua-tika naku i te akakiteia mai.

2 E ao to te tangata e rave i teia, e te tamaiti a te tangata kia tāpu tikai i te reira; ko tei akono i te sabati, e kare te reira i viivii iaia ra, tei tāpu i tona rima auraka takiri e rave i te kino.

3 E auraka te tamaiti a te tangata ke ra, ko tei piri kia Iehova ra, e tuatua, i te na ko anga e, Kua akataka ke ravaia au e Iehova i tona ra iti-tangata: auraka katoa te eunuka e karanga e, I na, e rakau marō au.

4 Te na ko maira oki a Iehova ki te au eunuka, ko tei akono i toku ra au sabati, e ko tei rave i tei tauia e au ra, e kua tāpu piri i te koreromotu naku ra:

5 Ko taku ïa e oronga ki roto i toku nei are, e ki roto i taku nei au patu, i te tuanga e te ingoa, ko tei meitaki ïa i te au tamaroa e te au tamaine: e ingoa mutu kore taku e o atu no ratou, kare rava e tipu keia.

6 E te au tamariki o te tangata ke, ko tei piri kia Iehova ra, ei akamori iaia, e kia inangaro oki i te ingoa o Iehova, kia riro ei au tavini nona; te aronga katoa e akono i te sabati, kare te reira i viivii ia ratou, e ko tei tāpu piri i taku koreromotu;

7 Ko ratou rai oki taku e arataki ki toku maunga tapu ra, e akarekareka au ia ratou i roto i toku are pure anga: e marekaia mai ta ratou au atinga karakaratio, e ta ratou atinga, ki runga i taku atarau; e tapaia oki toku are, I te are pure anga no te tangata ravarai.

8 Te tuatua maira te Atu ra ko Iehova, ko tei akaputuputu mai i te ngati Iseraela i akarukeia ra, E akaputu mairai au i tetai papaki ke rai kiaia ra auraka tei oti i te akaputuia kiaia ra.

9 E kotou, e te au taae ravarai o te kainga ra, e aere mai ka kai; kotou e te au puaka taae katoa o te vaorakau ra.

10 E aronga tiaki matapo tona: e aronga kamakura anake, e puaka-aoa muteki ua anake, kare e aoa; e moe ua, e te akāvai ki raro, e te inangaro moe anake.

11 Koia ïa, e kaki nui to teianei au puaka-aoa; kare rai i kite i te pangia anga o te kaki; e aronga tiaki kare i kite i te apii atu; kua anga anake ratou ki to ratou uaorai arataa; te tangata ki tana ra apinga, mei tona uaorai ngai.

12 E aere mai e tupo wina ta tatou; tatou e akakona ia tatou uaorai ki te kava kona; e mei teianei rā, mei te reira katoa apopo i te maata, e kia maata ua atu rai.