2 Ariki

15 TEI te mataiti tai takau ma itu o te ariki o Iseraela o Ieroboama, i ariki ei a Azaria te tamaiti a Amazia ariki no Iuda ra.

2 Tei te mataiti okotai ngauru ma ono ra, i ariki ei aia, ka rima akera ngauru ma rua ona mataiti i te ariki anga i Ierusalema. Ko Iekolia te ingoa o tona metua vaine no Ierusalema.

3 Kua rave aia i te mea tika ki mua i te aroaro o Iehova, mei ta tona metua, mei ta Amazia i rave ra.

4 Kare ra te au ngai teitei i akarukeia; te apai ua ra te tangata i te atinga, e te tutungi ua ra i te atinga kakara, ki runga i te au ngai teitei ra.

5 Taia iora taua ariki ra e Iehova, riro atura aia ei lepera e tae ua atura ki te rā i mate ei aia ra, e kua noo i tetai are ke. E te tamaiti a te ariki ko Iotama, tei runga ïa i taua ngutuare ra i te akava anga i te tangata o taua enua ra.

6 E te toenga o te tuatua ia Azaria, e tana katoa i rave ra, kare ainei kua tataia ki roto i te buka, te tuatua no te au rā o te au ariki o Iuda?

7 Moe iorā Azaria ki o tona ra ai metua; tanumia atura aia ki o tona ra ai metua i roto i te oire o Davida; tupauia akera aia i te au e tana tamaiti ra e Iotama.

8 Tei te toru ngauru ma varu to te ariki o Iuda, to Azaria, mataiti, i ariki ei a Zekaria, te tamaiti a Ieroboama, i runga ia Iseraela, i Samaria, ka ono akera marama.

9 Kua rave aia i te kino i mua i te aroaro o Iehova, mei ta te ai metua katoa nona ra; kare aia i akaruke i te au ara a Ieroboama, te tamaiti a Nebata ra, i ara ai Iseraela ra.

10 Kua kotikoti kupengā Saluma te tamaiti a Iabesa iaia, e kua ta iora iaia ki mua i te aroaro o te tangata, e mate atura aia, riro akera te au iaia uaorai.

11 E te toenga o te tuatua ia Zekaria, i na, kua tataia ïa ki roto i te buka, te tuatua no te au rā o te au ariki o Iseraela.

12 Ko te tuatua teia ta Iehova i tuatua mai kia Iehu, ka na ko mai ei ra, Ka noo to au tamariki ki runga i te terono o Iseraela e kia tae ua atu ki te a o te uki ra. Tupu atura oki te reira.

13 Tei te mataiti e toru ngauru ma iva to te ariki o Iuda to Uzia, (koia oki a Azaria,) i ariki ei a Saluma te tamaiti a Iabesa; okotai ona marama katoa i te ariki anga i Samaria.

14 Kua aere oki a Menahema te tamaiti a Gadi ki runga mei Tireza atu, e tae atura ki Samaria, kua ta iora ia Saluma, te tamaiti a Iabesa, i Samaria, e mate atura, riro akera oki te au iaia uaorai.

15 E te toenga o te tuatua ia Saluma, e te kotikoti kupenga i raveia e ia ra, i na, kua tataia ïa ki roto i te buka, te tuatua no te au rā o te au ariki o Iseraela.

16 Kua ta iorā Menahema ia Tiphesa, e to roto katoa ra, e to reira au tapere mei Tireza mai: no te mea kare ratou i kiriti mai i te au ngutupa kiaia, no reira aia i ta ai; kua rave aia i te au vaine nui katoa i reira ra, kua eere.

17 Tei te toru ngauru ma iva to te ariki o Iuda to Azaria mataiti, i ariki ei a Menahema te tamaiti a Gadi ki runga ia Iseraela, okotai ngauru ona mataiti i te ariki anga i Samaria ra.

18 Kua rave aia i te kino ki mua i te aroaro o Iehova: kare aia i akaruke i te ara a Ieroboama, te tamaiti a Nebata, i ara ai Iseraela ra, e ope rava ake tona au rā ra.

19 Kua aere maira te ariki o Asura ko Pula e tamaki i taua enua ra: kua apai aturā Menahema i te au taleni ario okotai tausani na Pula, kia tauturu mai aia iaia, e kia akatinamouia te au i tona rima.

20 Kua umuumu aturā Menahema i taua moni ra i runga ia Iseraela, i te aronga taoiau katoa ra, e rima ngauru i te sekela ario i te tangata okotai, e apai ki te ariki o Asura. Oki atura taua ariki no Asura ra, kare akera i noo mai i taua enua ra.

21 E te toenga o te tuatua ia Menahema, e tana katoa i rave ra, kare ainei kua tataia ki roto i te buka, te tuatua no te au rā o te au ariki o Iseraela?

22 Moe iorā Menahema ki o tona ra ai metua; tupauia akera aia i te au e tana ra tamaiti e Pekahia.

23 Tae akera ki te rima o te ngauru o te mataiti o te ariki o Iuda ra o Azaria ra, i ariki ei a Pekahia te tamaiti a Menahema i runga ia Iseraela i Samaria, e rua akera ona mataiti i te ariki ang

24 Kua rave aia i te kino i mua i te aroaro o Iehova; kare aia i akaruke i te ara a Ieroboama, te tamaiti a Nebata ra, i ara ai Iseraela ra.

25 Ko Peka ra te tamaiti a Remalia, tetai rangatira nona ra, kua kotikoti kupenga akera iaia ra, koia e ko Aragoba,e ko Arie, e te au tangata o Gileada, e rima ngauru ra, kua ta iora iaia i Samaria i roto i te punanga o te are o te ariki: mate rava akera aia, riro akera te au iaia uaorai.

26 E te toenga o te tuatua ia Pekahia, e tana katoa i rave ra, i na, kua tataia ïa ki roto i te buka, te tuatua no te au rā o te au ariki o Iseraela ra.

27 Tae akera ki te rima ngauru ma rua o te mataiti o te ariki o Iuda ra o Azaria, i ariki ei a Peka te tamaiti a Remalia i runga ia Iseraela i Samaria, okotai takau akera ona mataiti i te ariki anga.

28 Kua rave aia i te kino i mua i te aroaro o Iehova; kare aia i akaruke i te au ara a Ieroboama, te tamaiti a Nebata ra, i ara ai Iseraela ra.

29 Tei te tuatau o te ariki o Iseraela o Peka, i tae mai ei te ariki o Asura, ko Tigelata-pilesera, e kua rauka iaia ko liona, e ko Abelabete-maaka, e ko Ianoa, e ko Kedesa, e ko Hazora, e ko Gileada, e ko Galilea, te enua katoa o Naphatali, e kua apai ia ratou ei tuikaa ki Asura ra.

30 Kua kotikoti kupenga akerā Hosea te tamaiti a Ela ia Peka te tamaiti a Remalia, e kua ta atura iaia, e mate rava akera aia, riro akera te au iaia uaorai, i te mataiti tai takau o Iotama te tamaiti a Uzia ra.

31 E te toenga o te tuatua ia Peka, e tana katoa i rave ra, i na, kua tataia ïa ki roto i te buka, te tuatua no te au rā o te au ariki o Iseraela ra.

32 Tei te rua o te mataiti o te ariki o Iseraela o Peka te tamaiti a Remalia, i ariki ei a Iotama te tamaiti a Uzia ariki no Iuda.

33 Tei te mataiti okotai takau ma rima i ariki ei aia; okotai ngauru ma ono ona mataiti i te ariki anga i Ierusalema. Ko Ierusa te ingoa o tona metua vaine, e tamaine na Zadoka.

34 Kua rave aia i i te mea tika i mua i te aroaro o Iehova: kua akono atura aia i ta tona metua i ta Uzia i rave ra.

35 Kare ra i akarukeia te au ngai teitei: te apai ua ra te tangata i te atinga, e te tutungi ra i te atinga kakara, ki runga i taua au ngai teitei ra. Nana oki i patu i te ngutupa teitei o te are o Iehova.

36 E te toenga o te tuatua ia Iotama, e tana katoa i rave ra, kare ainei kua tataia ki roto i te buka, te tuatua no te au rā o te au ariki o Iuda ra?

37 Tei taua tuatau ra ta Iehova akamata anga i te tono i te ariki o Arama ra ia Rezina, e ia Peka te tamaiti a Remalia, ei rave ia Iuda.

38 Moe iorā Iotama ki o tona ra ai metua, e tanumia iora ki o tona ra ai metua, i roto i te oire o tona ra tupuna o Davida: tupauia akera aia i te au e te tamaiti nana ra e Ahaza.