Salamo

89 KA imene au i te aroa o Iehova e tuatau ua atu: na toku vaa e akakite i te tuatua-mou naau, i tera uki i tera uki.

2 Kua tuatua oki au e, Ka tika te aroa i te vai marie anga: tei te au rangi tikai ra taau ra tuatua-mou i te akatinamou angaia:

3 Kua papauia e au te koreromotu i tei ikiia e au ra, kua taputou au i toku tavini ra ia Davida,

4 E akatinamou rai au i toou ra uanga e tuatau ua atu, e e patu au i toou ra terono i tera uki i tera uki. Sela.

5 E na te au rangi e akameitaki i taau ra ravenga taka ke, e Iehova; taau ra tuatua-mou i roto i te uipa anga o te aronga tapu.

6 Koai oki to te au rangi ra, e aite kia Iehova? koai tei arite kia Iehova, I rotopu i te au tamariki a tei mana ra?

7 E Atua mataku roaia i te uipa anga o te aronga tapu ra, e kia akataeauia e te aronga i akapini iaia ra.

8 E te Atua Sabaota, e Iehova, koai tei aite ia koe? e mana toou, e Iehova, e te akipiniia ra koe e taau ra tuatua-mou.

9 Tei ia koe te au i te tikitiki anga o te moana; kia tupu tona kare, naau e akamarino.

10 Kua atiati koe ia Rahaba, mei tei taia ïa ra; na to rima marōrō i akapueurikiriki ke i to au enemi.

11 Naau te au rangi nei, naau katoa te enua; te ao e tona ki katoa ra, naau i anga.

12 Ko apatokerau, e ko apatonga, naau i anga: ko Tabora, e ko Heremona, tei imene nui i toou ra ingoa.

13 E rima marōrō toou, e ririnui tei to rima: e teitei to rima katau.

14 Ko te tuatua-tika ra, e te tuatua-tau, ko te tumu ïa o toou ra terono: ko te aroa ra, e te tuatua-mou, te ka na mua ïa i to mata.

15 E ao to te au tangata i kite i te reo rekareka ra: e aaere rai ratou, e Iehova, i te mārama o to mata ra:

16 E rekareka ratou i to ingoa e po ua atu te rā, e ka teitei ratou i te tuatua-tika naau ra.

17 Ko koe oki te kakā o to ratou maroiroi; e na te akaperepere aau ra e teitei ei to matou tara.

18 Ko Iehova oki to matou paruru; e Tei Tapu i Iseraela nei, ko to matou ïa ariki.

19 I reira taau tuatua orama anga mai i to Mea Tapu ra, e kua tuatua maira, Kua tuku au i te tauturu ki runga i tei mana ra; kua akateitei au i tei ikiia e au no roto i te au tangata nei.

20 Kua kitea e au toku tavini ko Davida; kua akamainu au iaia i toku manongi tapu ra.

21 Na toku uaorai rima aia e akatinamou, na toku uaorai rima oki aia e akamoroiroi.

22 Kare roa te enemi e umuumu i tana; kare oki aia e kino i te tangata kino.

23 Ka pāpāia e au tona au enemi ki mua i tona mata; ka taia e au te aronga i makitakita mai iaia ra.

24 Ei iaia te tuatua-mou naku e toku aroa vai ei; e teitei oki tona tara i toku nei ingoa.

25 Ka tuku au i tona rima kaui ki runga i te tai, e tona rima katau ki runga i te vai.

26 E kapiki mai aia iaku e, Ko toku Metua koe, taku Atua, e te mato e oraʼi au ra.

27 Ka akariro au iaia ei tama mua naku, kia teitei aia i te au ariki o te enua nei.

28 Ka vaoo rai au i toku aroa iaia e tuatau ua atu; e taku koreromotu iaia ra, ka akatinamouia ïa.

29 Ka akamou au i tona ra uanga e tuatau ua atu; e tona terono, mei te au rā o te au rangi ra ïa.

30 Kia akaruke tana au tamariki i taku ture, e kare i aere na taku ra tuatua-tau;

31 Kia akaatikau ratou i taku ra akonoanga, e kare i akono i taku ra au akauenga,

32 Ka tutaki atu au i ta ratou ara ki te rakau, e to ratou kino ki te kavivi:

33 Ko toku ra takinga-meitaki, kare ïa e apai keia iaia, kare oki te tuatua-mou naku ra e poka.

34 Taku koreromotu kare e akaatikauia e au, kare oki e ruri ke i tei na roto mai i toku vaa.

35 Okotai akenei oku taputou anga i toku uaorai tapu e, Kare au e pikikaa ia Davida:

36 Ka vai rai tona uanga e tuatau ua atu, e tona terono mei te rā ïa ki mua iaku ra.

37 Ka akamouia ïa e tuatau ua atu mei te marama; e mei te kite pikikaa kore ki runga i te rangi ra. Sela.

38 I teianei ra, kua akaruke koe, e kua akaviivii, kua riri koe i taau i akamainu ra.

39 Kua akakore koe i te koreromotu i to tavini nei; kua akaviivii koe i tona korona i raro i te one.

40 Kua vavaʼi koe i te au koro katoa nana, kua uritumuia e koe tona au punanga etaeta.

41 Te āruia ra aia e te aronga katoa e aere na te arataa; kua riro aia ei akakinoanga na tona ra au tangata tupu.

42 Kua akateitei koe i te rima katau o tei māro mai iaia; kua akarekareka koe i tona katoa ra au enemi.

43 Kua akamania rai koe i te mata o tana koke, e kare atura aia e mou i te tamaki anga ra.

44 Kua akakore koe i tona kakā, e kua tiria e koe tona terono ki raro i te one.

45 Kua akapoto koe i te au rā o tona ou anga; kua vaî koe iaia ki te akama. Sela.

46 Mei te aa ra te roa, e Iehova, o toou pipini anga? e ka ua rai ainei to riri mei te ai?

47 E akamaara i te poto o toku nei tuatau: eaa oki koe i anga ai i te au tangata ravarai ei mea puapinga kore?

48 Koai te tangata e ora kare e kite i te mate? ka ora tona vaerua i te rima o ade? Sela.

49 Teiea, e te Atu, to au takinga-meitaki takere ra, taau i taputou i te tuatua-mou naau kia Davida ra?

50 E akamaara, e te Atu, i te akakino anga i to au tavini nei; tei runga i toku umauma te akakino a te tangata nei e manganui:

51 Ta to au enemi i akakino mai, e Iehova, ko tei akakino i te ruatapuae e tei akamainuia e koe ra.

52 Kia akameitakiiā Iehova e tuatau ua atu. Amene, e Amene.