Isaia

44 E AKARONGO mai ana ra, e taku tavini e Iakoba; e Iseraela i ikiia e au ra:

2 Te na ko mairā Iehova, ko tei anga ia koe na, ko tei akatupu ia koe, mei te kopu mairai nana koe i tauturu: Auraka koe e mataku, e taku tavini, e Iakoba: e ko koe oki, e Iesuruna, i taku i iki ra.

3 E riringi oki au i te vai ki rungao tei kaki ra, e te vai taʼe ki runga i te enua keremarō ra: e riringi atu au i toku Vaerua ki rungao i toou uanga ra; e te ora naku ra ki rungao i taau anau.

4 E e tutupu oki ratou i rotopu i te ngangaere ra, mei te au rakau akaevaeva i te pae vai ra.

5 E tuatua mai tetai, No Iehova au; e e tapaia tetai i te ingoa o Iakoba; e e tata to tetai ra rima, No Iehova; e e paapaa tetai i to Iseraela ra ingoa.

6 Te na ko maira te ariki o Iseraela ra, ko Iehova, e tona Akaora, ko Iehova Sabaota ra; Ko au te muatangana, e ko au oki te akaopenga; e kare atu Atua mari ra ko au.

7 Koai tei akakite, mei iaku nei? kia akakite aia, e kia akonokono aia i taua mea noku nei, mei te tuatau mairai i akanoo ei au i taua aronga taito ra: i te au tuatua e tupu nei i teianei, e te ka tupu a muri ake, na ratou e akakite mai kia ratou nei.

8 Auraka kotou e mataku, auraka e taitaia: kare ainei au tei akakite kia koe mei muatangana mairai? e kua akakite rai oki au, ko kotou rai toku kite. Te taka atura ainei te Atua mari ra ko au? kare rava atu oki e mato ke; kare roa i kitea atu e au.

9 E puapinga kore anake to te aronga i rave i te idolo akatikitikiia ra; e ta ratou au mea mataora ra, kare ïa e puapinga; ko ratou uaorai te kite ia ratou; kare ratou i akara, kare oki i kite, kia akama ratou.

10 Koai tei anga i tetai atua, e kua akato i te tiki puapinga kore ra?

11 I na, e akama anake te aronga katoa i te kapiti kiaia ra; e tangata ua oki te aronga taunga katoa ra: kia putuputu anake mai ratou; kia tu mai ratou ki runga; e riro ïa i te mataku, e akama katoatoa ïa.

12 Kua anga iora te tupaki auri i te toki; kua raverave iora i roto i te ngarau; e akamanea iora ki te amara; kua anga iora i te reira i tona rima ririnui: kua pongi iora aia, kore akera tona matutu: kare akera aia i inu vai, aati akera te manava.

13 Kua akatika iora te kamuta i te tataura; kua tata iora i tona tu ki te mea keokeo; kua anga iora ki te toi ra: e kua akaarite marie oki ki te kamepa; kua anga iora mei te tangata te tu; mei to te tangata nei tu manea; kia vai marie ua rai ki roto i te are.

14 Kua tipu iora i te arezi nana uaorai, kua rave oki i te terezi, e te ale; e kua rave iora oki i te au rakau nana uaorai no roto i te vaorakau; kua tanu oki aia i te arana, e na te ua e akatupu.

15 Kia riro oki ei vaie na te tangata: kua rave oki i te reira ei murumuru iaia uaorai; kua taʼu iora i te umu, kua tunu i te areto: kua anga iora oki aia i te atua, kua akamori atura; kua anga iora i te idolo kotikotiia ra, e kua tupou ki raro i te reira.

16 Kua taʼu oki aia i tetai pae ki te ai; na runga i tetai pae kua kai aia i te puaka; kua tunu iora oki aia i te kai tunu, e pangia akera tona kaki; kua murumuru iaia uaorai, e kua na ko akera, Oti ra oki, kua maana atura au, kua kite au i te ai.

17 Ko te toenga ra, kua anga iora ïa ei atua, ei idolo kotikotiia nona: tupou iora aia ki raro i te reira, kua akamori atura; e kua pure atura i te reira, e kua na ko atura, Kia ora au ia koe; ko koe oki toku atua.

18 Kare ratou i kite, kare i utoa; kua piri oki to ratou mata i kore ei ratou i kite; to ratou ngakau i kore ei i utoa.

19 Kare oki tetai i maara ua ake i tona ngakau: kare i utoa, kare oki i kite kia tuatua e, Kua taʼuia e au tetai pae ki te ai; kua tunu oki au i te faraoa ki runga i te ngarau; kua tunu oki au i te puaka, e kua kai: e anga ainei au i te pae toe ei mea viivii? e tupou ainei au ki raro i te tumu rakau nei?

20 Te kai rai aia i te reu ai: te arataki keia ra aia e te ngakau vare ua, i kore ei i tikaʼi iaia kia akaora i tona vaerua, e kia tuatua e, Kare ainei te tuatua pikikaa tei toku rima katau nei?

21 E akamaara i teianei au mea, e Iakoba, e Iseraela; ko toku tavini oki koe: naku koe i anga; ei tavini koe noku: e Iseraela, kare koe e ngaro iaku.

22 Kua akakoreia e au taau au ara mei te tumurangi, e toou au kino mei te tumurangi patapatatue: e oki mai iaku nei, kua okoia koe e au.

23 Ka imene kotou, e te au rangi e, na Iehova oki i rave: e maeva kotou, e te au ngai akaaka o te enua nei: kia puroro ua mai te imene ia kotou, e te au maunga; e ko koe oki e te vaorakau, e te au rakau katoa i roto ra: kua oko oki a Iehova ia Iakoba, e kua akameitakiia aia i Iseraela.

24 Te na ko mairā Iehova, toou Akaora; ko tei anga ia koe mei te kopu mairai: Ko au ko Iehova ko tei anga i te au mea katoa ra; ko au anake tei oora i te au rangi; naku uaorai i totoa i te enua;

25 Ko tei akapekapeka i te au akairo a te aronga pikikaa ra, e kua akariro i te aronga tauraatua ei neneva; ko tei akaoki i te aronga pakari ki muri, e kua akariro i to ratou kite ei neneva;

26 Ko tei akatinamou i te tuatua a tona tavini, e kua akatupu oki i te ako a tana ra au karere; ko tei tuatua ia Ierusalema, E tangataia koe; e i te oire o Iuda, E patuia kotou, e tona ra au ngai pou, naku e akatu akaou:

27 Ko tei karanga atu ki te moana, Kia marō koe, naku e tamarō i toou au vai:

28 Ko tei tuatua ia Kuro ra, Koia taku tiaki; nana ïa e akatupu i toku anoano katoa: i te na ko anga atu ia Ierusalema, Ka patuia koe na; e i te nao ra, E akamouia taau ra pange.