Isaia

39 I REIRA to Merodaka-baladana, te tamaiti a Baladana, ariki no Babulonia, unga anga mai i te leta ma te apinga na Hezekia: kua rongo akera oki aia e i mate ana aia i te maki, e kua ora iora.

2 Mareka rava akerā Hezekia ia ratou, e kua akakite atura aia kia ratou i te are vairanga apinga nona, i te ario, e te auro, e te au rakau kakara, e te manongi meitaki ra, e te au are taoonga ravarai nona ra, e te au mea katoa i kitea i roto i te uipa anga apinga nana: kare rava e apinga i toe i roto i tona are, e tona katoa ra basileia, i kore i akakitea e Hezekia ra.

3 Kua aere mairā Isaia peroveta ki taua ariki ra kia Hezekia, e kua tuatua maira kiaia, I peea mai nga tangata nei? mei ea mai i aere mai ei ratou kia koe nei? Kua karanga aturā Hezekia, Mei te enua mamao mai ratou, mei Babulonia mai, i tae mai ei kiaku nei.

4 Kua tuatua maira aia, Eaa ta ratou i kite i roto i to are na? Kua karanga aturā Hezekia, Kua kite ratou i te au mea katoa i roto i toku are nei: kare takiri rai aku e apinga toe i te akakiteia e au kia ratou.

5 Kua tuatua mairā Isaia kia Hezekia, E akarongo mai ana i te tuatua a Iehova Sabaota:

6 I na, te vaitata maira te au rā, ka ope takiri ei te apinga i roto i to are, e ta to ai metua i akaputuputu ra, e tae rava akenei ki teianei rā, i te apaiia ki Babulonia: e kare rava e akatoeia, te tuatua mairā Iehova.

7 E to te au tamariki aau, no roto ia koe ra, taau e anau ra, na ratou ïa e apai ke; e ka riro oki ratou ei eunuka i te are o te ariki o Babulonia.

8 Kua karanga aturā Hezekia kia Isaia, E tuatua meitaki ta Iehova, taau i tuatua maira. E kua karanga atura aia, Ei au oki, e te tuatua-mou, i toku nei puke rā.