Isaia

22 TE TUATUA o te o orama ra. Eaa tikai koe i tenana, i ope ei toou katoa i te kake ki rungao i te au are?

2 Ko koe oki ko tei kapi i te koma ra, te oire vaavaa nunui e, te oire rekareka e! kare oki toou tangata i taia ra, i taia i te koke; kare oki i mate i te tamaki.

3 Kua ope rava to au tutara katoa i te ati, kua ope ra ratou i te riia, kare ra na te aronga ana; te aronga katoa i kitea i roto ia koe ra, kua mou katoa ïa; e te aronga katoa i oro mai mei te ngai mamao mai.

4 I tuatuaʼi oki au e, E anga ke kotou iaku; ka aue ua ana au i te aue maata, auraka e māro i te akapumaana mai iaku, i te mate anga o te tamaine a toku ra iti-tangata.

5 E rā karavau anga, e te takatakai anga ki raro, e te oripu ua anga; no ko mai i te Atu ra, ia Iehova Sabaota ra, i te o orama ra: te kakaoa anga i runga i te au patu ra, e te kapiki anga ki te au maunga ra.

6 Te apai akera Elama i te pia ana ra, ma te kariota e te aronga akaoro oroenua ra, e kua kiriti Kira i te vaî o te paruru tamaki ra.

7 Kua ki oki toou au o memeitaki i te kariota, e ei te ngutupa te aronga akaoro oroenua i tupati marie ei.

8 E kua apai keia te paruru mata o Iuda, e kua akara oki koe, i taua rā ra, ki te putunga taoonga tamaki ki te are o te vaorakau ra.

9 E te au ngai i ngaangaa i te oire o Davida, kua kite kotou e e manganui: e kua akaputuputu oki kotou i te vai no te puna i raro ra.

10 E kua tatau kotou i te au are i Ierusalema ra, e kua vavaʼi oki kotou i te au are ei akaketaketa i te patu.

11 Kua ko kotou i tetai puna ki rotopu i nga patu e rua ra, ei āriki vai no te puna taito ra: kare ra kotou i akara kiaia i tei rave i taua mea nei; e ko tei akono i te reira i taito ra, kare kotou i kite iaia.

12 Kua kapiki ra te Atu ra ko Iehova Sabaota ra, i taua rā ra, ki te aue e ki te mii; ki te mangore i te upoko, e kia kakau i te kakau paoa.

13 E i na, ko te rekareka e te pereperekavana, te tainga anga puakatoro, e te ko anga mamoe, e kai anga puaka, e te inu manga wina! e kai tatou, e e inu oki; apopo oki tatou e mate ei!

14 Kua akakite mai a Iehova Sabaota ra ki oku taringa nei; Kare takiri taua ara na kotou nei e matara e mate ua atu kotou, te tuatua maira te Atu ra ko Iehova Sabaota.

15 Te na ko maira te Atu ra, ko Iehova Sabaota, Ka aere, aere koe ki te tangata mou apinga ra, kia Sebena, tei runga oki aia i te ngutuare nei, ka karanga atu ei kiaia,

16 Eaa taau ki ku nei? e koai oki toou ki ku nei, i pao ei koe i te menema noou ki ku nei? tei pao ra oki aia i te menema nona ki runga rava ra, ko tei paopao i te nooanga nona ra i roto i te mato ra!

17 I na, ka titiri takiriia koe e Iehova ki vao ma te viviki maata, ka opu nui rava aia ia koe.

18 E takirikiri aia ia koe, ka titiri ke atu ei, mei te toka i makaia, ki te ngai atea ra: ei reira koe e mate ei, e ei reira e vaooiaʼi taau au kariota manea; e koe, te mea e akamaʼi te ngutuare o to atu ra.

19 E tuaru ke atu au ia koe i toou ra ngai, e totōia koe ki raro i te turanga ra.

20 E i te reira rā e karanga atu ei au ki toku tavini, kia Eliakima, te tamaiti a Hilikia:

21 E akakakau au iaia ki te kakau noou, e akamatutu au iaia ki te tatua noou ra; e toou ra au taku e tuku atu ki tona rima; e riro oki aia ei metua no to Ierusalema, no te ngutuare o Iuda.

22 E naku e tuku i te taviri o te ngutuare o Davida ki runga i tona pakuivi; nana e eeu, e kare e topiriia; e nana e topiri, e kare rava e eeuia.

23 E naku aia e tamou mei te nairo i te ngai pakari; e riro oki aia ei terono kakā i te ngutuare o tona metua:

24 E akautaia te kakā katoa o te ngutuare o tona metua ki runga iaia; te uanga e te uri, te au kapu rikiriki katoa, e te au kapu pararauare ra, e tae ua atu ki te au kapu oonu katoa.

25 Te na ko mairā Iehova Sabaota ra, Ei taua rā ra, taua nairo i patitiia ki te ngai pakari ra, e apai keia ïa; e tipuia ïa, e ka inga atu ki raro; e tei akautaia ki rungao ra, e kokoti keia ïa: na Iehova oki i tuatua mai.