Isaia

37 E KITE akera te ariki ra ko Hezekia, kua aae iora aia i ona kakau, e kua tapoki iaia uaorai ki te kakau paoa, aere atura ki roto i te are o Iehova.

2 Kua tono akera aia ia Eliakima, no runga i te ngutuare, e ia Sebena tata tuatua, e te kau taunga taito ra, ma te tapokiia ki te kakau paoa, kia Isaia peroveta, te tamaiti a Amoza ra.

3 Kua karanga atura ratou kiaia, Te na ko mairā Hezekia, E rā tumatetenga teianei rā, e te akamura, e te akakino: kua vaitata oki te tamariki i te anau, e kare e maroiroi e anau mai ei.

4 Peneiake ko te akarongo mai to Atua ra ko Iehova i te au tuatua a Rabasake, ta tona ra pu, ta te ariki no Asura, i tono mai e akakino i te Atua ora nei; peneiake ko te patoi mai to Atua ko Iehova i te au tuatua tana i akarongo ra: e pure oki koe i taau pure i tenana, i te toenga tangata i kitea nei.

5 Kua aere iora te au tavini o te ariki ra ko Hezekia kia Isaia.

6 E kua tuatua mairā Isaia kia ratou, E na ko atu kotou ki to kotou pu; Te na ko mairā Iehova, Auraka e mataku i te au tuatua taau i akarongo akenei, ta te au tavini o te ariki o Asura i akakino iaku ra.

7 I na, e vaerua ke taku e akao atu ki roto iaia ra, e rongo tana e akarongo, e ka oki aia ki tona uaorai enua; ka inga oki aia iaku i te koke i tona uaorai enua.

8 E oki aturā Rabasake, rokoia atu te tamaki ra te ariki no Asura ki Libena: kua kite ana oki aia e kua akaruke mai aia i Lakisa.

9 Kua akakiteia maira aia i reira, i na koia maira, Ko te ariki o Kusa ra, ko Tiraka, kua aere mai aia e tamaki ia koe: e kite akera aia, kua tono atura aia i te karere kia Hezekia, na ko atura,

10 E akapera kotou, kia karanga atu ki te ariki o Iuda ra kia Hezekia ra, e na ko atu, Auraka koe e vare i to Atua taau i irinaki na, kia na ko mai e, Kare Ierusalema e tukuia atu ki te rima o te ariki o Asura ra.

11 I na, kua akarongo oki koe i ta te au ariki o Asura i rave i te pa enua katoa ra, kua taitaipakoko ravaia ïa: e ko koe ainei te ka ora?

12 Kua akaora ainei te au atua o te pa enua i te aronga i pou i toku ai metua ra; ia Gozana, e ia Harana, e ia Rezepha, e te au tamariki i Edena i Telasara?

13 Teiea iora te ariki no Hamata, e te ariki o Araphada, e te ariki o te oire ra o Sepharavaima, no Hena, e no Iva?

14 Kua āriki mairā Hezekia i taua leta ra i te rima o te au karere ra, e kua tatau iora: aere aturā Hezekia ki runga i te are o Iehova ra, e kua oora atura i te reira ki mua i te aroaro o Iehova.

15 E kua pure iorā Hezekia kia Iehova, na ko atura,

16 E te Atua o Iseraela, e Iehova Sabaota e, e tei noo ki rotopu i nga kerubi, ko koe te Atua, ko koe anake ra, no te au basileia katoa o te ao nei; naau oki te au rangi e te enua nei i anga.

17 E ariu mai i to taringa, e Iehova, e akarongo mai; e akapuera mai i to mata, e Iehova, e akara: e akarongo mai koe i te au tuatua katoa a Senakeriba, tana i akau mai ei akakino i te Atua ora nei.

18 E tuatua-mou rai, e Iehova, kua tairipotiia te au etene, ma to ratou enua, e te au ariki no Asura,

19 E kua titiri i to ratou au atua ki roto i te ai; kare oki ratou i te atua, e mea angaia ïa e te rima tangata, e rakau e te toka, i pou ei ia ratou.

20 E teianei, e to matou Atua, e Iehova, e akaora koe ia matou i tona rima, kia kite te au basileia katoa o te ao nei e, ko Iehova koe, ko koe anake ra.

21 Kua tono akerā Isaia te tamaiti a Amoza i te karere kia Hezekia, karanga atura, Te na ko maira te Atua o Iseraela ko Iehova, Taau i pure mai iaku nei i te ariki o Asura ia Senakeriba:

22 Teia te tuatua ta Iehova i tuatua mai iaia ra: Te tamaine paretenia a Ziona tei akavaavaa ia koe, kua kata aviriia koe e ia; kua takirikiri te tamaine a Ierusalema i te upoko ia koe.

23 Koai taau i akavaavaa mai e i akakino mai? e i te akateitei mai koe i to reo iaai ra, e i akaraʼi to mata ki runga ra? i Tei Tapu i Iseraela nei.

24 Kua akakino mai koe i te Atu i te rima o te au tavini noou ra, e kua tuatua e, Kua tae au ma te maata katoa o taku aronga kariota ki te take rava o te au maunga ra, ki te pae i Lebanona ra; e kua motu iaku te au arezi teitei nona, e te au berusi akaperepere nona ra: kua tomo au ki roto i te ngai teitei i te kotinga nona ra, te vaorakau o te kainga ruperupe nona ra.

25 Kua koia e au e kua inu i te vai; e kua tamarō au i toku tapuae i te au vai katoa i Aiphiti ra!

26 Kare oki i kite takere e, naku i rave i te reira? e kua akakoroia e au, mei tupua roa mai? e teianei kua akatupuia e au kia riro ia koe te au oire i patuia ei ututua akatanea ra.

27 I riri iti ei to reira au tangata; kua tumatetenga ratou e kua rere te mauri; kua riro ratou mei te ngangaere o te kainga ra, e mei te rakau rikiriki tupu ou ra; mei te ngangaere i runga i te are; e mei te sitona paapaa ua, kare i ope i te tupu ra.

28 Ko toou ra noo anga, e toou ra aere anga ki vao, e toou ra aere anga mai ki roto, e toou riri iaku ra, kua kiteia e au.

29 No te mea ko toou riri iaku ra, e taau ra tuatua akatokā, kua tae rava mai ïa ki oku nei taringa: ka tuikau ei au i taku matau i roto i to putaiu, e taku tavaa ki roto i to tanga, ka akaoki ei au ia koe na te ara taau i aere maira.

30 Teia oki taau akairo, Ka kai kotou i tei tupu ua i teianei mataiti, e i te rua o te mataiti, i tei tupu i reira ra; e kia tae ki te toru o te mataiti, ka ruru ïa kotou ka kokoti ei, ka tanu ei i te kainga vine, ka kai ei i te ua o te reira.

31 Ka riro oki te toenga i ora maira no te ngutuare o Iuda, i te toro te aka ki raro, e ka ua oki ki runga:

32 Ka riro oki te toenga no Ierusalema atu, e te aronga i ora ra no te maunga ia Ziona: na te maroiroi o Iehova Sabaota teia e rave.

33 I tenana, te na ko mairā Iehova, i te ariki no Asura ra, Kare aia e tae mai ki roto i teianei oire; kare tana kakao e akainana mai i reira, kare aia e aere mai ma te paruru ki mua atu nei, e kare oki e akāū i te one i reira.

34 Ka oki rai aia na te ara i aereia mai e ia; e kare aia e tae mai ki roto i teianei oire, te tuatua mairā Iehova.

35 Naku oki e tiaki i teianei oire kia ora, noku uaorai, e no toku tavini no Davida.

36 Kua aere iora te Angela a Iehova ki vao, kua ta iora i to te puakapa o Asura, ra, okotai anere, e varu ngauru ma rima, i te tausani; e kia tu mai te aronga i toe kia popongi ake, i na, e turuma anake.

37 Riro atura te ariki o Asura ra ko Senakeriba, aere atura, e oki atura, e noo atura i Nineve.

38 E te akamori ra aia i roto i te are o tona ra atua o Niseroka, kua ta iora ana puke tamariki ko Aderameleka raua ko Sarezera iaia ki te koke; oro atura ra raua ki te enua ra ko Ararata. Tupauia akera aia i te au-e tana tamaiti ra e Esarahadona.