1 Samuela

7 KUA aere mai to Kiriata-iearima e tiki i te aruna a Iehova, e kua apai atura ki roto i te are o Abinadaba i runga i te tuaivi ra; e kua akatapu atura ratou i tanga tamaiti ia Eleazara ei tikai i te aruna a Iehova ra.

2 E e vairanga roa atura to te aruna a Iehova i Kiriata-iearama; e rua oki ngauru anga o te mataiti i reira. E aue iora te ngutuare katoa o Iseraela ia Iehova.

3 Kua karanga aturā Samuela ki te ngutuare ravarai o Iseraela, na ko atura, Kia ariu mai kotou kia Iehova ma to kotou ngakau katoa ra, ka tuku ke atu e i te au atua ke, e te au Asetoreta, i rotopu ia kotou na, e kia akonokono i to kotou ngakau kia Iehova ra, ka akamori ei iaia anake ra: ka akaora aia ia kotou i te rima o te Philiseti i reira.

4 Kua tuku ke atura te tamariki a Iseraela i te au Baala e te au Asetoreta ra, e kua akamori ia Iehova anake ra.

5 Kua karanga aturā Samuela, E uipa mai ia Iseraela ravarai Mizepa, e naku e pure ia Iehova ia kotou.

6 Kua uipa maira ratou i Mizepa, e kua uti ratou i te vai, e kua riringi ki mua i te aroaro o Iehova, e kua akakore iora i te kai i te reira rā, e kua tuatua akera i reira, Kua ara matou ia Iehova. E na Samuela e akatika i te tuatua i te tamariki a Iseraela i Mizepa.

7 E kite akera te Philiseti e kua uipa te tamariki a Iseraela i Mizepa, kua aere maira te au tutara o te Philiseti e tamaki ia Iseraela. Kite akera ta tamariki a Iseraela, mataku iora ratou i te Philiseti.

8 Kua tuatua maira te tamariki a Iseraela kia Samuela, Auraka koe e tivata i te kapiki ki to tatou Atua ra kia Iehova ia matou, kia akaora aia ia tatou i te rima o te Philiseti ra.

9 Kua rave iorā Samuela i tetai punua mamoe kaiu, e kua apai atura ei atinga karakaratio katoatoa na Iehova: e kua kapiki aturā Samuela kia Iehova ia Iseraela; e kua akarongo mai a Iehova iaia.

10 Te apai rā Samuela i taua atinga karakaratio ra, te vaitata maira te Philiseti e tamaki ia Iseraela; kua akakokina mairā Iehova i te mangungu maata ki runga i te Philiseti i taua rā ra, raungara atura ratou; taia iora ratou ki mua i te aroaro o Iseraela.

11 Aere atura oki to Iseraela mei roto atu i Mizepa, e aruaru ua atura i te Philiset, e ta atura ia ratou, e topa maira Betekara.

12 Kua rave iorā Samuela i tetai toka, e kua akatu akera ki runga i rotopu i Mizepa e ko Sene, tapa iora te ingoa ko Ebenezera, tuatua akera, Kua tauturu mai a Iehova ia tatou e teia noaʼi.

13 Vi iora ta Philiseti, kare akerai ratou i tae akaou mai ki te enua o Iseraela ra: e tei runga to Iehova rima i te Philiseti e ope rava akera to Samuela au rā.

14 E te au oire o Iseraela i riro i te Philiseti ra, i akaokiia mai ïa kia Iseraela, mei Ekerona mai e tae ua atura ki Gata; e te au tapere no taua au oire ra, kua rauka ïa ia Iseraela i te rima o te Philiseti ra. E au oki to Iseraela raua ko te ngati Amori.

15 E na Samuela e akatika i te tuatua ia Iseraela e ope rava akera ona au rā i te ora anga nei.

16 Aere atura aia i tera mataiti tera mataiti i te akapini anga ia Betela, e ia Gilagala, e ia Mizepa, e kua akatika i te tuatua ia Iseraela i taua au ngai katoa ra.

17 E mei reira oki kua oki aia ki Rama; i reira oki tona are; e kua akatika aia i te tuatua ia Iseraela i reira; e kua akatu aia i tetai atarau na Iehova i reira.