1 Samuela
11 KUA aere maira te ngati Amona ra ko Nahasa ki runga i reira, e kua patia iora i te puakapa e tamaki ia Iabesa-gileada; e kua karanga atura te au tangata ravarai o Iabesa kia Nahasa, E papau mai koe i te koreromotu kia matou nei, e ei tavini matou noou na.
2 Kua tuatua maira taua ngati Amona ra ko Nahasa kia ratou ra, Teia te mea e papau ei au i te koreromotu kia kotou, e koiti ana au i to kotou katoa au mata katau, ei akakino anga ia Iseraela katoa ra.
3 Kua karanga atura te aronga pakari i Iabesa kiaia, E tuku mai ana koe i nga rā e itu ake ei akaeaanga kia tono matou i te veka ki te au tapere katoa ki o Iseraela; e kare e tangata i te akaora ia matou ra, ei reira matou e aere atu ei ki vao kia koe na.
4 E tae atura nga karere ki Gibea i o Saula ra, kua akakite atura ki te tangata i taua tuatau ra: kua pukaoa ua atura te tangata ravarai i to ratou reo ma te aue.
5 E i na, te aru aere mairā Saula i te au puakatoro mei te kainga mai; e kua tuatua mairā Saula, I aaia te au tangata nei i aue ei ratou? Kua akakite atura ratou kiaia i te tuatua a nga tangata no Iabesa ra.
6 E tei te akarongo anga aia i taua tuatua ra, kua tae maira te Vaerua o te Atua ki runga ia Saula, tupu rava akera tona riri.
7 Kua rave iora aia i nga puakatoro e rua ra, tipupu iora, akau atura ki te au tapere ravarai ki o Iseraela i te rima o te karere ra, i te tuatua anga e, Ko te kore e aru mai ia Saula e ia Samuela, e akapera katoaia te au puakatoro nana.
8 Rokoia ake te tangata ravarai e te mataku ia Iehova ra, e kua aere rotai maira ratou katoa. E kia tatau aia ia ratou i Bezeka, e toru ïa anere anga i te tausani i taua au tamariki a Iseraela ra, e te au tangata o Iuda ra, e toru ïa ngauru i te tausani.
9 Kua tuatua maira ratou ki nga karere i aere maira, E karanga atu kotou ki to Iabesa-gileada, Apopo i te avatea ra e tauturuiaʼi kotou. Kua aere maira ana nga karere ra, e kua akakite maira ki to Iabesa i taua tuatua ra; mareka rava akara ratou.
10 Kua karanga atura to Iabesa, Apopo matou ka aere atu ei ki ko na kia kotou na, ka rave mai ei kotou ia matou i ta kotou e anoano ra.
11 Kia ao akera ra, kua akataka iorā Saula i taua au tangata, ra, e toru akera takanava; e tae atura ratou ki rotopu tikai i te puakapa i te araanga popongi ra, e ta ua atura i to Amona e avatea ua atura: e te toenga ra, pueurikiriki ke atura ïa, kare ua e toko rua tangata i kitea atu i te kapiti anga.
12 Kua tuatua akera te tangata kia Samuela, Teiea te aronga i karanga e, Ei ariki aina oki a Saula ki rungao ia tatou? Arataki mai ana ïa aronga ki ko nei, e na matou e ta.
13 Kua tuatua akerā Saula, Kare rava tetai tangata e mate i teianei rā: kua akaora oki a Iehova ia Iseraela i teianei rā.
14 Kua karanga aturā Samuela ki te tangata, taki aere tatou ki Gilagala, ka akatinamou ei i te basileia nei i reira.
15 Aere anake atura te tangata ki Gilagala; e kua akaariki iora ratou ia Saula i reira ki mua i te aroaro o Iehova i reira; e mareka rava aturā Saula e te au tangata katoa o Iseraela i reira.