Isaia

53 KOAI tei akarongo i ta matou tuatua? e koai tei akakiteia mai i te rima o Iehova?

2 Mei te tupu ou paruparu ra oki aia i te tupu anga i mua ia ratou, e mei te aka i te one marō ra: kare ona tu e te manea, ka kite atu ei tatou iaia; kare oki ona tu manea, ka inangaro atu ei tatou iaia.

3 Kua akavaavaaia aia, e kua kopaeia e te tangata; e tangata aue, e kua mātau oki i te tumatetenga: e kua puroku te tangata i to ratou mata iaia; i akavaavaaia aia, e kare aia i manako meitakiia e tatou nei.

4 Kua rave tika ra aia i to tatou paruparu, e kua maranga iaia to tatou aue; i manako ra tatou e, e tainga utunga tona, i pāpāia e te Atua, e i tairoia ra.

5 Kua koia ra aia no ta tatou au ara ra, kua akaparuparuia aia no to tatou au kino: e te pāpā i auiaʼi to tatou, tei runga ïa iaia; e no tona au puta i oraʼi tatou.

6 Kua aere ke anake tatou mei te mamoe ra; kua anga tatou katoa, ko te tangata ko tona uaorai ara; e kua akairi a Iehova ki runga iaia i te utunga o ta tatou katoa nei au ara.

7 Kua takinga-kinoia oki aia, e kua tinai-mateia aia, kare ra tona vaa i ki atu: i aratakiia aia mei te punua mamoe ki te tainga, e mei te mamoe e muteki ki mua i te aroaro o tei pakoti i tona uru ra, kare katoa oki tona vaa i tuatua mai.

8 Kare i tāpuia, kare rai i akautungaia, i apai keiaʼi aia ra: e naai tona uki e akakite? i tipu keia oki aia i te enua o te aronga e ora nei; no te ara a toku iti-tangata i taiaiaʼi aia.

9 Kua akatakaia tona vaarua ki o te aronga kino ra, tei te tangata apinga ra aia ka mate ei ra; kare oki ana tuatua kino i rave, kare katoa e pikikaa o roto i tona vaa.

10 Kua tika ra ia Iehova i te akaparuparu iaia; kua akamamae aia iaia; kia akariroia ra tona vaerua ei tutakingaara, e uanga tana e kite, e akaroa aia i tona au rā, e te inangaro o Iehova, e manuia ïa i tona rima.

11 I te mamae o tona vaerua, e kite ïa aia i te openga, e e mareka rava: no tona uaorai kite ka akatikaʼi toku tavini tuatua-tika i te tangata e manganui; ka apai oki aia i ta ratou au ara.

12 E teianei e tua atu oki au i tetai tuanga nana ma te aronga nunui katoa; e tua aia i te apinga noni ma te aronga mana; no te mea kua riringi aia i tona vaerua e tae ra atura ki te mate: e kua kapiti katoaia aia e te aronga rave ara ra; e kua apai aia i te ara a te tangata e manganui, e nana oki i pure no te aronga rave ara ra.