E Peʼe na Solomona
8 Angairi koe mei taku tungane e, ko tei ngote i te u o taku metua vaine e! ka kiteaʼi koe e au ki vao ra, kua oongi ua au ia koe, kare au e akakinoia i reira.
2 E arataki au ia koe, e apai au ia koe ki roto i te are o taku metua vaine ra, nana e apii mai iaku ra: kua akainu ïa au ia koe ki te wina takakaraia ra, no te vai o toku nei remuna.
3 Tei raro ake tona rima kaui i toku upoko, e te takave nei tona rima katau ki runga iaku.
4 Te ako atu nei au ia kotou, e te au tamaine i Ierusalema nei, auraka kotou e akaitirere, auraka e akaara, i taku akaperepere nei, e kia inangaro ua aia uaorai.
5 Koai teia e aere mai mei te medebara, irinaki uaʼi ki runga i tei akaperepereia e ia ra? I raro ake i tera ra lemoni toku akatu anga ia koe ki runga: i reira koe te anau angaia mai e to metua vaine: i reira koe te anau angaia mai e tei to ia koe ra.
6 E akamou koe iaku ei akairo ki runga i to ngakau na, ei akairo ki rungao i o puke rima ra: e viviki maata to te inangaro mei to te mate ra; tangi kore to te vareae mei to te vaarua ra: tona mura e mura ai ïa, mei te uira o Iehova ra.
7 Maata ua rai te vai, kare te inangaro e mate kia pi, kare katoa e mate i te vai puke: kia oronga te tangata i te au apinga katoa o tona ra are, ei oko i te inangaro, e akavaavaa ravaia mai aia.
8 E teina iti to matou, e kare tona u i puku: akapeea tatou i taua teina iti no matou nei, me karangaia mai aia e akaipoipo ra?
9 Kia akatauia aia ki te koro ra, e patu tatou i tetai punanga ario ki rungao: e kia akatauia aia ki te pa, e popani tatou iaia ki te rakau ra ki te arezi.
10 Ko au uaorai nei te koro, e oku puke u nei, e puke punanga ïa; i kite aroaia mai ei au ki mua i tona mata.
11 E kainga vine to Solomona ki Baalahamona; kua ou aia i taua kainga vine ra ki te aronga tiaki, e te oko i taua kai ra kia apai mai, tataki tai tausani ario ta te tangata okotai ra.
12 Noku taua kainga vine nei, tei ia koe atura i tenana, e Solomona, okotai tausani aku moni ario i rauka; e rua anere oki te tutaki ta te aronga i tiaki i te kai o te reira ra.
13 E tei noo ki roto i te au kainga ra e, te akarongo nei taku au oa i to reo ra: kia rongo katoa atu oki au i to reo ra.
14 Kia ngakoikoi mai, e taku akaperepere e, kia riro koe mai te zabi, e mei te aili ou, ki runga i te au maunga rakau kakara ra.