Deuteronomi

16 E AKONO i te marama ra ia Abiba, e rave rai i te pasa a to Atua ra a Iehova; ko Abiba oki te marama arataki mai ei to Atua ko mei Aiphiti mai i te po.

2 E teianei e apai koe i te pasa na to Atua ra na Iehova, te mamoe e te puakatoro, ki te ngai ta Iehova e akono ei vairanga no tona ra ingoa.

3 Auraka koe e kai ma te areto akaopueia ra; kia po itu ra koe i te keinga ma te areto akaopue kore, te areto no te mate ra; i aere rapurapu ua mai oki koe mei te enua maira mei Aiphiti, no reira koe ka manako ei i te rā i aere mai ei koe mei te enua maira mei Aiphiti, i toou katoa ra au rā i te ora anga nei.

4 Auraka rava ei areto akaopueia kia kitea i o ou ra, i roto i toou katoa au kotinga, e ope ua ake nga rā e itu ra; auraka rava oki ei manga kiko, i taau i akaatinga i te rā mua i te aiai ra, e vaooia no te popongi ake.

5 Kare e tika ia koe e ko i te pasa i roto i te au oire katoa noou, ta to Atua ta Iehova e oronga mai noou ra:

6 Ei te ngai ra ta to Atua ra ta Iehova e akono ei vairanga no tona ra ingoa, ei reira koe e ko ei i te pasa, ei te aiai ra, i te topa anga o te rā ra, i te tuatau taau i aere mai mei Aiphiti maira.

7 Ka tunu oki koe, e e kai oki i te ngai ta to Atua ra ta Iehova e akono ra; e tika ra ia koe kia oki ki to ngutuare kia popongi ake.

8 Ka kai koe i te areto akaopue koreia i nga rā e ono, e kia tae ki te itu o te rā ei uruoaanga tapu ïa na toou Atua na Iehova; auraka rava koe e rave i te angaanga i reira.

9 E tatau koe i nga ebedoma e itu ra; kia akamata koe i te kokoti i te sitona ra, e mei reira mai i te tatau i nga ebedoma e itu ra.

10 E akono oki koe i te oroa ebedoma a to Atua ra a Iehova, ma te apinga oronga ua a to rima ra; naau e oronga i tei tau ki ta to Atua ra a Iehova, ma te apinga oronga ua a to rima ra; naau e oronga i tei tau ki ta to Atua ra ta Iehova i akameitaki mai ia koe ra:

11 E rekareka koe ki mua i te aroaro o to Atua ra o Iehova, ko koe, e taau tamaiti, e taau tamaine, e to tavini tane, e to tavini vaine, e te ngati Levi i o ou ra, e te tangata ke, e te matiroeroe, e te vaine takaua i o ou na, i te ngai i akonoia e to Atua ra e Iehova ei vairanga no tona ra ingoa.

12 E akamaara oki koe e e tavini koe i Aiphiti ra; e akamako oki koe i teianei au akonoanga e e rave.

13 E akono oki koe i te oroa patia anga puakapa e kia po itu, kia oti taau sitona e taau wina i te akaputuputuia e koe ki roto ra;

14 E rekareka oki koe i taua oroa naau ra, ko koe, e to tamaiti, e to tamaine, e to tavini tane, e to tavini vaine, e te ngati Levi, e te tangata ke, e te matiroeroe, e te vaine takaua i o ou ra.

15 Kia po itu koe i te akono anga i te oroa a toou Atua ra a Iehova, i te ngai i akonoia e Iehova; e akameitaki mai oki to Atua ra ko Iehova ia koe i taau katoa ra apinga tini, e te au angaanga katoa a to rima na, e ka rekareka tika rai oki koe.

16 Kia taki toru to te au tane katoa i o ou ra aere akakite anga atu ki mua i te aroaro o to Atua ra o Iehova i te mataiti okotai, i te ngai tana e akono ra; ei te oroa areto akaopue kore ra, e te oroa ebedoma ra, e te oroa patia anga puakapa: e auraka oki ratou e aere puapinga kore ua ki mua i te aroaro o Iehova:

17 E oronga ra te tangata ravarai i tei tika iaia ra, i te tau i te meitaki ta to Atua ra ta Iehova i oronga atu kia koe ra.

18 Ei aronga akava e te aronga taoonga taau e akono i to au oire ravarai ra, ta to Atua ra ta Iehova e oronga mai noou ra, e pini ua ake to au kopu katoa ra; e na ratou e akava i te tangata ma te tuatua-tau tikai ra.

19 Auraka koe e ruri ke i te tuatua-tau ra; auraka koe e akono i te tu o te tangata, auraka oki e rave i te tutaki; ka po oki te mata o te aronga pakari i te tutaki, e piko ke oki te tuatua a te aronga tuatua-tika ra.

20 Ko te mea tika tikai ra taau e akono, kia ora koe, e kia noo i te enua ta to Atua ra ta Iehova e oronga mai noou ra.

21 Auraka koe e tanu i tetai rakau i maaniia ei Asetoreta i vaitata i te atarau, taau e akatu noou na to Atua ra na Iehova.

22 Auraka oki koe e akatu i te tiki naau; e mea riri ïa na to Atua ra na Iehova.