Mareko

15 E POPONGI rava akera, kua kimi iora te kau taunga nunui ra, e te aronga pakari, te au tata tuatua ra oki, e te Sunederi katoa ra, i te tuatua, e kua ri iora ia Iesu, kave atura kia Pilato, tuku atura kiaia.

2 Kua ui mairā Pilato kiaia, Ko te ariki aina koe no te ngati Iuda nei! Kua karanga atura aia, Koia tika taau i tuatua mai ana.

3 E manganui ta te kau taunga nunui ra tapepe anga mai iaia.

4 Kua ui akaou mairā Pilato kiaia, na ko maira, Kare koe e tuatua atu? i na oki te au mea e manganui ta ratou i tapepe ia koe nei.

5 Kare rava aturā Iesu i tuatua atu, va ua iorā Pilato.

6 Kua mātau aia i taua oroa ra i te tuku atu i tetai tangata tapekaia kia ratou, te tangata ta ratou i anoano ra.

7 Te vai tapekaia ra oki tetai tangata, ko Baraba te ingoa, koia e tetai au tangata kaitamaki katoa ra, e i ta tangata na oki i taua kaitamaki anga ra.

8 Kua kapiki ua atura taua urupu tangata ra i te pati anga atu ia Pilato i tana i mātau i te tuku atu ia ratou ra.

9 Kua tuatua mairā Pilato kia ratou, na ko maira, Ko te Ariki ainei o te ngati Iuda nei taku e tuku atu ia kotou na?

10 Kua kite oki aia e, no te vareae o te kau taunga nunui ra, i tuku mai ei ratou iaia.

11 Te akaue ra te kau taunga nunui ra i te tangata tini, kia pati ratou ia Baraba kia tukuia mai, aurakā Iesu.

12 Kua tuatua akaou mairā Pilato kia ratou, Eaa to kotou anoano iaku iaia nei, ta kotou e tuatua na e, ko te Ariki o te ngati Iuda?

13 Kua kapiki akaou atura ratou, E akasatauro atu iaia.

14 Kua ui mairā Pilato kia ratou, Eaa oki tana ara i rave? Maata rava atura to ratou kapiki e, E akasatauro atu iaia.

15 No te mea te inangaro rā Pilato i te tarekareka atu i te au tangata ra, kua tuku maira ia Baraba kia ratou, pāpāia iorā Iesu, e oti akera, tuku maira kia akasatauroia.

16 Kua arataki atura te au vaeau iaia ki roto i te paepae o te are ariki: akaputuputu maira i te pupu vaeau katoa i reira.

17 Kua akakakau atura iaia i te kakau muramura, kua atu iora i tetai pare rakau taratara, tuku atura ki rungao i tona mimiti;

18 Kua na ko atura kiaia, Kia ora na, e te Ariki o te ngati Iuda e!

19 Kua pāpā atura i tona mimiti i te kakao, kua tutua atura i te uavare ki rungao iaia, tuturi atura ki muao iaia, akamori atura.

20 E oti akera ta ratou aviri anga atu iaia, kua kiriti akera ratou i taua kakau muramura ra, akakakau atura iaia i tona uaorai kakau. Arataki atura ratou iaia e akasatauro.

21 E kua akaue atura ratou i tetai tangata Kurene, i aere na reirao mei uta mai, ko Simona te ingoa, e metua no Alekanedero, e no Refusa, kia apai i tana satauro.

22 Kua arataki atura ratou iaia ki Golagota, tera oki te akatau anga, E vairanga katu tangata.

23 Kua apai atura ratou kiaia i te wina, e mea irokia i te mura, kia inu aia: kare ra aia i rave.

24 E oti akera aia i te akasatauroia e ratou, tua iora i tona kakau, i tuku kelero oki i ta te tangata katoa e rave.

25 I te toru o te ora ra i akasatauro ei ratou iaia.

26 E te tuatua i tana ara kua tataia ki rungao, KO TE ARIKI O TE NGATI IUDA RA.

27 Kua akasatauro katoaia e toko rua puke tangata keia; i te rima katau tetai, i te rima kaui oki tetai.

28 Tupu atura taua tuatua i tataia ra e, “Kua kapiti katoaia aia ki te aronga ara.”

29 Kua akakino maira oki te aronga i aere na reirao, kua na ko maira, ma te takirikiri i te mimiti, E te vavaʼi i te nao e, e kua po toru anake kua akatu akaou,

30 Ka akaora na ia koe uaorai, ka eke mai i raro i tenana satauro.

31 Kua aviri katoa maira te kau taunga nunui ra, e te au tata tuatua, na ko akera ratou ratou uaorai, Kua akaora aia i etai ke; kare ra e tika i te akaora iaia uaorai.

32 E te Ariki o Iseraela ra, e te Mesia, ka eke mai koe mei te satauro mai, kia kite matou e kia akarongo atu. Ko raua oki tei akasatauro katoaia ra, kua aviri iaia.

33 Kako rava akera taua enua ra i te poiri, mei te ora ono mairai e tae ua atura ki te ora iva ra.

34 E tae akera ki te ora iva ra, kua kapiki aturā Iesu ma te reo maata, na ko atura, “Eloi, Eloi, lama sabatani?” tera oki te akatau anga, “E taku Atua, e taku Atua, eaa koe i akaruke mai ei iaku?”

35 E kite akera tetai papaki o te aronga i tu ua i vaitata ra, kua na ko akera, I na, te kapiki nei aia ia Elia.

36 Kua oro atura tetai, kua akaki atura i tetai rimu ki te vinega, topiri iora ki tetai kakao, apai atura kia inu aia, na ko akera, Vaio atu ana, kia kite tatou ia Elia i te aere anga mai e tuku mai iaia ki raro.

37 Kua kapiki aturā Iesu ma te reo maata, tuku atura i te vaerua.

38 Kua ngae iora te paruru o te nao ra, mei runga mai e raro roa.

39 E kite akera te rangatira anere, tei tu mai ki muao iaia ra, e i mate aia ma taua reo maata ra, kua na ko akera, Ko te Tamaiti tikai a te Atua teianei tangata.

40 E tetai aronga vaine tei te atea ke ra i te akara anga mai; e tei ia ratou a Maria i Magadala, e ko Maria te metua vaine no Iakobo iti ra, no Iose oki, e ko Salome;

41 (Ko tei aru ïa iaia i Galilea ra, e kua matuapuru iaia;) e aronga vaine ke oki e manganui tei aru mai iaia ki Ierusalema.

42 E aiai iora, (no te mea e rā akamanea anga taua rā ra, ko te rā i muao i te sabati ra,)

43 Kua aere mairā Iosepha i Arimatea, e tangata tumu korero e te mana oki, te tatari katoa ra oki aia i te basileia o te Atua, aere atura aia kia Pilato, ma te mataku kore, e pati atura i te kopapa o Iesu.

44 Kua va ua iorā Pilato i te mea koia i mate vave: kua tiki atura i te rangatira anere ra, e ui atura kiaia, e kua mate takere aina?

45 E kite akera aia i taua rangatira anere ra, kua oronga maira aia i te kopapa kia Iosepha ra.

46 Kua oko atura aia i te kakau orongā, tuku iora iaia ki raro, vaî atura i taua kakau ra, tuku atura ki roto i te tanumanga i paoia i roto i te mato, e uri atura i tetai toka ki te ngutupa o taua tanumanga ra.

47 Te akara mairā Maria i Magadala, e ko Maria te metua vaine o Iose ra, i tona vaio angaia.