Numero

33 KO te au aerenga teia o te tamariki a Iseraela, ko tei aere mai mei te enua maira mei Aiphiti, ma to ratou au nuku i raro ake ia Mose raua ko Aarona ra.

2 E na Mose i tata i te au ngai i aereia e ratou i to ratou au aerenga i te akaue a Iehova ra: e teia oki to ratou au aerenga, e ta ratou au ngai i aere ra.

3 Aere maira ratou mei Ramese mai i te marama mua ra, i te ngauru ma rima o te rā i taua marama mua ra; i te pasa ra kia ao akera, to te tamariki a Iseraela riro anga mai ma te autu ki mua i te aroaro o to Aiphiti katoatoa ra.

4 Te tanu ra oki to Aiphiti i te au tama mua ravarai i taia e Iehova i o ratou ra: e kua pou katoa to ratou au atua ia Iehova.

5 Aere maira te tamariki a Iseraela mei Ramese mai, e kua patia iora i te puakapa i Sukota.

6 Aere maira ratou mei Sukota mai, patia iora i te puakapa i Etama, i te pae o te medebara ra.

7 Aere maira ratou mei Etama mai, e kua anga akera ki Pi-hahirota, i vaitata i Baala-zephona: patia iora ratou i te puakapa ki mua atu i Migadola.

8 Aere maira ratou mei Pi-hahirota mai, e na raro maira i te tai e ki roto i te medebara, e po toru akera i te aerenga na roto i te medebara ra ko Etama, patia iora i te puakapa i Mara. 9 E mei Mara maira oki, aere ratou ki Elima: e punavai tei Elima okotai ngauru ma rua, e itu ngauru oki nu tamara; patia iora ratou i te puakapa i reira.

10 Aere maira ratou mei Elima mai, patia iora i te puakapa i te Tai Muramura.

11 Aere maira ratou mei te Tai Muramura mai, patia iora i te puakapa i te medebara ra ko Sini.

12 Aere maira ratou mei te medebara mai ko Sini, patia iora i te puakapa i Dopheka.

13 Aere maira ratou mei Dopheka mai, patia iora i te puakapa i Alusa.

14 Aere maira ratou mei Alusa mai, patia iora i te puakapa i Rephidima, kare o reira vai na te tangata kia inu.

15 Aere maira ratou mei Rephidima mai, patia iora i te puakapa i te medebara ra ko Sinai.

16 Aere maira ratou mei te medebara ra ko Sinai, patia iora i te puakapa i Kiberota-hataava.

17 Aere maira ratou mei Kiberota-hataava: patia iora i te puakapa i Hazerota.

18 Aere maira ratou mei Hazerota mai, patia iora i te puakapa i Rotema.

19 Aere maira ratou mei Rotema mai, patia iora i te puakapa i Rimona-pareza.

20 Aere maira ratou mei Rimona-pareza mai, patia iora i te puakapa i Libena.

21 Aere maira ratou mei Libena mai, patia iora i te puakapa i Risa.

22 Aere maira ratou mei Risa mai, patia iora i te puakapa i Kehelata.

23 Aere maira ratou mei Kehelata mai, patia iora i te puakapa i te maunga ra ko Saphera.

24 Aere maira ratou mei te maunga maira ko Saphera, patia iora i te puakapa i Harada.

25 Aere maira ratou mei Harada mai, patia iora i te puakapa i Makelota.

26 Aere maira ratou mei Makelota mai, patia iora i te puakapa i Tahata.

27 Aere maira ratou mei Tahata mai, patia iora i te puakapa i Tara.

28 Aere maira ratou mei Tara mai, patia iora i te puakapa i Miteka.

29 Aere maira ratou mei Miteka mai, patia iora i te puakapa i Hasamona.

30 Aere maira ratou mei Hasamona mai, patia iora i te puakapa i Moserota.

31 Aere maira ratou mei Moserota mai, patia iora i te puakapa ki o te tamariki a Iaakana.

32 Aere maira ratou mei te tamariki a Iaakana mai, patia iora i te puakapa i Hora-hagidagada. 33 Aere maira ratou mei Hora-hagidagada mai, patia iora i te puakapa i Iotabata.

34 Aere maira ratou mei Iotabata mai, patia iora i te puakapa i Aberona.

35 Aere maira ratou mei Aberona mai, patia iora i te puakapa i Eziona-gebera.

36 Aere maira ratou mei Eziona-gebera mai, patia iora i te puakapa i te medebara ra ko Zini, koia Kadesa ra.

37 Aere maira ratou mei Kadesa mai, patia iora i te puakapa i te maunga ra ko Hora, i te pae o te enua ra ko Edoma.

38 Aere aturā Aarona taunga i te akaue a Iehova ki rungao i te maunga ra ko Hora, mate iora aia i reira, i te a o te ngauru anga o te mataiti o te aere anga mai o te tamariki a Iseraela mei te enua maira mei Aiphiti, i te rā mua o te marama rima ra. 39 Kua tae a Aarona ki te anere okotai, e rua oki ngauru e toru ara, o tona mataiti, i mate ei aia ki runga i taua maunga ra ko Hora.

40 Kite akera te ariki o Arada, ngati Kanaana i noo i te pae i apatonga i te enua ra ko Kanaana ra e, te aere maira te tamariki a Iseraela ra.

41 Aere maira ratou mei te maunga maira mei Hora, patia iora i te puakapa i Zalemona.

42 Aere maira ratou mei Zalemona mai, patia iora i te puakapa i Punona.

43 Aere maira ratou mei Punona mai, patia iora i te puakapa i Obota.

44 Aere maira ratou mei Obota mai, patia iora i te puakapa i Ie-abarima i te pae o Moabi ra,

45 Aere maira ratou mei Ie-abarima mai, patia iora i te puakapa i Dibona-gada. 46 Aere maira ratou mei Dibona-gada mai, patia iora i te puakapa i Alamona-dibilataima.

47 Aere maira ratou mei Alamona-dibilataima mai, patia iora i te puakapa i te au maunga ra ko Abarima, ki mua mai i te maunga ra ko Nebo: 48 Aere maira ratou mei taua au maunga maira mei Abarima mai, patia iora i te puakapa i te ngai mataataa i Moabi ra, i te pae Ioridana i vaitata i Ieriko ra. 49 Patia iora ratou i te puakapa i te pae Ioridana, mei Beteiesimota mai, e tae roa akera ki Abela-sitima i te ngai mataataa i Moabi ra.

50 Kua tuatua mairā Iehova kia Mose i taua ngai mataataa i Moabi ra, i te pae Ioridana, i vaitata i Ieriko ra, na ko maira, 51 E karanga atu koe ki te tamariki a Iseraela, e na ko atu koe kia ratou, Kia tae kotou ki tetai pae Ioridana ki te enua ra ko Kanaana;

52 E arumaki kotou i to taua enua ra i mua ia kotou, e kia akangaa roa oki i ta ratou au toka i akatikitikiia ra, e akapou takiri roa oki kotou i to ratou au idolo i akatoia ra, e uritumu roa oki kotou i to ratou au ngai teitei ra:

53 E rave oki kotou i taua enua ra kia noo kotou i reira; kua oronga oki au i taua enua ra no kotou ei nooanga.

54 E tua kelero oki i taua enua ra no to kotou ra au kopu-tangata, ei nooanga; e e maata ra, ei tuanga maata ta kotou e oronga atu, e e iti ra, ei tuanga iti ta kotou e oronga atu: ei te ngai i rauka iaia i te kelero ra, ei reira tana tuanga; e akono rai i te au kopu o to kotou ra ai metua ka noo ei kotou. 55 Kia kore ra kotou e arumaki i to taua enua ra i mua ia kotou ra; ka riro te aronga e toe ia ratou ra, ei tara i roto i to kotou mata, e ei tao i roto i to kotou kaokao, e ka taeko ratou ia kotou i to kotou noo anga i te enua ra.

56 E taku i manako e rave ia ratou ra, ka riro au i te akapera atu kia kotou.