Iosua

8 KUA tuatua mairā Iehova kia Iosua, Auraka e mataku, auraka koe e ngarangara: ka rave koe i te au tangata tamaki katoa ra, ka tu, ka aere ki runga ia Ai. I na, kua oronga au i te ariki o Ai ki to rima, e tona tangata, e tona oire, e tona enua.

2 E mei taau i rave ia Ieriko e to reira ariki, ko taau ïa Ieriko e to reira ariki, ko taau ïa e rave ia Ai e to reira ariki; mari ra ko te apinga e te au puaka i reira ra, e rave kotou i te reira ei apinga na kotou uaorai: e tuku koe i te kotipu na muri mai i taua oire ra.

3 Kua tu akerā Iosua e te au tangata tamaki ravarai e aere ki runga ia Ai; e kua iki iorā Iosua i te au tangata toa e toru ngauru i te tausani, kua tono atura ia ratou i te po.

4 Kua akaue atura aia ia ratou, na ko atura, I na, ei kotipu ta kotou i taua oire nei, ei muri mai i te oire; auraka kotou e akamamao ke atu i taua oire nei, e noo ra kotou ma te akonokono, kotou ravarai.

5 Ka aere oki au, ma te tangata ravarai kiaku nei, e ka akavaitata atu ki taua oire ra; e kia aere mai ratou ki vao e tamaki ia matou, mei tei muatangana ra, ka oro matou ki mua ia ratou.

6 Ka aru mai ratou ia matou, e kia taka ke roa mai ratou ia matou i taua oire ra; ka riro oki ratou i te tuatua e, Kua ati taua aronga nei ia tatou mei tei muatangana ra: e kia oro matou ki mua i to ratou aroaro;

7 Ei reira kotou e titiri ei ta kotou kotipu, ka tu mai ei ka rave i taua oire nei; ka orongaia mai oki e to kotou Atua e Iehova ki to kotou rima.

8 E kia rauka mai taua oire ra ia kotou, e taʼu kotou i taua oire ra ki te ai ko ta Iehova oki i akaue mai ko ta kotou ïa e rave. I na, kua oti kotou i te akaueia atu e au.

9 Kua tono aturā Iosua ia ratou, e kua aere atura ratou e akamoe, kua akamoe iora i rotopu i Ai e Betela, i te pae i te opunga o te rā i Ai: moe iora rā Iosua ki roto i te au tangata i te reira po.

10 E kua tu akerā Iosua ki runga i te popongi akirata, kua tatau iora i te au tangata, aere atura ki runga, koia e te aronga pakari o Iseraela, na mua i te tangata, ki Ai.

11 E aere anake atura te au tangata tamaki katoa tei iaia ra ki runga, e akavaitata atura, e aere atura ki mua i taua oire ra, patia iora i te puakapa i te pae i apatokerau ra i Ai, e o tei rotopu ia ratou e ko Ai.

12 Kua rave iora aia i te au tangata ra e rima paa tausani, e tukuia ratou e ia ei kotipu i rotopu ia Betela e Ai, i te pae i te opunga o te rā o taua oire ra.

13 Kua akanoo iora ratou i te tangata, ko taua nuku katoa ra i te pae i apatokerau o taua oire ra, e to ratou au kotipu i te pae i te opunga o te rā o taua oire ra; aere aturā Iosua i rotopu i taua o ra i te reira po.

14 E kia akara maira te ariki o Ai i te reira, kua rapurapu iora ratou, e kua tu akera i te popongi akirata, kua aere maira ki vao, koia e te tangata ravarai nona, te tangata no taua oire ra i te tuatau i akonoia ra, e tamaki ia Iseraela i mua i te Araba ra; kare ra aia i kite e, e kotipu tei tukuia iaia ki muri mai i taua oire ra.

15 Kua oro mairā Iosua e Iseraela katoa na te arataa e tae ei ki te medebara ra, mei te mea e kua eke ratou.

16 Kua akaope katoaia maira to Ai katoa ra, ei arumaki ia ratou, e kua arumaki maira ratou ia Iosua, e taka ke roa maira ratou i taua oire ra.

17 Kare rava e tangata i toe i roto i Ai e Betela, riro anake maira ki vao i te arumaki anga ia Iseraela; e vaoo iora ratou i te oire kia puera ka ua na, arumaki maira ia Iseraela.

18 Kua tuatua mairā Iehova kia Iosua, Ka akatika atu koe i te korare i to rima io na ki Ai, ka oronga oki au i taua oire ra ki toou rima. Kua akatika aturā Iosia i te korare i tona rima ki taua oire ra.

19 E tei te akatika anga aia i tona rima, kua tu viviki ua maira taua aronga kotipu ra i to ratou ngai, e kua oro maira, e tomo iora ki roto i te oire, rave iora; e kua tutungi iora ratou i taua oire ra ki te ai, kare i roa ïa.

20 E kia akara to Ai ki muri ia ratou, kite akera ratou, e i na, te kou ua ra te auai o taua oire ra ki runga i te rangi, e kare atura o ratou maroiroi kia oro ki tetai pae e ki tetai pae, e kua anga maira to Iseraela i oro ki te medebara ra ki runga i te aronga i arumaki mai ia ratou ra.

21 Kite akera oki a Iosua e Iseraela katoa e, kua raveia taua oire ra e te aronga kotipu ra, e te kou ua ra te auai o taua oire ra ki runga, kua anga atura ratou e ta i to Ai ra.

22 Kua maringi a vai ua maira tetai papaki mei roto mai i te oire ki runga ia ratou, vaoo ua iora ratou i rotopu ia Iseraela, e tangata tei tetai pae, e tei tetai pae; kua ta iora ratou ia ratou, kare rava tetai i vaooia kia ora.

23 E opu ua iora ratou i te ariki no Ai, e kua taki ora ua maira iaia kia Iosua ra.

24 E ope takiri akera to Ai i te taia e Iseraela ki roto i te au kainga i te medebara, i te ngai i arumaki mai ei ratou ia ratou, e ope rava akera ratou i te mate i te mata koke, e pou rava atura ratou, oki atura to Iseraela ravarai ki Ai, e kua ta atura i te reira ki te mata koke.

25 E te aronga i mate i taua rā ra, te tane e te vaine katoa ra, okotai ïa ngauru e rua ara i te tausani, ko to Ai katoatoa ïa au tangata.

26 Kare ra oki a Iosua i akaoki mai i tona rima tana i tou i te korare ra, e kia ope rava to Ai i te pou iaia.

27 Mari ra ko te puaka e te apinga o taua oire ra, ko tei raveia ïa e Iseraela ei apinga na ratou uaorai, i te tuatua ta Iehova i akaue mai ia Iosua ra.

28 E kua taʼu iorā Iosua ia Ai ki te ai, e akariro atura ei ututua e tuatau ua atu; ei ngai tanea e tae rava akenei ki teianei rā.

29 E kua ri atura aia i te ariki o Ai ki runga i tetai rakau e aiai ua atura: kia topa ra te rā ra, kua akaue aturā Iosua e tuku ratou i tona kopapa ki raro mei runga mai i taua rakau ra, ka titiri atu ei ki te ngutupa i te tomoanga ki roto i te oire ra; ka akaputuputu ei te au toka ei utua maata ki rungao, te vai ua akera i teianei rā.

30 Kua patu iorā Iosua i tetai atarau na te Atua o Iseraela na Iehova ki runga i te maunga ra ia Ebala;

31 I ta te tavini a Iehova i ta Mose i akaue mai i te tamariki a Iseraela ra, i tei tataia i te buka ture a Mose ra, ei atarau toka tarai koreia, i tei kore rava i taraiia e te tangata i te auri: e kua apai ratou i te atinga karakaratio ki rungao na Iehova, e kua apai katoa i te atinga au ra.

32 E kua tata iora aia i te ture a Mose ki runga i te au toka i reira, i tei tataia e Mose ki mua i te aroaro o te tamariki a Iseraela.

33 Kua tu iora Iseraela katoa, e to ratou aronga pakari, e te aronga rangatira, e te au akava, i tetai pae aruna, e i tetai pae, ki mua i te kau taunga ngati Levi ra, ko tei apai i te aruna koreromotu a Iehova ra, ko te tangata ke e te tangata tupu katoa; ko tetai pae tei te maunga ra ïa ko Gerizima, e tetai pae tei te maunga ïa ko Ebala ra, ko tei akaueia mai e te tavini o Iehova ra e Mose; kia akamata ana ratou i te akaora i te tamariki a Iseraela.

34 E muri akera, kua tatau iora aia i te au tuatua katoa i roto i te ture ra, i te akaora e te akakino, mei tei tataia i roto i te buka ture ra.

35 Kare rava tetai tuatua ta Mose i akaue maira i toe i te tatauia e Iosua ki mua i te aroaro o te uipaanga Iseraela katoa ra; te vaine, e te tamariki mea riki, e te aronga ke ke katoa i roto ia ratou ra.