Numero

28 KUA tuatua mairā Iehova kia Mose, na ko maira,

2 E akaue atu koe ki te tamariki a Iseraela, e na ko atu koe kia ratou, Ka akono rai kotou i taku au atinga, taku kai, ei atinga ai naku, ei mea aunga kakara naku, e apai mai ïa kiaku nei i tona tuatau tikai i akonoia ra.

3 E karanga atu koe kia ratou, Teia te atinga ai ta kotou e apai kia Iehova ra; e puke punua mamoe mataiti okotai, e te kino kore, e rua, i tera rā, i tera rā, ei atinga karakaratio tamou ïa. 4 Tetai punua mamoe ra ei te popongi koe ka apai ei, e tetai punua mamoe ei te aiai koe ka apai ei;

5 Okotai oki omera faraoa, i irokia ki te inu reruia, okotai kuata ina, ei atinga kai.

6 E atinga karakaratio tamou ïa, i akatupuia i te maunga ra i Sinai, ei atinga ai aunga kakara na Iehova ra.

7 E te atinga inu no te reira ra, okotai kuata ina to te punua mamoe okotai ra; ei te ngai-tapu ra ka riringiiaʼi te wina ki mua ia Iehova, ei atinga inu.

8 E tetai punua mamoe ra, ei te aiai koe ka apai ei; mei te atinga kai e tona atinga inu i tei te popongi ra, ka apai ei koe, ei atinga ai aunga kakara na Iehova ra.

9 Kareka i te rā sabati ra, e tataki rua punua mamoe kia apai ei mataiti okotai rai, e te kino kore, kia rua omera faraoa, i irokia ki te inu, ei atinga kai, e to reira oki atinga inu. 10 Ko te atinga karakaratio teia no te au sabati katoa ra, e taka ke rai te atinga karakaratio tamou ra, e to reira oki atinga inu.

11 E kia tae ki te marama ou ra, e apai kotou i te atinga karakaratio na Iehova; e rua puakatoro ou, okotai mamoe toa, e itu oki punua mamoe mataiti okotai, e te kino kore; 12 E toru oki omera faraoa i irokia ki te inu, i te puakatoro okotai ra, ei atinga kai; e rua oki omera faraoa i irokia ki te inu, i te mamoe toa okotai ra, ei atinga kai;

13 E okotai oki omera faraoa i irokia ki te inu, i te punua mamoe okotai ra, ei atinga kai; ei atinga karakaratio aunga kakara, ei atinga ai na Iehova ra.

14 E te au atinga inu no te reira ra, ei afa ina wina i te puakatoro okotai ra, okotai oki tuanga ina i tua toruia ra, i te mamoe toa okotai ra, e tetai kuata ina i te punua mamoe okotai ra. Ko te atinga karakaratio ïa teia no te au marama katoa, e ope roa ake te au marama o te mataiti ra.

15 Okotai oki puakanio ei tarangaara ka apaiia kia Iehova ra, e te atinga karakaratio tamou katoa, e tana katoa ra atinga inu.

16 E kia tae ki te po okotai ngauru ma a i te marama mua ra, ko te pasa ïa na Iehova.

17 E te ngauru ma rima o te po i taua marama ra, ko te oroa ra ïa: e po itu i te kainga i te areto akaopue kore.

18 Ko te rā mua ra, e uruoaanga tapu ïa; auraka roa kotou e rave i te angaanga i reira.

19 E apai ra kotou i e rua puakatoro ou, okotai oki mamoe toa, e itu punua mamoe mataiti okotai, ei mea kino kore anake ia kotou, ei atinga ai, ei atinga karakaratio na Iehova:

20 E te atinga kai no te reira ra, ei faraoa ïa, i irokia ki te inu; e toru omera ta kotou e apai no te puakatoro okotai, e rua oki omera no te mamoe toa;

21 Okotai oki omera to te punua mamoe okotai, taau ïa e apai, e pini ua ake aua nga punua mamoe e itu ra:

22 Okotai oki puakanio tarangaara ei tapokiangaara na kotou.

23 E apai kotou i teia, e te atinga karakaratio no te popongi katoa ra, e atinga karakaratio tamou oki te reira ra.

24 E pera kotou i te apai i te kai no te atinga ai i te au rā katoa, e ope roa ake nga rā e itu ra, ei mea aunga kakara na Iehova: ko te reira, e te atinga karakaratio tamou katoa ra, e tona oki atinga inu i te apai katoa anga.

25 E kia tae ki te po itu ra, ei uruoaanga tapu ta kotou; auraka rava kotou e rave i te angaanga i reira.

26 E kia tae katoa ki te rā popo ra, kia apai mai kotou i te atinga kai ou kia Iehova ra, kia ope nga ebedoma e itu no kotou ra, ei uruoaanga tapu ta kotou; auraka rava oki kotou e rave i te angaanga i reira: 27 Ka apai ra kotou i te atinga karakaratio aunga kakara na Iehova; e rua puakatoro ou, okotai mamoe toa, e itu punua mamoe mataiti okotai ra;

28 E to te reira oki atinga kai faraoa, i irokia ki te inu, e toru ïa omera i te puakatoro okotai re, e rua oki omera i te mamoe toa okotai,

29 Okotai oki omera i te punua mamoe okotai, e ope ua ake aua nga punua mamoe e itu ra;

30 Okotai oki puakanio ei tapokiangaara na kotou. 31 Ko te reira ta kotou e apai, e to reira oki au atinga inu, auraka rave oki ei kino, e te atinga karakaratio tamou, e to reira oki atinga kai katoa ra.