Exodo

9 KUA tuatua mairai a Iehova kia Mose, Ka aere kia Pharao ra, e karanga atu kiaia e, Te na ko maira te Atua o te ngati Ebera ra ko Iehova, E tuku mai koe i toku au tangata, kia akamori mai ratou iaku.

2 Kia kore ra koe e tuku, kia tāpu rai koe ia ratou,

3 I na, tei runga te rima o Iehova i te au puaka naau i roto i te kainga, ki runga i te au oro-enua, ki runga i te au asini, ki runga i te au kamela, ki runga i te au puakatoro, e ki runga i te au mamoe; e mate maata roa.

4 E na Iehova e akataka ke i te au puaka a to Iseraela, e te au puaka a to Aiphiti; e kare rava ta te tamariki a Iseraela e mate e okotai iti ake.

5 E kua akonoia e Iehova te tuatau, te tuatua maira, Apopo taua mea nei e raveiaʼi e Iehova i te enua nei.

6 E ao akera kua rave iorā Iehova i taua mea ra, pou iora te au puaka a to Aiphiti i te mate; kareka te au puaka a te tamariki na Iseraela ra, kare rava ïa i mate e okotai iti ake.

7 Kua ungā akera Pharao i te karere e ui, e i na, kare rava tetai a te tamariki a Iseraela puaka i mate. E kua paketaketa atura te ngakau o Pharao, e kare rai aia i tuku i taua au tangata ra.

8 Kua tuatua mairā Iehova kia Mose raua ko Aarona, Ka rave ana i te reu ai i te umu ra, kia ki to korua rima, e na Mose e titiri i taua reu ra ki runga i te rangi, ki mua ia Pharao ra;

9 E ka riro taua reu ra ei one-pueu e pini ua ake te enua nei ko Aiphiti; e riro oki te reira ei ee, e ka ngaa aere te ee ra ki runga i te tangata, e ki runga katoa i te puaka, e pini ua ake te enua nei ko Aiphiti.

10 Kua rave iora raua i te reu ai i te umu ra, e tu ua atura ki mua i te aroaro o Pharao; kua titiri akerā Mose i te reira ki runga i te rangi; riro atura ei ee, e kua ngaa aere te ee ki runga i te tangata, e ki runga katoa i te puaka.

11 Kare akera te au purepure i mou i mua i te aroaro o Mose i taua ee ra; tei runga oki i te au purepure taua ee ra, e i runga i to Aiphiti ravarai.

12 E kua akaketaketa aturā Iehova i to Pharao ngakau e kare akera aia i akarongo ia raua, mei ta Iehova oki i tuatua mai kia Mose ra.

13 Kua tuatua mairā Iehova kia Mose, E tu koe ki runga i te popongi roa, ka tu atu ei ki mua i te aroaro o Pharao, ka karanga atu ei kiaia, Te na ko maira te Atua o te ngati Ebera ra ko Iehova, E tuku mai koe i toku au tangata, kia akamori mai ratou iaku.

14 Ei teianei oki au e tuku atu ei i taku au mate katoa nei ki runga ia koe uaorai, e ki runga i toou au tavini, e ki runga i toou au tangata; kia kite oki koe e, kare oku e aite i te ao katoa nei.

15 Naringa oki au i akatika atu ei i toku rima, ka ta atu ei ia koe, e toou au tangata, i te maki-mate, kua taka ke atu koe i te enua nei i reira:

16 No reira tika rai oki au i vaoo ei ia koe, ei akakite anga atu ia koe i toku nei mana, e kia akakiteia toku ingoa e pini ua ake te ao katoa nei.

17 E tenana, kia akateitei ua na koe ia koe uaorai i toku nei au tangata, e kare rai e tuku ia ratou;

18 I na, penei apopo, e akatopaʼi au i te ua toka maata roa, kare rai ïa ua toka i kitea i Aiphiti nei, mei tupua roa mai, e teia noaʼi.

19 E tenana, e tiki i te au puaka naau, e te au mea katoa naau i te kainga, e akaputuputu mai ki roto i te are: ko te tangata katoa, e te au puaka ravarai e toe ki vao, kare i taki naia mai ki roto i te are, ka topaia ïa ratou e te ua toka, e ka pou ïa i te mate.

20 E ko tei mataku i te tuatua a Iehova i te au tavini o Pharao ra, kua akaoro ïa i tona au tavini, e tana au puaka ki roto i te au are:

21 Kareka tei kore i akono i te tuatua a Iehova ra, kua vaoo ïa i tona au tavini e tana au puaka ki vao.

22 Kua tuatua mairā Iehova kia Mose, Ka akatika na i toou rima ki runga i te rangi, kia ua tokaia mai e pini ua ake te enua nei ko Aiphiti, ki runga i te tangata, e ki runga i te puaka, e ki runga katoa i te au rakau rikiriki o te kainga nei, e pini ua ake te enua nei ko Aiphiti.

23 Kua akatika aturā Mose i tana rakau ki runga i te rangi; ko te mangungu maira ia Iehova, e te ua toka, e te ai i te oro ua anga na runga i te one: i akaperā Iehova i te akatopa anga i te ua toka ki runga i taua enua ra ko Aiphiti.

24 Ko te ua toka, e te ai i te iro katoa angaia ki taua ua toka ra, e mea viviki maata roa: kare rava e aite i taua enua katoa ra ko Aiphiti, e mei te tangata angaia mairai.

25 Pou takiri rava to vao, te tangata e te puaka katoa, i te ua toka, e pini ua ake taua enua katoa ra ko Aiphiti; mate iora te au rakau rikiriki katoa o te enua, e te au rakau mamaata ravarai o te enua atiati rava akera ïa, i taua ua toka ra.

26 Mari ra ko te enua ra ko Gosena, i nooia e te tamariki a Iseraela, kare ïa o reira e ua toka.

27 Kua tono mairā Pharao e tiki ia Mose raua ko Aarona, kua tuatua maira kia raua, Kua ara au i tenana: e tuatuatika ta Iehova, ko au ra tei kino e toku au tangata.

28 E tautopa korua ia Iehova, kua oti ua oki teianei mangungu maata, e te ua toka, e ka tuku au ia kotou, kare kotou e pupuru akaouia.

29 Kua karanga aturā Mose kiaia, Kia tae roa au ki vao i te oire nei, e tautopa au ia Iehova, e ka moki te mangungu nei, e ka kore oki te ua toka; kia kite oki koe e, no Iehova te enua nei.

30 Kua kite ra au, kare rai koe, e toou au tavini, e mataku i te Atua ra ia Iehova.

31 E kua paruparu te orongā e te kerite; kua ua oki te kerite, e kua tupu te orongā.

32 Kareka te sitona e te olura, kare ïa i paruparu; kare rai oki i tupu.

33 Kua aere mairā Mose ki vao i taua oire ra, mei mua mai ia Pharao ra, e tautopa iora ia Iehova; e kore akera te mangungu, e te ua toka, e te ua ra kare akera i topa mai ki runga i te enua nei.

34 E kite akerā Pharao e, kua kore te ua, ma te ua toka, e te mangungu, kua rave akaou rai aia it e ara, akapaketaketa atura i tona ngakau; koia, e tona katoa ra au tavini.

35 Mārokiakia atura oki te ngakau o Pharao, kare oki aia i tuku i te tamariki a Iseraela, mei ta Iehova rai oki i tuatua mai ia Mose ra.