Ezekiela

19 E RAVE oki koe i tetai aue anga i te ui ariki o Iseraela,

2 E karanga atu, Eaa to metua vaine? E liona tinana: kua moe aia ki raro i rotopu i te au liona, i rotopui te au liona ou, kua angai aia i tana anaunga.

3 Okotai oki ana punua i pakari iaia; e riro atura aia ei liona ou, e kua apii aia i te aō kai aere; kua pou te tangata iaia.

4 Kite akera te pa enua i tona rongo; i rauka iora aia ki roto i ta ratou vaarua, e kua arataki atura ratou iaia ma te pirianganaoa ki te enua ra ko Aiphiti.

5 E kite akera aia i tana tatari anga e, kua kore tana i manakonako ra, kua rave akera aia i tetai punua nana, akariro atura iaia ei liona ou.

6 Kua aaere ua iora aia, na rotopu i te au liona, riro atura aia ei liona ou, e kua apii aia i te aō kai aere; kua pou te tangata iaia.

7 E kua kite aia i to ratou au are ariki tanea, e kua pou to ratou au oire iaia; tanea atura te enua, e tona ki katoa ra, i te reo ngunguru nona ra.

8 Kua tamaki maira te au enua iaia e pini ua ake mei roto i te au matakeinanga ra, e kua totoa iora i ta ratou kupenga ki runga iaia: rauka iora aia i roto i ta ratou vaarua.

9 Kua tuku iora ratou iaia ki roto i te ngai tiaki anga ma te pirianganaoa, e kua arataki maira iaia ki te ariki o Babulonia: kua arataki atura ratou iaia ki roto i te au ngai ketaketa, kia kore tona reo kia kitea akaouia ki runga i te au maunga o Iseraela.

10 Kua tau toou metua vaine ki te vine mei ia koe rai te tu, i tanumia ki te pae vai, e ua maata tona, e te ki i te mangamanga, no te rai vai ra.

11 E rara ketaketa oki tona, ei sepeta no te aronga e tutara ra; e kua teitei aia ki runga ake i roto i te au rara nunui ra, e te teitei maira aia kia akaraia mai ma tona au rara e manganui.

12 I kiriti tumuia ra aia ma te riri otooto, kua uriia ki raro i te one, e kua marō tona ua i te maoake: kua aati oki te au rara ketaketa nona, e kua marō; kua pou ïa i te ai.

13 E teianei, kua tanumia aia i te medebara, i te enua marō, e te kaki vai.

14 E kua riro atu na te ai no roto i tetai rakau o te au rara nona ra, kua pou oki tona ua, e kare oki ona e rara ketaketa, ei sepeta e tutaraʼi ra. Ko taua aue anga teia, e ka riro ua atu oki ei aue anga.