Ezekiela

2 E KUA tuatua maira aia kiaku, E te tamaiti a te tangata na, tu ua mai to vaevae, e e karanga atu au kia koe.

2 E kua tomo maira te Vaerua ki roto iaku, iaia i tuatua mai kiaku ra, e kua akatu maira aia iaku i toku vaevae, e kua akarongo atura au iaia i tei tuatua mai kiaku ra.

3 E kua tuatua maira aia kiaku, E te tamaiti a te tangata na, te tono nei au ia koe ki te tamariki a Iseraela, ki te enua meameaau, tei meameaau mai iaku ra: ko ratou e to ratou ai metua tei ara iaku, e tae rava akenei ki teianei rā.

4 E puke tamariki uouomatoa oki ratou, e te ngakau ketaketa Te tono nei au ia koe kia ratou; e ka karanga atu koe kia ratou, Te na ko maira te Atu ra ko Iehova.

5 E ko ratou, to ratou akarongo anga, e te kore anga, (e ngutuare meameaau rai oki ratou,) e kite rai ratou e, e peroveta tei noo ana i rotopu ia ratou.

6 E ko koe, e te tamaiti a te tangata na, auraka e mataku atu ia ratou, auraka oki e mataku i ta ratou tuatua, tei ia koe oti te au rakau taratara e te tataramoa, e kua noo oti koe ki rotopu i te au sekopio: auraka e mataku i ta ratou tuatua, auraka oki e kakaravi i to ratou mata, e ngutuare meameaau rai oki ratou.

7 E ko taku nei au tuatua taau e karanga atu kia ratou, to ratou akarongo anga, e te kore anga: e aronga meameaau oki ratou.

8 Ko koe ra, e te tamaiti a te tangata na, e akarongo mai koe i taku e karanga atu kia koe nei; Auraka koe e meameaau, mei taua ngutuare meameaau nei: ka akaamama mai koe i to vaa, e ka kai i taku e o atu kia koe ra.

9 E i taku akara ua anga, e i na, e rima tei tukuia mai kiaku nei; e i na, e pokaikai tuatua tei roto;

10 E kua oora maira aia i te reira ki mua iaku nei; e kua tataia i roto e i vao: ko te evakaku, e te mii, e te aue, tei tataia i roto ra.