Ezekiela

12 KUA tae mairai oki te tuatua a Iehova kiaku nei, na ko maira,

2 E te tamaiti a te tangata na, te noo ra koe i rotopu i te ngutuare meameaau ra, e mata to ratou kia akara, e kare e akara; e taringa to ratou kia akarongo, e kare e akarongo: e ngutuare meameaau oki ratou.

3 E tenana, ko koe e te tamaiti a te tangata na, e akateateamamao i te apinga naau kia aere ra, ka aere ei koe i te ao nei ki mua i to ratou mata; ka akaruke ei koe i toou ra ngai, ka aere ei ki tetai ngai, ki mua i to ratou mata: peneiake ratou ko te akamanako, meameaau uaʼi taua ngutuare ra.

4 Ei reira oki koe e apai ei i taau ra apinga ei apinga peke i te ao nei ki mua i to ratou mata: ei te aiai koe e aere ei ki mua i to ratou mata, mei ia ratou tei riro ei tuikaa.

5 E ko koe i na roto i te patu ki mua i to ratou mata, ka na reiraʼi i te apai.

6 Ei mua i to ratou mata koe ka apai ei i to apinga i runga i to pakuivi, ei te kareureu anga ra koe ka apai ei: ka vaî koe i to mata, auraka koe kia kite i te one: kua akariro oki au ia koe ei akairo i te ngutuare o Iseraela.

7 E kua akapera au, mei tei akaueia mai au ra: kua apai au i taku apinga i te ao, mei te mea e ei apinga no te peke, e aiai akera, kua ko iora au na roto i te patu i toku rima; kua apai oki au i te kareureu anga ra, kua apai au na runga i te pakuivi i mua i to ratou mata.

8 E ao akera, kua tae maira te tuatua a Iehova kiaku nei, na ko maira,

9 E te tamaiti a te tangata na, kare ainei te ngutuare o Iseraela, te ngutuare meameaau ra, i tuatua mai kia koe e, Te aa ua ana koe?

10 E karanga atu koe kia ratou, Te na ko maira te Atu ra ko Iehova; Teianei apainga, no te ariki ïa no Ierusalema, e te ngutuare katoa o Iseraela i rotopu ia ratou ra.

11 E karanga atu, Ko au ta kotou akairo: mei taku i rave ra, e akaperaia mai ratou: e aere ïa ratou, e riro oki ratou ei tuikaa.

12 E na te ariki i rotopu ia ratou e apai na runga i te pakuivi i te kareureu anga, ka aere ei ki vao: ka ko ratou na roto i te patu, kia na reira i te apai ki vao: ka vaî aia i tona mata, kia kore e kite tona mata i te one.

13 E tuku oki au i taku kupenga ki runga iaia, e piritia oki aia i taku ereere: e e apai au iaia ki Babulonia, i te enua o te Kaledea; kare ra aia e kite i te reira, e mate ua atu rai aia i reira.

14 E te aronga katoa e topiri mai iaia ei tauturu, e te au motuanga katoa nona ra, naku ïa e akapueurikiriki ki te au matangi katoa ra; e naku e unui i te koke i murio ia ratou ra.

15 E kite oki ratou e ko Iehova au, kia akapueurikiriki au ia ratou ki roto i te au etene, e kia ruru au ia ratou ki roro i te pa enua ra.

16 E akatoe ra au i tetai pae o ratou kare e rainga, i te koke ra, i te onge ra, e i te maki-mate ra; kia akakite ratou i ta ratou au mea viivii ravarai i rotopu i te au etene ta ratou e aere ra; e kite oki ratou e ko Iehova au.

17 E kua tae maira oki te tuatua a Iehova kiaku nei, na ko maira,

18 E te tamaiti a te tangata na, ka kai koe i taau kai ma te ruketekete, e inu koe i taau vai ma te tumatetenga e te koiriria;

19 Ka karanga atu ei ki te au tangata o te enua nei, Te na ko maira te Atu ra ko Iehova i to Ierusalema, e i to te enua o Iseraela; E kai ratou i ta ratou kai ma te koiriria, e e inu i ta ratou vai ma te tumatetenga kia tanea to ratou enua, e auraka rava to roto ra, no te takinga-kino o te aronga katoa e noo i reira:

20 E te au oire tangata ra, e riro ïa i te tamoanaia, e riro oki te enua i te tanea; e kite oki kotou e ko Iehova au.

21 E kua tae maira te tuatua a Iehova kiaku nei, na ko maira,

22 E te tamaiti a te tangata na, eaa taua maseli na kotou na i te enua o Iseraela nei, i tei na koia ra e, Kua akaroaia te tuatau ra, e kua kore anake te au orama.

23 E tenana, e karanga atu koe kia ratou, Te na ko maira te Atu ra ko Iehova; E akakore au i taua maseli nei, kare oki ratou e rave akaou i te reira ei maseli i Iseraela nei; e karanga atu ra kia ratou, Te vaitata nei te tuatau, e te openga o te au orama ravarai.

24 Kare rava oki e kitea akaou te orama puapinga kore e te totouanga pikikaa, i roto i te ngutuare o Iseraela.

25 Ko au oki ko Iehova: naku e tuatua, e te tuatua taku e tuatua ra, ka tupu ïa; kare ïa e akaroa akaouia: ei to kotou nei oki au rā, e tera ra ngutuare meameaau e, e tuatuaʼi au i te tuatua, e naku e akatupu, te tuatua maira te Atu ra ko Iehova.

26 E kua tae maira oki te tuatua a Iehova kiaku nei, na ko maira,

27 E te tamaiti a te tangata na, I na, te tuatua nei te ngutuare o Iseraela, Te orama tana i kite ra, no te au rā ïa e manganui ua atu, e tei te mamao ke ra te tuatau tana e totou ra.

28 E tenana, e karanga atu kia ratou, Te na ko maira te Atu ra ko Iehova;; Kare tetai o taku nei au tuatua e akaroa akaouia, ko te tuatua ra taku e tuatua, e akatupuia ïa, te tuatua maira te Atu ra ko Iehova.