Ezekiela

23 KUA tae maira oki te tuatua a Iehova kiaku nei, na ko maira,

2 E te tamaiti a te tangata na, toko rua vaine, e puke tamaine na te metua vaine okotai ra:

3 Kua akaturi iora raua i Aiphiti; i to raua ou anga ra te akaturi anga, i reira te roromi anga i o raua puke u, e i reira ta ratou roromi anga i nga komata u o to raua paretenia anga.

4 E to raua ra puke ingoa, ko Ahola te tama mua, e ko Aholiba tona teina: naku oki raua, anau tama iora raua i te au tamaroa e te au tamaine. E to raua ingoa, ko Ahola, ko Samaria ïa, e ko Aholiba ra, ko Ierusalema ïa.

5 I te noo anga iaku ra kua akaturi iorā Ahola; e kua riro tona ngakau ki tana au tane inangaro ra, ki to Asura te au tangata tupu nona ra,

6 Ko tei kakau i te kakau kerekere, i te au rangatira, e te au tutara e au tangata ou taurekareka anake ïa, e au tangata oroenua e akaoro ki runga i te oroenua ra.

7 Kua akaturi iora aia ia ratou, ia ratou ravarai, te au tangata ikiia i to Asura ra, e tei riro tona ngakau ia ratou ra: kua viivii aia i to ratou au idolo ravarai.

8 Kare oki aia i akaruke i tana peu akaturi mei Aiphiti mai: kua moeia oki aia e ratou i tona ou anga, na ratou oki i roromi i nga u o tona paretenia anga, e kua maringi maira ta ratou peu akaturi ki runga iaia.

9 I tuku atu ei au iaia ki te rima o tana au tane inangaro, ki te rima o to Asura ra, tei riro tona ngakau ia ratou ra.

10 Na ratou i akakite i tona vai taaka ua anga: kua rave ratou i tana au tamaroa e tana au tamaine, e kua ta iora iaia ki te koke: tupu atura oki tona rongo i rotopu i te au vaine; no te mea kua akautunga ratou iaia.

11 Kite atura tona teina ko Aholiba, kua maata atura tona akakino anga iaia uaorai i tona inangaro tika kore i to tetai, e i taua ra au peu akaturi, kua maata ïa i ta tona ra tuakana au peu akaturi.

12 Riro atura tona ngakau ki to Asura, ki te au tangata tupu, e au rangatira, e te au tutara, ma te kakau akaieie maata, e au tangata oroenua, e akaoro ki runga i te au oroenua, e au tangata ou taurekareka anake ïa.

13 Kite atura au e kua viivii aia, kua arataa okotai raua ravarai.

14 Kua akamaata maira oki aia i tana peu akaturi: kia akara oki aia i te au tangata i te tata angaia ki runga i te patu, e au aite anga no te Kaledea i te tata angaia ki te muramura,

15 Ma te tatuaia te taukupu ki te tatua, ma te pare akaave ra ki runga i to ratou upoko, e ui ariki anake kia akara atu, mei to Babulonia e to Kaledea, to ratou enua i anauiaʼi ra:

16 E tei te akara anga i tona mata, riro atura tona ngakau kia ratou, kua unga atura aia i te au karere kia ratou ki Kaledea.

17 E kua aere maira to Babulonia kiaia ra, ki roto i te roi inangaro ra, e kua akaviivii ratou iaia ki ta ratou peu akaturi, e viivii atura aia ia ratou, e taka ke roa atura tona ngakau ia ratou.

18 E kua akakite aia i tana peu akaturi, e kua akakite i tona taaka ua anga: e kua taka ke atura oki taku ngakau iaia, mei taku ngakau oki i taka ke i tona tuakana ra.

19 Kua akamaata oki aia i tana akaturi anga, i te akamaara akaou anga i te au rā i te ou anga nona ra, iaia oki i akaturi aere i te enua ra i Aiphiti.

20 Kua riro oki tona ngakau ki ta ratou au tane, tei tau to ratou kiko ki te kiko asini, e to ratou eke ki te eke oroenua toa ra.

21 E teianei, ko koe i oki rua ki te kino o toou ou anga ra, ka roromi ei to Aiphiti i nga komata u noou, no nga u oki i toou ou anga ra.

22 E teianei, e Aholiba, te na ko maira te Atu ra ko Iehova, I na, e akatu au i taau au tane inangaro ki runga ei tamaki ia koe, i tei taka ke to ngakau ia ratou ra, e arataki mai au ia ratou ei tamaki ia koe e pini ua ake;

23 To Babulonia, e to Kaledea ravarai, ko Pekoda, e ko Soa, e ko Koa, e to Asura ravarai ma ratou katoa ra: e aronga ou taurekareka anake ïa ratou, e aronga rangatira, e te au tutara, e aronga pu maata e te rongonui, tei runga anake i te au oroenua te akaoro anga.

24 E aere mai ratou ki runga ia koe ma te taoonga tamaki, te kariota, e te au porotata ra, e ma te urupu tangata ra: te ka akonokono i te korare, e te paruru, e te pare-kotaa, ei tamaki ia koe e pini ua ake: e tuku oki au i te tuatua-tau ki mua ia ratou, e na ratou e akava ia koe i ta ratou ra akava anga.

25 E ariu au i taku vareae kia koe, e rave viviki mai oki ratou ia koe: e rave ke atu ratou i to putaiu, e nga taringa oou ra; e toou aronga i toe ra, ka inga ïa i te koke: e rave ratou i taau au tamaroa e taau au tamaine; e tei toe i oou ra, ka pou ïa i te ai.

26 E tatara ratou i oou kakau, e ka aō ratou i toou rakei memeitaki.

27 E akakore au i taau ra kanga maata ia koe ra, e taau ra peu akaturi no Aiphiti mai: kare oki koe e mānā i to mata kia ratou, e kare e manako akaou atu ia Aiphiti.

28 Te na ko maira te Atu ra ko Iehova; I na, e tuku atu au ia koe ki roto i te rima o te aronga i makitakitaia e koe ra, ki roto i te rima o te aronga i taka ke ei to ngakau ia ratou ra:

29 E rave ratou ia koe ma te riri, e rave anake oki ratou i taau i angaanga ra, ka vaoo taaka ua atu ei ia koe ma te kakau kore: e kitea uaia te taaka ua anga o taau au peu akaturi, e taau kanga ma taau au peu akaturi katoa ra.

30 E akapera atu ei au kia koe, no te mea kua aru koe i te au etene i te akaturi anga, no te mea kua viivii koe i to ratou au idolo.

31 Kua aere koe na te ara o to tuakana; no reira au ka tuku atu ei i tana kapu ki to rima.

32 Te na ko maira te Atu ra ko Iehova, E inu koe i te kapu a to tuakana, e mea oonu e te maata, e riro oki koe ei kata anga, e ei aviri anga; e mea ranea maata taua kapu ra.

33 E ki koe i te mea kona e te aue, i te kapu tumatetenga e te pou, i te kapu a to tuakana a Samaria.

34 E inu rava oki koe e ka mitimiti i te para, ka ngangau oki koe i te vaavaanga o te reira, e ka kiriti akaruke koe i oou uaorai puke u; ko au oki teia e tuatua nei, te tuatua maira te Atu ra ko Iehova.

35 E teianei, te na ko maira te Atu ra ko Iehova; No te mea kua akangaropoina koe iaku, e kua akaruke iaku i muri i to tua, e te tenana, e akakoromaki katoa koe i taau kanga, ma taau ra au peu akaturi.

36 Kua tuatua maira oki a Iehova kiaku, E te tamaiti a te tangata, ka akava ainei koe ia Ahola raua ko Aholiba? e akakite ua atu koe kia raua i ta raua au mea viivii;

37 No te mea kua akaturi raua, e toto oki tei to raua rima, e kua akaturi raua i to raua au idolo; e ta raua au tamaroa ta raua i anau iaku nei, ta raua ïa i tuku kia na roto i te ai ia ratou ra, kia pou rava.

38 Teia oki tetai mea ta raua i rave mai iaku: kua akaviivii raua i taku ngai-tapu i te rā okotai, e kua akakino i taku au sabati:

39 Kia oti oki ta raua au tamariki i te taia no to raua au idolo, kua aere maira raua ki roto i toku ngai-tapu i tauarā ra, kia viivii te reira; e i na, kua akapera raua i rotopu i taku are.

40 E mei reira oki, kua tiki raua i te tangata kia aere mai mei te ngai mamao mai, kua tonokia atu te karere kia ratou; e i na, kua aere mai ratou: no ratou koe i orei ei ia koe uaorai, kua amo i o mata ki te mati e kua akamanea ia koe uaorai ki te au mea manea,

41 E kua noo koe ki runga i te roi manea, ma te kaingakai kua oti i te ārikiriki ki muao, tei vaooia e koe taku atinga kakara e taku manongi ki rungao.

42 E tei iaia oki te reo o te urupu vareaau ua ra: e kua arataki katoaia mai te au tangata e manganui e to Sabea katoa no te medebara; ko tei tuku i te tapeka ki runga i o raua rima, e te korona manea ki runga i to raua mimiti.

43 Kua tuatua iora au kiaia ki tei pakari i te akaturi anga, E akaturi ainei ratou i teianei iaia nei, iaia nei rai?

44 Kua aere atu rai ratou ki roto iaia ra, mei te aronga kia aere ki roto i te vaine akaturi: kua pera ratou i te aere ki roto ia Ahola raua ko Aholiba, i nga vaine kanga ra.

45 E na te au tangata tuatua-tika e akava ia raua, mei te akava anga vaine akaturi ra; e mei te akava anga vaine akamaringi toto ra, e puke akaturi oki raua, e e toto tei to raua rima.

46 Te na ko maira te Atu ra ko Iehova; E arataki mai au i tetai urupu ki runga ia raua, e naku e oronga ia raua kia apai keia, e kia āruia.

47 E na taua urupu ra e peî ia raua ki te toka, e e tipupu ia raua ki te koke; e ta oki ratou i ta raua au tamaroa, e ta raua au tamaine, e taʼu oki i to raua au are ki te ai.

48 E e akakore rai au i te kanga i te enua nei, kia kite te au vaine ravarai e, auraka e aite i te kanga mei ta korua ra.

49 E tutaki mai ratou i ta korua kanga ki runga ia korua uaorai, e na korua rai e akakoromaki i te au ara a to korua au idolo: e kite oki kotou e, ko te Atu ra au ko Iehova.