Ezekiela
21 E KUA tae maira te tuatua a Iehova kiaku nei, na ko maira,
2 E te tamaiti a te tangata na, e anga i to mata ki te pae ki Ierusalema, ka tuku atu ei i taau tuatua ki te pae i te au ngai tapu ra, ka totou atu ei ki te enua o Iseraela nei,
3 Ka karanga atu ei ki te enua o Iseraela, Te na ko mairā Iehova; I na, kare au e tau ia koe, e ka unui au i taku koke i tona vaî, e ka tipu ke au i te aronga tuatua-tika e te aronga kino i roto ia koe na.
4 No te mea e tipu keia e au te aronga tuatua-tika e te aronga kino i roto ia koe na, e riro ei taku koke i unuiia i tona ra vaî, i te rave i te tangata ravarai, mei te pae i te apatonga e tae ua atu ki te pae i apatokerau:
5 E kite oki te tangata katoa e, kua unuiia e au, e Iehova, taku koke i roto i te vaî ra, kare rava e oki akaou ki reira.
6 Ko koe ra, e te tamaiti a te tangata na, ka ngengete ana ma te atiati to taukupu; e ma te aue maata, ka ngengete ei, ki mua i to ratou mata.
7 E riro oki, kia tuatua mai ratou kia koe ra, Eaa koe e ngengete uaʼi? e karanga atu koe, I tera ra rongo; no te mea te aere maira: e ngaevaeva te au ngakau katoa ra, e ngavarivari te au rima katoa ra, e rere a mate oki te au vaerua katoa ra, e paruparu oki te au turi katoa ra mei te vai ra: i na, te aere maira, e riro oki i te tupu, te tuatua maira te Atu ra ko Iehova.
8 Kua tae maira oki te tuatua a Iehova kiaku nei, na ko maira,
9 E te tamaiti a te tangata na, ka totou atu, e karanga atu, Te na ko mairā Iehova; Ka tuatua ana, E koke, e koke, kua akakinaia, e kua akakakāia:
10 Kua akakinaia kia maata tona pou; kua akakakāia kia kanapanapa mai: e tika ainei kia akarekareka tatou? kua akavaavaaia te sepeta a taku tamaiti, i te au rakau katoa ra.
11 Kua apaiia oki kia akakakāia, kia mou rimaia: kua akakinaia taua koke nei, e kua akakakāia, kia orongaia atu ki te rima o te ta.
12 Ka aue, e e kakaoa, e te tamaiti a te tangata na: e riro oki te reira ki runga i toku ra au tangata, ei runga i te ui ariki katoa o Iseraela: te matakutaku i te koke e riro ki runga i toku ra au tangata: e teianei, ka papaki ana i to ūā.
13 E timata anga oki teia, ka akapeea ra me kore e vaooia te sepeta akavaavaa? te tuatua maira te Atu ra ko Iehova.
14 E tenana, e te tamaiti a te tangata na, ka totou koe, ka pokarakaraʼi i oou rima, e kia tu toru te pokirua anga o te koke, te koke no te aronga i taia: te koke no te aronga nunui i taia, tei tae rava ki roto i to ratou au pia uuna.
15 Kia ngaevaeva to ratou ngakau, e kia maata to ratou pou, i tuku ei au i te keokeo koke ra ki to ratou katoa ra au ngutupa: aue! kua akakakāia, e kua akakinaia, ei ta.
16 Ka aere koe na te au arataa, ei te pae katau, e na te pae kaui, ei te ngai i angaia atu to mata na.
17 E pokarakara katoa au i oku rima, e e anga taku riri otooto iaku: ko au ko Iehova tei tuatua nei.
18 Kua tae maira oki te tuatua a Iehova kiaku nei, na ko maira,
19 E akataka katoa koe, e te tamaiti a te tangata na, i e rua ara, kia tae mai te koke a te ariki o Babulonia: no te enua okotai raua ravarai kia aere mai: ka akataka ana oki koe i tetai ngai, ei te manga anga o te ara e tae ei ki te oire akatakaʼi.
20 E akataka i tetai ara e tae mai ei te koke ki Raba ki o te tamariki a Amona, e ki Iuda i Ierusalema akaketaketaia ra.
21 Kua tu ua oki te ariki o Babulonia ki te manga anga o te ara ra, ka manga mai ei nga ara e rua ra, i te rave anga i te totou etene: kua ruru i te au kakao, kua ui ki te au tiki, kua akara oki ki te ate.
22 Tei tona rima katau te totou etene no Ierusalema, kia akataka i te aronga tutuki, kia tuatua te vaa i te tainga ra, kia akateitei i te reo ma te maeva, kia tuku oki te au tutuki ki nga ngutupa, ki akāū i te one, kia patu i te punanga.
23 E riro ra ia ratou mei te mea e, e totou pikikaa i to ratou mata, i te aronga i taputou i te taputou kia ratou ra: e riro ra aia i te akamaara i te ara, kia rauka ratou.
24 E teianei, te na ko maira te Atu ra ko Iehova; No te mea, kua maaraia to kotou kino, i ta kotou au ara i kitea ra, e te kitea ra ta kotou au ara i ta kotou au ravenga katoa; no te mea kua maaraia kotou, ka riro ua kotou i te rima.
25 E ko koe, e tenana kanga, te ariki kino i Iseraela nei, kua tae ki toou rā, te tuatau e akaoti ei i te kino.
26 Te na ko maira te Atu ra ko Iehova; Ka apai ke atu i te pare ariki, kiriti i te korona: ko teia, ka kore ia: ka akateitei i tei akaaka, e ka taakaaka i tei teitei.
27 Naku e taruri ke, taruri ke, taruri ke, i te reira, e ka kore roa ïa te reira, e kia tae mai aia ra te pu tikai ra; e naku e oronga atu nona.
28 E ko koe oki, e te tamaiti a te tangata na, ka totou koe, ka karanga atu, Te na ko maira te Atu ra ko Iehova i te ngati Amona, e ta ratou akakino; ka karanga atu oki koe, Te koke, te koke, kua unuiia: kua akakakāia ei ta, e ei akapou i te kanapanapa anga ra:
29 Te akara ra ratou i te mea puapinga kore ia koe ra, te kimi ra ratou i te pikikaa ia koe, ei tuku ia koe ki runga i te kaki o tei taia ra, o te aronga kino ra, tei tae to ratou rā, i te tuatau e akaoti ei te kino.
30 E akaoki te reira ki roto i tona vaî! ei te ngai i angaiaʼi koe ra, i te enua i anauiaʼi koe ra, e akava ei au ia koe ra.
31 E e riringi atu au i toku riri akaoko ki runga ia koe ra, e pupui atu au i te ai ra i toku riri otooto ki runga ia koe, ka tuku atu ei ia koe ki te rima o te au tangata taae, e te kite i te ta.
32 E riro koe ei vaie no te ai ra; ka vaoo ua to toto i rotopu i te enua ra; kare koe e maara akaouia: ko au oki ko Iehova e tuatua nei.