Ezekiela

10 KUA akara iora au, e i na, i roto i te reva i runga ake i te upoko o nga kerubi, te vai ua maira mei te toka saphiro i runga ake, mei te terono te tu i te arite anga.

2 E kua tuatua maira aia ki te tangata i kakau ki te orongā ra, na ko maira, Ka aere na rotopu i nga porotata ra, i raro ake i te kerubi, ka akaki ei i to rima ki te ngarau ka, i rotopu i nga kerubi ra, ka titiri aere ei na runga i te oire. Aere atura aia ki roto i mua i toku mata nei.

3 Te tu ua ra nga kerubi ki te pae katau i te are ra, ka aere ei taua tangata ra ki roto; e te ki ra te paepae i roto i te tumurangi ra.

4 E kua aere atura te kakā o Iehova mei te kerubi atu, i runga ake i te turuki o te are; kua ki oki te are i te tumurangi, kua ki oki te paepae i te inuinu o te kakā o Iehova.

5 E te aruru o nga peau o te au kerubi te rongoia ra ïa, e tae rava atura ki te paepae ki vao ra, mei te reo o te Mana katoatoa ra kia tuatua aia ra.

6 E riro atura oki, iaia i akaue i te tangata i kakau ki te orongā ra, ka na ko ei ra e, Ka rave i te ai i rotopu i nga porotata ra, i rotopu i nga kerubi; kua aere atura aia ki roto, e kua tu ua iora ki te pae o nga porotata ra.

7 E kua akatika iora tetai kerubi i tona rima i rotopu i nga kerubi ra, ki te ai i rotopu i nga kerubi, e kua rave iora, kua tuku akera ki te rima o tei kakau ki te orongā ra; kua rave iora aia, e aere atura ki vao.

8 E te kitea ra mei te rima tangata ra te tu to nga kerubi i raro ake i nga peau ra.

9 E iaku oki i akara ra, i na, e a katoa porotata tei te pae o nga kerubi, tetai porotata ki te pae o tetai kerubi, e tetai porotata ki te pae o tetai kerubi: e te tu o aua nga porotata ra, mei te toka berulo ra ïa.

10 E to ratou ra au tu, okotai rai o ratou ravarai tu e a ra, mei te mea e porotata tei roto i tetai porotata.

11 Kia aere ratou ra, kua na runga i nga pae katoa e a te aere; kare ratou i ariuriu kia aere, te ngai i akaraia e te upoko ra, kua aru anake ratou ki reira; kare ratou i ariu kia aere.

12 E to ratou kopapa katoa, e to ratou mokotua, e to ratou rima e to ratou au peau, e te au porotata, kua ki anake i te mata e pini ua ake, e nga porotata no ratou e a ra.

13 Kareka te au porotata ra, akarongo atura au i te kapiki kia ratou, E te porotata e!

14 Taki a anake rai mata to ratou katoa ra: tei muatangana iora mata, e mata kerubi ïa, e te rua o te mata, e mata tangata ïa, e te toru ra, e mata liona ïa, e te a ra, e mata aeto ïa.

15 E apaiia akera taua nga kerubi ra ki runga, Ko taua mea ora ra teia taku i kite i te vai ra i Kebara.

16 E kia aere iora te au kerubi, kua aere katoa te au porotata na vaitatao ia ratou: e kia totoa iora te au kerubi i to ratou au peau e rere ki runga i te enua nei, kare taua au porotata ra i taka, i vaitata iora.

17 Kia tu ua ratou ra, kua tu katoa teia: e kia marangaranga ratou ki runga, kua marangaranga katoa teia: tei roto oki ia ratou te vaerua o taua mea ora ra.

18 Aere ke atura te kakā o Iehova mei runga mai i te turuki are, tu ua iora ki runga i te au kerubi.

19 Kua totoa akera te au kerubi i to ratou au peau, e kua rere atura ki runga i te enua nei, ki mua i taku mata nei: e kia aere ratou ki vao, ko te au porotata katoa i vaitatao; e kua ta iora ki te pa o te ngutupa i te itinga o te rā i te are o Iehova; e te kakā o te Atua o Iseraela tei runga ake ia ratou.

20 Ko taua mea ora teia taku i kite i raro ake i te Atua o Iseraela i te pae vai ra ko Kebara; e kua kite oki au e kerubi ratou.

21 Taki a anake rai mata to ratou katoa ra, taki a anake oki peau; e te tu o nga rima o te tangata nei tei raro ake i to ratou au peau.

22 E te tu o to ratou au mata, ko nga mata rai ïa taku i kite i te vai ra i Kebara, ko to ratou ïa tu e ko ratou uaorai oki ïa: e aere tikaoru ua ratou katoa ra ki mua.