2 Samuela

7 TE NOO ra te ariki i roto i tona ra are, e kua oronga mai a Iehova i te au nona i te au enemi katoa nona e pini ua ake;

2 Kua karanga atura te ariki ki te peroveta ra kia Natana, Ka akara ana, te noo nei au i roto i te are arezi, kareka te aruna a te Atua, te vai nei i roto i te paruru.

3 E kua karanga aturā Natana ki te ariki, E aere, e rave i ta toou ngakau i anoano ra; tei ia koe oki a Iehova.

4 Kia tae ra ki te reira po, kua tae maira te tuatua a Iehova kia Natana, na ko maira,

5 Ka aere, ka karanga atu ki toku tavini kia Davida, Te na ko aturā Iehova, E akatu mairai koe i tetai are noku ei nooanga noku?

6 Kare rai oki au i noo i te are mei iaku rai i arataki mai i te tamariki a Iseraela mei Aiphiti mai, e tae rava akenei ki teianei rā; i aaere ua ra au na roto i te are kakau e na roto i te puakapa.

7 I te au ngai katoa ra taku i aaere ua e te au tamariki katoa a Iseraela, i tuatua ainei oki au ki tetai i te au kopu o Iseraela, i taku i akaue atu e tiaki i toku au tangata ia Iseraela, i karanga atu ainei oki au e, Eaa i kore ei kotou i akatu i tetai are arezi noku?

8 E teianei, e na ko atu koe ki toku tavini kia Davida, Te na ko mairā Iehova Sabaota, No ko koe i te koro mamoe ra i te rave angaia mai e au, i te aru aere anga i te au mamoe, ei tutara no rungao i toku nei au tangata ia Iseraela:

9 E i vaitata katoao au ia koe i toou au aerenga katoa, e kua tipu keia e au to au enemi katoa i mua ia koe, e naku oki i akariro i toou ingoa kia maata, mei te ingoa katoa o te aronga mamaata i te ao nei.

10 E akono oki au i tetai ngai no toku ra au tangata no Iseraela, e naku ratou e tanu, kia noo marie atu rai ratou i to ratou ngai tikai, kare oki ratou e peke akaou, kare oki te tamariki kikino e taeko akaou mai ia ratou, mei tei muatangana ra,

11 Mei te tuatau mairai i akono ei au i te aronga akava no rungao i toku au tangata ia Iseraela, e i oronga oki au kia koe ra kia noo ua koe i toou au enemi katoa ra. Te akakite atu nei oki a Iehova kia koe e, na Iehova e patu i to are na.

12 Kia ope oki toou ra au rā, e kia moe katoa koe e oou puke metua, ka akatu ei au i toou uanga i muri ake ia koe ra, no toou uaorai kopu, e naku e akamou i tona au.

13 Nana e akatu i tetai are no toku nei ingoa, e naku e akatinamou i te terono o tona basileia e tuatau ua atu.

14 Ei metua au nona, e ei tamaiti aia naku. Kia rave aia i te ara ra, naku aia e ako atu ki te pāpā tangata nei, mei tei pāpāia i te tamariki a te tangata nei:

15 Kareka i toku nei aroa, kare rava ïa au e kiriti takiri atu i te reira iaia, mei iaku i kiriti atu i te reira ia Saula, i taku i tuku ke atu i mua ia koe ra.

16 E toou are e toou basileia, ka mou ïa ki mua ia koe ra e tuatau ua atu: toou terono, ka mou ïa e tuatau ua atu.

17 Ko teia katoa nei au tuatua, e teia katoa nei orama, ko ta Natana i tuatua kia Davida.

18 Aere atura te ariki ra ko Davida ki roto, e kua noo ki mua ia Iehova, e kua tuatua akera, Koai au nei, e taku Atu e Iehova e, eaa oki toku nei ngutuare, i arataki mai ei koe iaku i teia noaʼi?

19 E mei te mea oki, e iti rai te reira ia koe, e taku Atu e Iehova, kua tuatua mairai oki koe i te are o to tavini e a muri roa atu. Ko ta te tangata nei ainei ïa peu, e taku Atu e Iehova?

20 E akapeea atu rai ta Davida tuatua kia koe ra? kua kite oki koe, e taku Atu e Iehova, i to tavini nei.

21 No taau ra tuatua, e no toou uaorai ngakau, i rave ei koe i teianei mea mamaata, i taau oki i akakite mai ki to tavini nei.

22 E teianei, e maata koe, e te Atua e Iehova: kare oki oou e aite, kare atu oki e Atua ko koe anake ra, ta matou uaorai i rongo i to matou taringa.

23 Koai oki ïa enua i te ao nei, e tau ki toou na au tangata, kia Iseraela nei, tei tikiia e te Atua ei akaora ei tangata nona uaorai, e ei akamaata i tona ra ingoa, ei rave oki i te au peu mamaata e te mataku no ratou, no toou ra enua, na mua i to au tangata na, i tei okoia e koe noou uaorai, mei Aiphiti maira, i te pa enua e to ratou au atua katoa ra.

24 Kua akamouia oki e koe to au tangata na ko Iseraela, ei tangata noou e tuatau ua atu: e kua riro oki koe, e Iehova, ei Atua no ratou.

25 E teianei, e te Atua e Iehova, ko te tuatua i karangaia e koe i to tavini nei, e i tona ngutuare, e akatinamou ravaia e tuatau ua atu, e rave oki i taau i tuatua io nei.

26 Kia akamaataia oki toou ingoa e tuatau ua atu, kia tuatuaia e, Ko Iehova Sabaota, ko te Atua ïa no Iseraela: e kia akatinamouia te ngutuare o to tavini o Davida ki mua ia koe na.

27 Kua akakite mai oki koe, e Iehova Sabaota, te Atua no Iseraela, ki to tavini nei, kua tuatua mai e, E patu au i to are: i tikaʼi oki i te ngakau o to tavini nei kia pure ia koe i teianei pure.

28 E teianei, e taku Atu e Iehova, ko koe anake te Atua, e tuatua-mou oki taau tuatua, e kua akakite mai oki koe i teianei meitaki ki to tavini nei:

29 E teianei, kia tika ia koe ra, e akameitaki mai i te are o to tavini nei, kia vai marie rai ki mua ia koe e tuatau ua atu: ko koe oki, e taku Atu e Iehova, tei tuatua mai: e kia meitaki rai te are o to tavini, i te meitaki no ko mai ia koe ra, e tuatau ua atu.