Ezekiela

29 I TE mataiti okotai ngauru ra, i te ngauru o te marama, e te ngauru ma rua o te rā o tana marama ra, i tae mai ei te tuatua a Iehova kiaku nei, na ko maira,

2 E te tamaiti a te tangata na, ka anga koe i to mata ki te ariki o Aiphiti ia Pharao, e ka totou atu iaia, e i to Aiphiti katoatoa ra:

3 E tuatua, e e karanga atu, Te na ko maira te Atu ra ko Iehova; I na, kare au e tau ia koe, e te ariki o Aiphiti, e Pharao, i te taae maata e moe i raro i tona au kauvai, i tei karanga ra e, Noku uaorai toku kauvai, naku oki i anga noku uaorai.

4 E tuikau au i etai matau ki roto i to tanga ra, e naku e tapiri mai i te au ika o to au kauvai ra ki runga i to au poa, e e takitaki mai au ia koe ki runga mei raro mai i to au kauvai ra, e piri oki te au ika ravarai o to au kauvai ra ki runga i to au poa ra.

5 E naku koe e akaruke ki te medebara, ko koe e te au ika katoa no to au kauvai ra; ka inga koe ki te au ngai atea ra, kare koe e apaiia ki te ngai okotai, e kare e akaputuia: kua oronga au ia koe ei kai na te au puaka o te enua nei, e na te au manu o te rangi.

6 E kite oki to Aiphiti ravarai ra e ko Iehova au, no te mea kua riro ratou ei tokotoko kakao ki te ngutuare o Iseraela.

7 Ka rave ei ratou i to rima, aati iora koe, e motu atura to ratou pakuivi katoa; e ia ratou i irinaki ki runga ia koe, piko iora koe, ngaoi atura to ratou taukupu katoa ia koe.

8 E teianei, te na ko maira te Atu ra ko Iehova: I na, e apai mai au i te koke ki runga ia koe, e ka tipu ke atu au i te tangata e te puaka i roto ia koe ra.

9 Ka riro oki te enua ra ko Aiphiti i te tanea e te pou; e kite oki ratou e ko Iehova au: no te mea kua karanga aia e, Noku te kauvai, naku i anga.

10 E teianei, i na, kare au e tau ia koe, e to aronga kauvai e ka akatanea takiri au i te enua ra ko Aiphiti e kia pou rava, mei te punanga o Siene e tae ua atu ki te kotinga o Kusa ra.

11 Kare rava e vaevae tangata e tae na roto i te reira ra, e kare te vaevae puaka e tae na roto i te reira, kare oki e tangataia e kia a ngauru ua atu i te mataiti.

12 E akatanea au i te enua ia Aiphiti i roto i te au enua i tanea katoa ra, e tona au oire i roto i te au oire i pou katoa ra, e kia a rava atu i te ngauru i te mataiti i te tanea anga: e akangaoro aere atu au i to Aiphiti ki te au enua, e e akapueurikiriki ke au ia ratou na te pa enua ra.

13 Te na ko maira te Atu ra ko Iehova; Kia ope aua nga mataiti e a ngauru ra, e akaputuputu mai ei au i to Aiphiti, mei roto i te au tangata i pueurikiriki ke ei ratou ra.

14 E naku e arataki akaou mai i to Aiphiti i tuikaa ra, e ka akaoki mai au ia ratou ki te enua o Patarosa, ki te enua i anauiaʼi ratou ra; e ka riro ratou ei basileia akaaka i reira.

15 Ka tu ke te reira i te akaaka i te au basileia katoa ra, kare oki te reira e akateitei akaou iaia uaorai ki runga i te au enua ra: naku oki ratou e akaiti, kia kore ratou e tutara akaou ki runga i te au enua.

16 Kare oki te reira e riro akaou ei irinaki anga no te ngutuare ra no Iseraela, i te akatupu anga i te manako i ta ratou ara, kia aru mai ratou ia ratou ra: e kite ra ratou e, ko au te Atu ra ko Iehova.

17 E tae akera ki te takau ma itu o te mataiti, i te marama muatangana ra, i te rā tai oki o taua marama ra, i tae mai ei te tuatua a Iehova kiaku nei, na ko maira,

18 E te tamaiti a te tangata na, e angaanga maata ta te ariki o Babulonia ta Nebukanesa i akaue ki tona nuku e rave ia Turia ra, kare e mimiti toe i te pakiko, kare e pakuivi toe i te pakikokiko: kare ra ana ma tona nuku katoa e tutaki i rauka ia Turia ra, i te angaanga tana i rave i reira.

19 E teianei, te na ko maira te Atu ra ko Iehova, I na, e oronga atu au i te enua ra ia Aiphiti ki te ariki o Babulonia kia Nebukanesa; e ka rave aia i tona tini, ka āru oki aia i tana apinga, e ka noni aia i tana noninga; ei tutaki te reira i tona ra nuku.

20 Kua oronga au i te enua ra ko Aiphiti nona, no tana angaanga tana i tauta, no te mea naku ta ratou i rave ra, te tuatua maira te Atu ra ko Iehova.

21 I taua rā ra e akatupu au i te tara o te ngutuare o Iseraela, e naku e o atu kia koe i te vaa amama i rotopu ia ratou; e kite oki ratou e ko Iehova au.