1 Samuela

31 KUA tamaki maira te Philiseti ia Iseraela; ati atura to Iseraela i te Philiseti, tarava ua iora ki runga i te maunga ra ko Gilaboa, kua mate rava.

2 Kua aru viviki atura te Philiseti ia Saula ma nga tamariki ana; kua ta iora te Philiseti ia Ionatana, e ko Abinadaba, e ko Malekisua, ko nga tamariki a Saula.

3 Riro atura te tamaki ia Saula, e ka tu aia i te aronga akainana kakao; e puta maata tona i taua aronga akainana kakao ra.

4 Kua karanga aturā Saula ki te apai taoonga tamaki nana ra, Ka unui ana i te koke naau ra, e ko mai iaku e kia mama rava; ko te aere mai aea teianei aronga peritome koreia, ko te ko mai aea iaku e mama rava, e ko te takinga-kino mai aea iaku. Kare akera i tika i taua apai taoonga tamaki nana ra; kua maata rava oki tona mataku. Kua rave iorā Saula i te koke, e kua akainga ua iora aia ki rungao.

5 E kia akara maira taua apai taoonga nana ra, e kua mate a Saula, kua akainga ua iora aia ki rungao i tana koke, mate katoa iora.

6 Mate iorā Saula, e nga tamariki nana toko toru, e te tangata i apai i te taoonga tamaki nana, e te au tangata katoa nona, i taua rā ra.

7 E kite maira to Iseraela i tetai pae i te o ra o Iezereela e to tetai pae i Ioridana, e kua oro to Iseraela, e kua mate a Saula e ana puke tamariki, kua akaruke ratou i te au oire, e kua oro; e kua aere maira te Philiseti, kua noo iora ki roto.

8 E ao akera, kia aere mai te Philiseti e tatara i te kakau o te aronga i mate ra, kua kitea e ratou a Saula, e nga tamariki toko toru ana, kua mate i runga i te maunga ra ko Gilaboa.

9 Kua tipu maira ratou i tona mimiti, e kua taratara i tona kakau tamaki, e kua tono i te karere e pini ua ake taua enua o te Philiseti ra, e akakite aere ki roto i te are o to ratou au idolo, e ki o te tangata katoa ra.

10 Kua tuku iora ratou i te taoonga tamaki nana ra ki roto i te are o Asetoreta; e kua patiti i tona kopapa ki runga i te patu ra i Bete-sani.

11 Kite akera to Iabesa-gileada i ta te Philiseti i rave ia Saula ra,

12 Kua tu akera te aronga toa katoa, aere anake iora e ao ua ake, kua rave maira i te kopapa o Saula, e nga kopapa o nga tamariki ana, no runga i te patu ra i Bete-sani, e kua aere maira ki Iabesa, e kua tutungi ki te ai i reira.

13 Kua rave iora ratou i to ratou au ivi, e kua tanu iora ki raro ake i tetai rakau i Iabesa, kua akakore iora ratou i te kai e po itu.