Numero
24 E KITE akerā Balaama e, e akaora ta Iehova ia Iseraela, kare akera aia i aere mei tei muatangana ra, e kimi i te ravenga purepure, kua ariu akera ra aia i tona mata ki te medebara ra.
2 Kua nānā akerā Balaama i tona mata ki runga, kite atura ia Iseraela i te puakapa anga, ko te kopu ko tona ngai; e kua aere maira te Vaerua o te Atua ki rungao iaia;
3 Kua tuku atura i tana maseli, karanga atura, Te tuatua nei a Balaama te tamaiti a Beora, ko te tangata mata puera teia e tuatua nei; 4 Ko tei akarongo i te tuatua a te Atua teia e tuatua nei; ko tei kite i te orama o te Mana katoatoa ra; tei tareuia mai, te puera ua maira te mata:
5 Ko te manea o to au puakapa, e Iakoba e! e to au puakapa, e Iseraela e! 6 Mei te ngai mataataa i te oora angaia; mei te kainga i te pae vai ra, mei te aloe i tanumia e Iehova ra; mei te arezi i te pae o te vai ra.
7 Ka taʼe mai te vai no roto mai i te āriki a Iakoba, e ka riro tona uanga mei te muriavai e manganui ra; e teitei maata atu to ratou ariki ia Agaga, e tona basileia e maata rava atu ïa. 8 Ko te Atua, ko tei arataki mai iaia mei Aiphiti maira; mei te ririnui reema ra tona; ko te pa enua ra, ko tona au enemi ra, ka pou ïa iaia; e ka ungaungātiti to ratou au ivi; e ka tu ratou e mama rave i tona au kakao.
9 Ka akaopuku aia, e moe oki ki raro mei te liona ra, e mei te liona tinana ra; naai aia e akaara atu? Ko te akameitaki atu ia koe ra, kia akameitakiia ratou, e ko te taumaa atu ia koe ra, kia taumaaia ratou.
10 Tupu akera to Balaka riri ia Balaama, e kua pakipaki ua akera i tona uaorai rima; e kua tuatua mairā Balaka kia Balaama ra, I tiki atu ana oki au ia koe e taumaa i toku nei au enemi, e i na, ka toru akenei oou akaora anga ia ratou i teianei.
11 E tenana, ka aere koe ki o ou ra, i manako oki au e akamana roa atu ia koe; kua tāpu ra Iehova ia koe, auraka kia akangateiteiia.
12 Kua karanga aturā Balaama kia Balaka, Kare ainei au i karanga atu ki to au karere, taau i tono mai kiaku, i te na ko anga e,
13 Oronga ua mai a Balaka i te ario e te auro e kia ki ua atu tona are, kare rai e tika iaku kia tuatua, mari ra ko ta Iehova e tuatua maira, kare e tika ta toku uaorai ngakau kia rave i te meitaki e te kino; ko ta Iehova ra e tuatua maira, ko taku ïa e tuatua? 14 E teianei, i na, teia au ka aere ki oku ra, aere mai, e akakite atu au kia koe i ta teianei aronga e rave i toou ra au tangata i te au rā a muri atu.
15 E kua tuku atura aia i tana maseli, karanga atura, Te tuatua nei a Balaama te tamaiti a Beora, ko te tangata mata puera teia e tuatua nei;
16 Ko tei akarongo i te tuatua a te Atua teia e tuatua nei, e tei kitea e Tei Teitei ra ko tana ïa i kite, ko tei kite i te orama a te Mana katoatoa ra, ko tei tareuia mai, te puera ua maira te mata:
17 Te kite nei au iaia, kare ra e tupu vave: te akara nei au iaia, kare ra i te mea vaitata; e Etu te ka tae mai mei ko ia Iakoba ra, e ka tupu tetai Sepeta i Iseraela, ko te ka ta i nga pae o Moabi ra; e ka akapou i te tamariki ravarai a Seta ra. 18 E riro oki a Edoma ei tuanga nana, e tona enemi ko Seira ka riro katoa ei tuanga nana; ko Iseraela oki te maata i te ririnui. 19 Ka riro te au ki to Iakoba, ka pou oki iaia tei toe i te oire ra.
20 E tona akara anga ia Amaleka ra, kua tuku atura aia i tana maseli, karanga atura, Ko mua ïa Amaleka i te pa enua: ko tona uanga ka pou takiri ïa.
21 Kua akara atura oki aia i te ngati Keni ra, e kua tuku atura i tana maseli, karanga atura, E nooanga ketaketa toou, e kua apai koe i to koanga ki roto i te mato.
22 Ka pou ra taua ngati Keni ra: e te openga ra, ka apai tuikaaia koe e Asura ra.
23 E kua tuku atura aia i tana maseli, karanga atura, Aue! koai te ka ora kia akatupu te Atua i teia?
24 E au pai te ka tere mai mei te enua maira mei Kitima, e rave kino ratou ia Asura, e rave kino oki ratou ia Ebera; e ope katoa ra ratou uaorai i te mate. 25 Tu iorā Balaama, aere atura e oki ki tona ngai: e aere atura oki a Balaka i tona aerenga.