Ieremia

6 E ATI kotou, e te au tamariki a Beniamina, mei rotopu atu i Ierusalema, ei Tekoa akatangi ei i te pu, ei Bete-akerema taʼu ei i te ai ei akairo: kua kitea oki te kino i te aerenga mai mei apatokerau mai, e pou maata ua atu.

2 E akapou au i te tamaine a Ziona, te vaine purotu e te piritumarae.

3 E aere mai te au tiaki, ma ta ratou au anana, kiaia ra; ka patia ratou i te au are puakapa e pini ua ake iaia ra; ka angai aere ratou ki tona ngai ki tona ngai.

4 E akateateamamao kotou i te tamaki iaia; e tu, ka taki aere tatou ki runga i te avatea nei; aue oki tatou e! kua taa oki te rā, kua roroa oki te ata aiai nei.

5 Ka tu, ka taki aere tatou i te po, tatou e vavaʼi i tona au are ariki ra.

6 Kua na ko mai oki a Iehova Sabaota, Ka tipu kotou i te au rakau; e akaū atu i tetai ngai teitei ia Ierusalema: ko te oire teia te ka tutakiia; tei roto oki iaia te au takinga-kino ravarai.

7 Mei te punavai e pupui ua mai i tona vai, kua pera aia i tona kino i te pupui ua mai anga: ko te takinga-kino e te āru tei akarongoia i roto iaia ra; ko te mamae, e te pāpā, tei mua ïa i toku aroaro nei kare i tukumoe.

8 E āriki mai koe i te ako, e Ierusalema e, ko te taka ke aea toku Vaerua ia koe; ko te akatanea aea au ia koe, ei enua noo koreia.

9 Te na ko mairā Iehova Sabaota; e aki takiri ratou i te totoenga o Iseraela mei te vine; ka akaoki mai i to rima, mei te tangata aki vine, ki te au kete ra.

10 Koai taku e tuatua, e taku e ako atu, kia akarongo mai ratou? i na, kua peritome koreia to ratou taringa, kare oki e tika ia ratou i te akarongo mai: i na, e mea akakinoia na ratou te tuatua a Iehova; kare ratou e rekareka i te reira.

11 I ki roaʼi au i te riri otooto o Iehova; kua roiroi au i te tāpu ua anga: e riringi atu au ki runga i te au tamariki i te au ngai atea, e ki runga i te uipa anga o te au tangata ou katoa ra: e riro oki te tane ma te vaine katoa, te tangata metua, e tei ope rava tona au rā.

12 E e riro to ratou au are ia etai ke, te au kainga e te au vaine katoa; ka akatika atu oki au i toku rima ki runga ia ratou e noo i te enua, te tuatua mairā Iehova.

13 Mei tei iti oki i o ratou e tae ua atu ki tei nunui i o ratou, kua ope roa ki te morimori apinga; e mei te peroveta e tae ua atu ki te taunga, kua rave anake i te mea pikikaa.

14 E kua akaora pakiri ua ratou i te paruparu o te tamaine a toku iti-tangata, i te na ko anga e, Ei au, ei au; e kare ua e au.

15 I akama ainei ratou ka rave ei ratou i te mea viivii ra? kare, kare takiri ratou i akama; kare ratou i kite i te akama: E teianei e inga ratou ma te aronga i inga ra: i te tuatau e tutakiia atu ei ratou e au, e oparaia ïa ratou ki raro te tuatua mairā Iehova.

16 Te na ko mairā Iehova, Ka tu ua kotou ki te au arataa, ka akaraʼi; ka ui ei ki te au arataa taito ra, i te ara meitaki, e kia na reira te aere, e kitea ia kotou te akaangaroianga no to kotou vaerua. Kua tuatua iora ra ratou, Kare matou e na reira.

17 Kua tuku oki au i tetai aronga tiaki ki rungao ia kotou, i te na ko anga e, Ka akarongo mai na i te tangi o te pu. Kua tuatua iora ra ratou, Kare matou e akarongo atu.

18 E teianei, ka akarongo mai, e te pa enua, e kia kite, e tenana uipa anga, i te au mea i rotopu ia ratou.

19 Ka akarongo mai, e te enua e; i na, e apai mai au i te kino ki rungao i teianei iti-tangata, te ua oki o to ratou uaorai manako anga; kare oki ratou i akarongo mai i taku tuatua, e taku nei ture, kua akaruke ra i te reira.

20 Eaa te puapinga o te rakau kakara i riro mai kiaku nei mei Seba mai, e te to venemene mei te enua mamao mai? ta kotou au atinga karakaratio, kare ïa e tau, e kare ua au e rekareka i ta kotou au atinga.

21 I na ko mai ei oki a Iehova, I na, e tuku au i te tukiaanga ki mua i teianei au tangata, e ka tukia te au metua ma te au tamariki i te reira; ko okotai rai matenga o te tangata tupu ma tona oa.

22 Te na ko mairā Iehova, I na, te aere maira tetai aronga tangata mei te enua mai i apatokerau, e enua maata oki te ka akauia mai mei te openga mai o te enua nei;

23 E mou ratou i te ana ma te tao; e taae ratou, kare e tangi; e aruru to ratou reo mei te tai ra; na runga anake mai ratou i te oroenua mei te kau toa i tupati marie; ei tamaki mai ia koe, e te tamaine a Ziona e.

24 Ko te rongo anake ra tei akarongoia e tatou, kua parukaua to tatou rima; kua rokoia e te tumatetenga, mei to te vaine e anau ra te mamae.

25 Auraka e aere ki te kainga, e aua e aaere na te arataa ra; no te mea e koke to te enemi e e mataku e pini ua ake.

26 E te tamaine a taku iti-tangata e; ka kakau ana koe ki te kakau paoa ka akatakaviri ei ki raro i te reu ai: ka aue ei mei te aue tamaiti okotai ra, ei aue mamae maata tikai ra: ka tae viviki mai oki te āru ki runga ia tatou.

27 Kua akariro au ia koe ei timata, e ei tutaka i rotopu i toku iti-tangata, kia kite oki koe, e kia timataia to ratou aerenga.

28 E aronga akatitima kino anake ratou, i te monomono korero aere anga: e veo ua e te auri; e aronga takinokino ratou ravarai:

29 Kua ka te pupui; kua pou te manga tapou i te ai. E puapinga kore ta te tamā kia tamā; kare oki te aronga kino i akataka keia ra.

30 E ario akarukeia, ko ta ratou ïa e tapa ia ratou, kua akarukeia oki ratou e Iehova.