Zekaria

12 TE totou ra i te tuatua a Iehova ia Iseraela; Te tuatua mairā Iehova, ko tei oora i te au rangi, e ko tei akamou i te au tumu o te enua, e ko tei anga i te vaerua tangata i roto iaia ra:

2 I na, e akariro au ia Ierusalema ei kapu rurutakina i te au tangata katoa e pini ua ake; e ka pera rai oki Iuda, ka akapiniiaʼi Ierusalema.

3 E i taua rā ra e akariro ei au ia Ierusalema ei toka teiaa na te au tangata katoa ra, e e tipupuia te aronga ravarai e akateiiaa ia ratou uaorai ki te reira: e akaputuputuia maira te au tangata katoa o te ao nei e tamaki i te reira.

4 I taua rā ra, te tuatua mairā Iehova, e ta ai au i te au oroenua katoa ki te mataku, e tei noo i rungao ra ki te neneva; ei runga ra i te ngutuare o Iuda e akapuera atu ei au i oku mata, e te au oroenua katoa a te tangata ra e taia e au ki te matapo.

5 E tuatua oki te au tutara i Iuda ra i roto i to ratou ngakau, E maroiroi toku i to tei noo i Ierusalema i to ratou Atua, ia Iehova Sabaota ra.

6 I taua rā ra e akariro ei au i te au tutara i Iuda mei te paakiumu i roto i te vaie ra, e mei te rama ai i roto i te ruru sitona; e e pou te au tangata katoa ia ratou e pini ua ake, i te pae katau e te pae kaui, e e tangataia Ierusalema i tona uaorai ngai, koia i Ierusalema.

7 E ka na mua anā Iehova i te akaora i te au puakapa o Iuda, kia kore te kakā o te ngutuare o Davida e te kakā o to Ierusalema e maata i to Iuda.

8 I taua rā ra e akaruru ei a Iehova i to Ierusalema, e tei akapikepike i roto ia ratou i taua ra ra, e riro ïa mei ia Davida, e te ngutuare o Davida, e riro ïa mei te Atua, mei te Angela a Iehova ki mua ia ratou ra.

9 E i taua rā ra e aruaru ei au kia pou te pa enua katoa, tei aere mai e tamaki ia Ierusalema ra.

10 E naku e riringi atu ki runga i te ngutuare o Davida, e ki runga i to Ierusalema, i te vaerua aroa e te pati; e ka akara mai ratou kiaku i ta ratou i ko ra, e ka aue ratou iaia, mei tei aue i te tamaiti okotai ra, e ka mamae maata iaia, mei tei mamae i te tama mua ra.

11 E aue maata tei Ierusalema i taua rā ra, mei te aue i Hadada-rimona i te o ra i Megidona.

12 E e aue taua enua ra, kia taka ke te au kopapa katoa ra; te kopu o te ngutuare o Davida kia taka ke, e ta ratou au vaine kia taka ke; te kopu o te ngutuare o Natana kia taka ke, e ta ratou au vaine kia taka ke;

13 Te kopu o te ngutuare o Levi kia taka ke, e ta ratou au vaine kia taka ke; te kopu o Simei kia taka ke, e ta ratou au vaine kia taka ke;

14 Te au kopu ravarai i toe ra, kia taka ke te au kopu katoa, e ta ratou au vaine kia taka ke.