Zekaria

5 E KUA nānā akaou atura au i taku mata, e kua akara, e i na, e pokaikai tuatua, te rere ra.

2 E kua tuatua maira aia kiaku, Eaa taau e akara na? E kua karanga atura au, Te akara nei au i tetai pokaikai tuatua i te rere anga; okotai taku kubiti i te roa; okotai ngauru kubiti i te pararauare.

3 Kua tuatua maira aia kiaku, Ko taua taumaa ra teia e riro nei na runga i te tua o te enua katoa nei: ko te aronga ravarai oki e keia ra, e tipu keia ïa i teia pae, mei tei tataia i reira ra; e te aronga ravarai oki e tao ra, e tipu keia ïa i tera pae, mei te reira rai.

4 Naku te reira e akatupu, te tuatua mairā Iehova Sabaota ra, e e tomo te reira ki roto i te are o te tangata keia, e ki roto i te are o te tangata taputou pikikaa i toku nei ingoa; e ka vai tamou rai ki rotopu tikai i tona are, e akapou oki te reira, te rakau ma te au toka katoa.

5 Kua aere maira i reira te angela i tuatua mai iaku ra, e kua na ko maira kiaku ra, Ka nānā ana i to mata i tenana, ka akara, eaa tera ra mea i aere iora.

6 E kua karanga atura au, Eaa ra ïa? E kua tuatua maira aia, E epha tera e aere iora. Kua tuatua mairai oki aia, Ko to ratou tu teia i te enua katoa nei.

7 E i na, i apaiia akera tetai tapanga tapou punupunu ra, e te reira tetai vaine te noo ra ki roto i taua epha ra.

8 E kua tuatua maira aia, Ko te kino teia. E kua uri atura aia iaia ki raro ki rotopu i taua epha ra, e kua uri akera aia i taua toka tapou ra ki runga i te vaa o te reira.

9 Kua nānā akera au i taku mata ki runga i reira ra, akara atura, e i na, e puke vaine toko rua te riro atura, e tei roto te matangi i to raua ra peau, e peau oki to raua mei te peau o te kotuku; e maranga akera ia rana taua epha ra ki runga i te mareva i te rangi e te enua.

10 Kua karanga atura au i reira ki te angela i tuatua mai iaku ra, E apai raua i te epha nei kiea?

11 E kua tuatua maira aia kiaku, E akatu i tetai are no te reira ki te enua ra ki Sinara, e akatinamouia oki te reira, e ka tuku marieia oki ki tona turanga i reira.