2 Paraleipomeno

9 E KITE akera te ariki vaine i Seba i te rongo ia Solomona, kua aere maira aia e ui ia Solomona i te tuatua pikipiki ki Ierusalema, e ma te urupu maata rava; ma te kamela i te apai anga mai i te rakau kakara, e te auro maata ua atu, e te toka memeitaki: e tae atura aia kia Solomona ra, kua karangaranga atura aia iaia i te au tuatua ravarai i roto i tona ngakau.

2 E kua matara maira ia Solomona te au mea ravarai tana i ui maira: kare rava ana tuatua ngaro ia Solomona tei kore i akakiteia atu kiaia.

3 E kite akera taua ariki vaine i Seba ra i to Solomona pakari, e te are i akatuia e ia,

4 E te kai i tana rai kaingaikai, e te nonoo anga o tona au tavini, e te tu anga o te aronga e piri kiaia ra, e to ratou kakau, e te aronga apai kapu nona, e to ratou kakau; e te kakenga nona i aere ei aia ki runga ki te are o Iehova; kare atura e vaerua o roto iaia.

5 Kua karanga atura aia ki te ariki, E tuatua-mou rai taku i rongo i toku ra enua, i taau ravenga e toou pakari.

6 Kare ra au i akarongo i ta ratou au tuatua, e kia tae maira au, e kite pu akenei oku mata nei: e i na, kare rai te afa o toou pakari i akakiteia mai kiaku nei; kua maata rai koe i tei akarongoia e au ra.

7 E ao to te au tangata noau nei, e ao to teia au tavini noou, e tu ua rai i vaitata ia koe nei, ka akarongo ei i te tuatua pakari naau ra.

8 Kia akameitakiia to Atua, ko Iehova, ko tei mataora mai ia koe, e kua akanoo ia koe ki runga i tona terono ei ariki na to Atua na Iehova. No te mea kua aroa to Atua ia Iseraela, e kia akatinamouia ratou e tuatau ua atu, i akaariki ei aia ia koe ki runga ia ratou, ei rave i te tuatua-tau e te tuatua-tika.

9 E kua oronga atura aia i te auro na te ariki okotai anere e rua ngauru i te taleni, e te rakau kakara e mea maata, e te toka memeitaki: kare ïa rakau kakara i kitea mei ta te ariki vaine i Seba i o mai na te ariki ra na Solomona.

10 E te au tavini o Hirama, e te au tavini katoa o Solomona, i tei uta mai i te auro mei Ophira mai, kua uta katoa mai i te au rakau ra, i te alamuga, e te toka memeitaki.

11 Kua rave iora te ariki i taua rakau ra i te alamuga ei kakenga no te are o Iehova, e no te are katoa no te ariki, e te kinura e te nabala, na te aronga imene, kare ïa rakau i kitea mai i taua enua ra i Iuda mei tupua mai.

12 Kua oronga atura te ariki ra ko Solomona i ta te ariki vaine i Seba i anoano ra, i te au mea ravarai tana i pati ra, e maata rava oki i tana i apai mai na te ariki ra. Oki atura aia, aere atura ki tona uaorai enua, koia ma tona au tavini.

13 E te teiaa o te auro i tae mai kia Solomona i te mataiti okotai ra, e ono ïa anere e ono ngauru ma ono i te taleni auro;

14 Te taka ra ta te au tangata oko aere, e ta te aronga i oki ra, i apai mai. E kua apai maira te au ariki katoa i Arabia, e te au tutara o te pa enua, i te auro e te ario kia Solomona.

15 Kua anga iora te ariki ra ko Solomona i te paruru e rua anere, e auro tupakiia; okotai paruru ra e ono ïa anere sekela auro tupakiia.

16 E kua anga iora aia i e toru anere paruru, e auro tupakiia; e toru anere oki sekela to te paruru okotai i te auro ra; kua tuku akera te ariki i te reira ki roto i te are i te vaorakau i Lebanona ra.

17 Kua anga iora te ariki i te terono maata nio elephana ra, e kua vaî ki te auro meitaki ra.

18 E ono takainga to taua terono ra, e auro oki te tukuanga vaevae, kua tamouia ïa ki te terono, e te mouranga-rima i tetai pae e tetai pae i te nooanga,e nga liona e rua i te tu anga i vaitata i aua nga mouranga-rima ra.

19 E te au liona okotai ngauru ma rua i tetai pae e tetai pae, i te tu ua anga, ki runga i nga takainga ra e ono ra. Kare rava ïa mea i te anga angaia i te au basileia katoa ra.

20 E te au kapu inu ravarai a te ariki ra a Solomona, e auro anake ïa, e te au āriki ravarai i te are i te vaorakau i Lebanona, e auro meitaki anake ïa: kare rava e mea ario; kare i akonoia ei apinga i te au rā o Solomona ra.

21 Ko te au pai o te ariki ra, e te au tavini o Hirama, tei aere ki Taresisa: e kia tae ki te toru o te mataiti e oki mai ei taua au pai Taresisa ra, i te apai anga mai i te auro, e te ario, e te nio elephana, e te kuri-tangata, e te pipi manea.

22 Tu ke rava atura te ariki ra ko Solomona i te apinga e te pakari i te ui ariki katoa i te ao nei.

23 Kua kimi maira te au ariki katoa o te ao nei ia Solomona, kia akarongo ratou i tana tuatua pakari i tukuia mai e te Atua ki roto i tona ngakau.

24 E kua apai ratou, te tangata katoa ra i tana uaorai taoonga-rima, i te au mea ario, e te au mea auro, e te kakau, e te taoonga tamaki, e te rakau kakara, e te oroenua, e te mule, ei apinga, to tera mataiti, tera mataiti.

25 E a tausani a Solomona vairanga oroenua e te kariota, okotai ngauru ma rua i te tausani tangata akaoro oroenua; ko tei akanooia e ia i roto i te au oire kariota, e i te ariki i Ierusalema.

26 Au atura aia ki rungao i te au ariki katoa, mei te vai mai, e tae ua atura ki te enua o te Philiseti, e tae ua atura ki te pae i Aiphiti ra.

27 Riro atura te ario i te ariki, mei te toka ra te tu i Ierusalema; e te arezi mei te sukamino i te o ra, i te maata.

28 Kua apai maira ratou i te au oroenua kia Solomona mei Aiphiti mai, e mei te pa enua katoa oki.

29 E te toenga o te tuatua ia Solomona, mei muatangana mai e tae ua atu ki te openga, kare ainei kua tataia ki roto i te buka a Natana peroveta, e i roto oki i te totou a Ahia i Silo ra, e i roto i te au orama a Ido akara ra ia Ieroboama te tamaiti a Nebata?

30 E a ngauru o Solomona mataiti i te ariki anga i Ierusalema ki runga ia Iseraela katoatoa ra.

31 Moe aturā Solomona ki o tona ra ai metua, e tanumia iora aia i roto i te oire o tona metua ra o Davida: tupauia akera aia i te au e tana tamaiti ra e Rehoboama.