Exodo

10 KUA tuatua mairai a Iehova kia Mose, Ka aere ki roto kia Pharao ra: kua akaketaketa oki au i tona ngakau, e te ngakau o tona au tavini, kia akakite atu au i taua au akairo naku nei ki rotopu ia ratou:

2 E kia akakite oki koe ki nga taringa o taau tamaiti, e te tamaiti a taau ra tamaiti, i taku i rave i to Aiphiti, e taku au akairo taku i rave i rotopu ia ratou; kia kite oki kotou e, ko au ko Iehova.

3 E aere aturā Mose raua ko Aarona kia Pharao ra, e kua karanga atura kiaia, Te na ko maira te Atua o te ngati Ebera nei ko Iehova, Mei te aa ra te roa o toou taakaaka kore anga ia koe uaorai ki mua iaku nei? e tuku mai koe i toku au tangata, kia akamori mai ratou iaku nei.

4 Kare ra, kia kore koe e tuku i toku au tangata, i na, apopo au e apai mai ei i te tāpaki ki toou enua nei:

5 E ka ngaro te enua ia ratou, kare e kitea te one nei kia akara: e ka pou ia ratou te totoenga i vaooia ra, i tei vaooia e te ua toka na kotou; e ka pou ia ratou te au rakau ravarai e tupu i te kainga na kotou:

6 E ka ki to au are ia ratou, e te au are o toou au tavini ravarai, e te au are o to Aiphiti katoa ra; kare ïa tāpaki i kitea e toou ai metua, e toou ai tupuna, mei to ratou noo anga mairai ki runga i te enua nei, e tae roa akenei ki teianei rā. Ariu maira aia, e aere maira ki vao mei mua mai ia Pharao ra.

7 Kua tuatua akera te au tavini o Pharao kiaia, Mei te aa te roa e riro ei teianei tangata ei ereere ia tatou nei? e tuku atu koe i taua aronga tangata nei, kia akamori ua ana ratou i to ratou Atua ia Iehova: kare koe i kite e, kua mate Aiphiti nei?

8 Akaoki akaouia akerā Mose raua ko Aarona kia Pharao ra: e kua tuatua maira aia kia raua, Ka aere, ka akamori i to kotou Atua ia Iehova: koai ma ra te ka aere?

9 Kua karanga aturā Mose, E aere matou ma ta matou tamariki varevare, e to matou ruaine, ma ta matou au tamariki tamaroa, e ta matou au tamaine, ma ta matou au mamoe, e ta matou au puakatoro i te aere anga; e oroa oki ta matou kia Iehova.

10 Kua tuatua maira aia kia raua, Kia akapera ta Iehova ia kotou, i te tika anga iaku i te tuku ia kotou kia aere, ma ta kotou au tamariki varevare: ka akara na; ko te kino oki tei mua ia kotou:

11 Auraka ïa: e aere ra kotou ko te au tane ra, ka akamori ei ia Iehova; ko ta ko ou i pati maira. E kua tuaruia maira raua ki vao mei mua mai i te aroaro o Pharao ra.

12 Kua tuatua mairā Iehova kia Mose ra, Ka akatika ana i toou rima ki rungao i te enua i Aiphiti nei i te tāpaki, kia tae mai ratou ki rungao i taua enua nei i Aiphiti, e kia pou ia ratou te au rakau rikiriki ravarai o te enua nei, te au mea katoa i toe i te au toka ra.

13 Kua akatika akerā Mose i tana rakau ki rungao i taua enua ra i Aiphiti, e kua akaarara mairā Iehova i te maoake ki rungao i taua enua ra e po atura taua rā ra, e ao akera taua po ra; e tei te ao anga ra, ko te tāpaki maira i taua maoake ra.

14 Pini takakaiia atura te enua ra ko Aiphiti ki te tāpaki, e to iora ïa i te au tapere roarai i Aiphiti ra; e mea maata roa: kare ïa tāpaki mei muatangana mai, e kare rai oki a muri atu.

15 Kua pini oki taua enua katoa ra i te reira, e poiri roa atura te one; ope roa akera te au rakau rikiriki o te enua ra i te keingaia e ratou, e te ua katoa o te au rakau i toe i te ua toka ra: kare roa e ngai rikiriki mata i toe ki runga i te au rakau mamaata, e te au rakau rikiriki o te enua, e pini ua ake taua enua ra ko Aiphiti.

16 Kua tiki rapurapu ua iorā Pharao ia Mose raua ko Aarona: e kua tuatua maira, Kua ara au i to kotou Atua ia Iehova, e ia korua.

17 E tenana, teia taku tuatua kia koe, e akakore mai i taua ara naku nei, okotai roa nei rai, e ka tautopa korua i to kotou Atua ia Iehova, kia apai ke atu aia i teianei rai mate iaku nei.

18 Kua aere maira aia ki vao mei mua mai ia Pharao, e kua tautopa iora ia Iehova.

19 E kua akatu ke aturā Iehova i taua matangi ra ei tokerau viviki roa, peke ke atura te tāpaki i te reira ra, e akatopaia atura ki raro i te Tai Muramura ra; kare ua tetai tāpaki i toe i taua enua katoa ra i Aiphiti.

20 Kau akaketaketa iora rā Iehova i te ngakau o Pharao, e kare rai aia i tuku i te tamariki a Iseraela.

21 Kua tuatua mairā Iehova kia Mose, Ka akatika ana i toou rima ki runga i te rangi, kia akapoiriia ki rungao i te enua nei ko Aiphiti, ei poiri e tika kia aa ra.

22 Kua akatika akerā Mose i tona rima ki runga i te rangi; e poiri pangopango iora, e pini ua ake te enua ra ko Aiphiti, e po toru akera:

23 Kare ratou i kite kia akara ki tetai ki tetai; kare oki tetai i tu ua ki runga i taua ngai tana i noo ra, e ope akera nga rā e toru ra; kareka te au tamariki ravarai a Iseraela, e mārama ïa to ratou i to ratou au nooanga.

24 Kua tuatua mairā Pharao kia Mose, na ko maira, Ka aere kotou, ka akamori ia Iehova; e vaoo ra ta kotou au mamoe, e ta kotou au puakatoro, e aere katoa oki ta kotou au tamariki.

25 Kua karanga aturā Mose, E tuku katoa mai koe i te au atinga, e te au atinga karakaratio, ei atinga na to matou Atua na Iehova.

26 E aere katoa oki ta matou au puaka; kare rava tetai maikuku e vaooia; ko te reira oki ta matou e rave ei akamori anga i to matou Atua ia Iehova; kia tae roa ra matou ki reira e kite ei i te tu o ta matou akamori anga ia Iehova.

27 Kua akaketaketa atura rā Iehova i to Pharao ngakau, e kare rai aia i tuku mai ia ratou.

28 Kua tuatua mairā Pharao kiaia, E aere ke koe, kia matakite koe, auraka roa koe e kite akaou mai i toku mata; ei te rā e kite ei koe i toku nei mata, ka mate roa ïa koe.

29 Kua karanga aturā Mose, E tuatua tika taau, kare au e kite akaou i toou mata.