Esetera

8 TEI taua rā ra te oronga angaia mai e te ariki e Ahasueru te ngutuare o te enemi o te ngati Iuda ko Hamana ki te ariki vaine kia Esetera. Kua aere mairā Moredekai ki mua i te aroaro o te ariki; kua akakite oki a Esetera iaia e e piri aia nona.

2 Kua kiriti akera te ariki i tona momono-rima i raveia mai e ia ia Hamana ra, e kua tuku akera kia Moredekai. Kua tuku akerā Esetera ia Moredekai ki runga i te ngutuare o Hamana.

3 Kua akaranga akaou aturā Esetera ki mua i te aroaro o te ariki, e tipapa marie iora i tona pae vaevae, e kua pati akatenga atura iaia ma te roi-mata, kia tuku ke atu aia i te kino i akatupuia e Hamana ngati Agaga ra, e tana ravenga i akakoroia e ia i te au ngati Iuda.

4 Kua akatikā maira te ariki i te sepeta auro kia Esetera. Kua tu akerā Esetera, tu ua iora ki mua i te aroaro o te ariki; Kua akaranga atura,

5 Kia tika i te ariki ra, e te kite aroaia maira au e ia, e e mea tika taua tuatua nei i mua i te aroaro o te ariki, e te mataora maira aia iaku nei, e tata i te tuatua akakore i te au tuatua i akakoroia e Hamana te tamaiti a Hamedata te ngati Agaga ra, tana i tata ra e kia pou rava te au ngati Iuda i te mate i te au enua katoa o te ariki ra:

6 Akapeea ra oki au nei e tikaʼi kia akakoromaki i te akara anga atu i kino te ka tae mai ki runga i toku nei au tangata? e akapeea oki au e tikaʼi kia akakoromaki i te akara anga atu i te tainga i toku ra kopu-tangata?

7 Kua tuatua maira te ariki ra ko Ahasueru ki te ariki vaine ra kia Esetera, e te ngati Iuda ra kia Moredekai, I na, kua orongaia e au te are o Hamana kia Esetera, e kua riia aia e ratou ki runga i te ringa ra, no te mea kua akatika atura aia i tona rima ki runga i te ngati Iuda ra.

8 E tata katoa korua i ta korua tuatua i anoano i te ngati Iuda ra, ma te ingoa katoa o te ariki, e akairo oki i te momono-rima o te ariki: ko te tuatua oki i tataia ma te ingoa o te ariki, e kua akairoia ki te momono-rima o te ariki, kare rava ïa e tangata e tikaʼi kia akakore.

9 Tikiia atura oki te au tata tuatua a te ariki, i te toru o te marama, koia te marama ra ko Sivana, i te tai takau ma toru o te rā; ko ta Moredekai i akaue maira ko tei tataia ïa, ki te au ngati Iuda, e te au rangatira, e te au tutara, ma te au tutara tauturu, i runga i te au enua ra, mei Inidia mai e tae ua atura ki Kusa, okotai anere e rua ngauru ma itu i te enua; ko te au enua katoa kua tataia i te tuatua tikai, e ki te au tangata katoa i to ratou reo, e ki te au ngati Iuda i te tuatua tikai, e i to ratou reo.

10 Kua tata iora aia ma te ingoa o te ariki ra ko Ahasueru, e kua akairo atura ki te momono-rima o te ariki ra, e kua akau atura i taua au leta ra i te aronga apai leta na runga i te au oroenua, i na runga i te au oroenua oro viviki, e te au mule te anau a te oroenua ra.

11 Kua orongaia atu e te ariki ki te ngati Iuda, i roto i te au oire ravarai, kia akaputputu ratou, e kia akamaroiroi ia ratou uaorai kia ora, kia rave e ta, e kia mate, e kia pou, te aronga toa katoa i o te au tangata e no te enua ra, kia opu mai ia ratou, te au tamariki mea riki, e te au vaine katoa, ei noni oki i ta ratou apinga ra,

12 Kia okotai rai rā i te au enua katoa o te ariki ra o Ahasueru, koia te rā okotai ngauru ma toru, koia te marama ra ko Adara:

13 E kia akakite aereia te tu o taua ture i tataia ra ki te au enua katoa e ki te au tangata katoa ra, kia akateateamamao te ngati Iuda e kia tae ki taua rā ra, kia akaoko atu ratou uaorai i to ratou au enemi.

14 Riro atura te aronga apai leta runga i te au oroenua oro viviki ra, e te au mule, i akangakoikoi i te tuatua a te ariki i te akarapurapu anga ra. Tukuia akera taua ture ra i te are o te ariki ra i Susana.

15 Riro aturā Moredekai ki vao mei mua atu i te aroaro o te ariki ra ma te kakau ariki i te akakau anga, te kakau kerekere e te teatea, e ma te korona maata auro ra, e ma te kakau orongā meitaki e te purapura; mareka rava akera taua oire ra ko Susana e kua rekareka.

16 E mārama to te ngati Iuda, e te meitaki, e te rekareka, e te akangateitei.

17 E tae akera te tuatua e te ture a te ariki ki te au enua katoa, e te au oire katoa, kua mareka akera te ngati Iuda e te pingapingareka, te pokai, e te rā meitaki ïa no ratou: e manganui oki te tangata no taua enua ra i riro mai ei ngati Iuda; rokoia iora oki ratou e te mataku i te au ngati Iuda.