1 Ariki

16 KUA tae maira te tuatua a Iehova kia Iehu te tamaiti a Hanani ia Baasa, i te na ko anga mai e,

2 No te mea kua akateitei au ia koe mei raro mai i te one-pueu ra, e kua akariro au ia koe ei ariki i runga i toku ra au tangata ia Iseraela nei; e kua aere koe na te arataa o Ieroboama, e kua ara toku au tangata nei ko Iseraela ia koe, ei akakoko iaku kia riri i taua au ara na ratou ra:

3 I na, ka apai keia e au te uanga o Baasa, e te uanga o tona ra ngutuare; e ka akariro au i toou ra ngutuare mei te ngutuare o Ieroboama te tamaiti a Nebata ra.

4 To Baasa kia mate i roto i te oire ra, na te puaka-aoa ïa e kai; e tona rai kia mate i te kainga ra, na te manu ïa o te reva e kai.

5 E te toenga o te tuatua ia Baasa, e tana i rave, e tona ririnui, kare ainei kua tataia ki roto i te buka, te tuatua no te au rā o te au ariki o Iseraela?

6 Kua moe iorā Baasa ki o tona katoa ra ai metua, e tanumia iora i Tireza: tupauia akera aia i te au e tana tamaiti ra e Ela.

7 I pera mai te tuatua a Iehova i te peroveta ra ko Iehova te tamaiti a Hanani ia Baasa ra, e tona katoa ra ngutuare, i te au kino katoa tana i rave i mua i te aroaro o Iehova, i te akoko anga atu iaia kia riri i te angaanga a tona rima, i te akaaiteite anga ki te ngutuare o Ieroboama; e no reira aia i mate ei i te Atua.

8 E tae akera ki te mataiti okotai takau ma ono o Asa ariki no Iuda ra, i ariki ei a Ela te tamaiti a Baasa ra ki runga ia Iseraela i Tireza, e rua akera mataiti.

9 Tona tavini ra oki ko Zimeri, e rangatira no tetai pae kariota nona ra, kua kaitamaki akera aia iaia,e te akakona ra aia i te kava i Tireza i roto i te are o Araza, e akaaere no tona ngutuare i Tireza ra.

10 Kua tomo akerā Zimeri ki roto, kua ta atura iaia, e mate rava akera, i te mataiti okotai taku ma itu o Asa ariki no Iuda, riro akera te au iaia uaorai.

11 E tei te riro anga te au iaia, e kua mou aia ki runga i tona terono, kua ta aia i te ngutuare katoa o Baasa ra: kare rava tetai tane i toe i taua kopu-tangata ra, kare oki e taunga i vaooia.

12 Kua perā Zimeri i taua ngutuare katoa o Baasa ra, i te tuatua ta Iehova i tuatua mai kia Baasa ia Iehova peroveta ra;

13 No te au ara katoa a Baasa ra, e te ara a tana tamaiti ra ko Ela, i raveia e raua ra, i ara ai oki Iseraela, i akakoko ei oki i te Atua o Iseraela ko Iehova kia riri i to ratou au idolo.

14 E te toenga o te tuatua ia Ela, e te au mea katoa tana i rave ra, kare ainei kua tataia ki roto i te buka, te tuatua no te au rā o te ui ariki o Iseraela ra?

15 Tei te tai takau ma itu o te mataiti o Asa ariki no Iuda ra i ariki ei a Zimeri i Tireza, e po itu akera. Te patia ra to te au tangata ra puakapa i Gibetona, no te Philiseti ïa oire i reira.

16 Kite akera taua aronga i roto i te puakapa ra, e i tuatuaia e, Kua kaitamaki a Zimeri, e kua ta i te ariki: kua iki iora to Iseraela katoa ra i te rangatira o te nuku ra ia Omeri, ei ariki ki runga ia Iseraela ki roto i te puakapa, i taua rā ra.

17 Kua aere aturā Omeri e to Iseraela katoa mei Gibetona atu, kua tamaki atura ia Tireza.

18 Kite akerā Zimeri kua rauka taua oire ra, kua aere atura aia ki roto i te punanga i te are o te ariki ra, kua tutungi iora aia i taua are o te ariki ra ki runga iaia uaorai i te ai, mate atura,

19 No te ara tana i rave, ka rave ei aia i te kino ki mua i te aroaro o Iehova ra, i te aere anga na te arataa o Ieroboama, e te ara tana i rave, i ara ai oki Iseraela.

20 E te toenga o te tuatua ia Zimeri, e te kaitamaki nana ra, kare ainei kua tataia ki roto i te buka, te tuatua no te au rā o te au ariki o Iseraela ra?

21 Kua mavete akera Iseraela ki e rua pae, ko tetai pae ra, aru atura ia Tibeni te tamaiti a Ginata, e akaariki iaia; e tetai pae ra, aru atura ia Omeri.

22 Autu iora ra te au tangata i aru ia Omeri i te au tangata i aru ia Tibeni te tamaiti a Ginata: e mate iorā Tibeni, riro atura te au ia Omeri.

23 Tei te toru o te ngauru okotai ara o Asa ariki no Iuda ra mataiti, i ariki ei a Omeri ki runga ia Iseraela, okotai ngauru ma rua mataiti: e ono ona mataiti i te ariki anga i Tireza.

24 Kua oko aia i te tuaivi ra ko Samaria ia Semera, i nga taleni ario e rua; e kua akatu akera i tetai oire ki runga i taua tuaivi ra, tapa iora i te ingoa o taua oire i akatuia e ia ra i te ingoa ia Semera i te pu o taua maunga ra, ko Samaria.

25 Kua rave iora rā Omeri i te kino i mua i te aroaro o Iehova, kua maata ua atu rai tona kino i te aronga ravarai i na mua iaia ra.

26 Kua aere oki aia na te arataa katoa o Ieroboama te tamaiti a Nebata ra, e tana au ara i ara ai Iseraela iaia, ei akakoko i te Atua o Iseraela iaia, ei akakoko i te Atua o Iseraela ko Iehova kia riri i to ratou au idolo.

27 E te toenga o te tuatua ia Omeri, i raveia e ia ra, e te mea ririnui nana i raveia e ia ra, kare ainei kua tataia ki roto i te buka, te tuatua no te au rā o te au ariki o Iseraela?

28 Moe iorā Omeri ki o tona ai metua katoa ra, e tanumia iora i Samaria: tupauia akera aia i te au e tana tamaiti ra e Ahaba.

29 Tei te mataiti e toru ngauru ma varu o Asa ariki no Iuda ra, i ariki ei a Ahaba, te tamaiti a Omeri, i Iseraela ra: e rua ngauru e rua ara mataiti to Ahaba, te tamaiti a Omeri, ariki anga ki runga ia Iseraela i Samaria.

30 Kua rave iorā Ahaba, te tamaiti a Omeri, i te kino i mua i te aroaro o Iehova, maata rave atura tana i tei na mua katoa iaia ra.

31 E mei te mea e, e iti ïa ara kia akono aia i te au ara a Ieroboama te tamaiti a Nebata ra, kua rave iora aia i te tamaine a te ariki o to Sidona, a Etebaala, ia Iezebela ei vaine nana, kua aere atura kua akamori ia Baala, e kua akarongo iaia.

32 Kua akatu oki aia i tetai atarau na Baala i roto i te are o Baala i akatuia e ia i Samaria.

33 Kua anga iora oki a Ahaba i tetai Asetoreta; maata rava atura to Ahaba akakoko anga atu i te Atua o Iseraela ia Iehova, kia riri, to te au ariki katoa o Iseraela i na mua iaia ra.

34 Tei tona ra tuatau to Hiela i Betela akatu anga ia Ieriko: kua akamou aia i te tango o taua oire ra i te matenga o tana tama mua ra ia Abirama, e tei te matenga o tana tama openga ra ia Seguba, i akatu ei aia i te au ngutupa; mei te tuatua a Iehova, i tuatuaia mai e Iosua te tamaiti a Nuna ra.