Exodo

23 AURAKA koe e apai aere i te rongo taeke ua; auraka katoa e kapiti atu i to rima ki to te tangata kino ei kite pikikaa.

2 Auraka koe e aru i te urupu tangata i te kino; auraka oki koe e aru i te maata i te akava anga, ka akaruke ei i te tuatuatau ra.

3 Auraka oki koe e akatika ē ua i te tangata rikiriki i tana tuatua.

4 Kia aravei koe i te puakatoro a to enemi, e te asini, te aere ke ra, ka akaoki ïa koe i taua puaka ra kiaia.

5 Kia kite koe i te asini a to enemi i te vai ua anga i raro ake i tona apainga, e e akaruke iaia, e kare e pange atu; ka pange rai koe ma ia katoa.

6 Auraka koe e ruri ke i ta te putaua ra tuatua i te akava anga.

7 Kia atea ke atu rai koe i te tuatua pikikaa; auraka e ta i te aronga ara kore e te tuatua-tika; kare oki au e akatika i te tangata kino ra. 8 Auraka koe e rave i te tutaki: e po oki te mata o te aronga kite i te tutaki, e e mingi te tuatua a te aronga tuatua-tika i te reira.

9 Auraka oki koe e tinai-mate i te tangata ke; kua kite oki kotou i te ngakau o te tangata ke, e tangata ke oki kotou i te enua ra i Aiphiti.

10 E ono o oou mataiti ruru anga ua i toou enua, e ka akaputuputu oki i tei ua i reira ra:

11 Kareka te itu o te mataiti ra: ka vaoo ua ïa kia noo ua ana; kia kai te putaua i o ou na, e tei toe ia ratou ra, e vaoo ua atu na te au puaka o te ngangaere e kai. E akapera katoa koe i toou au kainga vine, e toou kainga olive ra.

12 E rave koe i taau au angaanga i nga rā e ono ra, kareka te rā itu ra ka akaangaroi ua koe i te reira; kia akaangaroi taau puakatoro e te asini naau, e kia maru te tamaiti a to tavini vaine, e te tangata ke.

13 E te au mea ravarai i karangaia atu e au kia kotou na, ko ta kotou ïa e akono tikai: auraka ra te ingoa o te au atua ke ra e akaiki uaia e kotou, auraka roa e puta mai mei roto i to vaa.

14 E toru aau oroa e akono i te mataiti okotai naku.

15 E akono koe i te oroa areto akaopue kore ra; kia po itu koe i te kainga i te areto akaopue koreia ra, taku i akaue atu kia koe na, i te tuatau i akonoia ra, i te marama ra ia Abiba, taua marama ra oki toou aere anga mai mei Aiphiti maira; e auraka roa tetai e aere puapinga kore ua mai ki mua i toku aroaro nei:

16 E te oroa o te akaū ra, i te popo o taau angaanga ra, ko taau i ruru i te kainga: e te oroa i te akaputuputu anga kai ra, kia tae ki te openga o te mataiti ra, kia akaputuputuia e koe to roto i te kainga ra, taau i angaanga ra, i roto.

17 E toru o taau au tane katoa aere anga mai ki mua i te aroaro o te Atu ra o Iehova i te mataiti okotai.

18 Auraka koe e apai mai i te toto o taku ra atinga, ma te areto akaopueia ra; auraka katoa te tongaua o taku ra kaingakai e vaooia kia ao.

19 Te au mea memeitaki o te popo o toou na enua, ko taau ïa e apai mai ki te are o toou Atua ra o Iehova. Auraka koe e tunu i te punua puakanio i te u o tona ra tinana.

20 I na, te tono nei au i tetai Angela i mua ia koe, e tiaki ia koe i te arataa ra, ei arataki oki ia koe i te ngai i akonoia e au ra.

21 Kia matakite koe iaia, e akarongo i tona reo; auraka e akakoko atu iaia; kare oki aia e akakore i ta kotou ara; no te mea, tei iaia toku nei ingoa.

22 Kia tikai tikai ra ia koe i te akarongo i tona reo, e i te rave i te au mea katoa taku e karanga atu kia koe na; ei enemi ïa au no toou au enemi, e ei ekai oki au i tei ekai mai ia koe i reira.

23 E na mua oki taku Angela ia koe, e arataki oki ia koe ki o te ngati Amori, e te ngati Heta, e te Perizi, e te ngati Kanaana, e te ngati Hevi, e te ngati Iebusi; ko taku ïa e tipu ke atu.

24 Auraka koe e tupou ki raro i te au atua no ratou ra, auraka e akamori atu ia ratou, auraka oki koe e rave mei ta ratou e rave ra: e akapou takiri ra koe ia ratou, e akangaangaa roa i to ratou au tiki.

25 Ko to kotou Atua ra ko Iehova ta kotou e akamori, kia akameitaki mai aia i taau kai, e taau vai; e kia apai ke atu au i te maki i roto ia koe na.

26 Kare rava tetai mea e maemo ua tona anaunga, e kare oki e riro ei akatoa, i toou na enua: e tika roa oki toou au rā iaku.

27 E tono au i te mataku iaku na mua ia koe, e naku e akamataku i te au tangata ravarai taau ka aere na; e ka iki mai toou au enemi katoa i to ratou tua ia koe, iaku.

28 Ka unga oki au i te rango taae kia na mua ia koe, e na ratou e arumaki ke atu i te ngati Hevi, te ngati Kanaana, e te ngati Heta, i mua ia koe.

29 Kare ra au e akaope ia ratou i te tuaru i mua ia koe i te mataiti okotai; ko te tanea aea te enua, e maata roa atura te puaka taae o te ngangaere i o ou na.

30 Ka tuaru rikiriki ra au ia ratou i mua ia koe na, e kia maata koe, e kia kapi te enua ia koe.

31 E naku e tuku i toou kotinga, koia te Tai Muramura ra e tae roa atu ki te tai o te Philiseti ra e mei te medebara ra, e tae roa atu ki te vai: e tuku oki au i te tangata katoa o taua enua ra ki toou ra rima; e naau ratou e tuaru ke atu na mua ia koe.

32 Auraka koe e papau i te koreromotu kia ratou, e to ratou au atua katoa:

33 Auraka ratou e noo i toou na enua, ko te ara aea koe iaku ia ratou; kia akamori oki koe i to ratou au atua ra, ka riro ïa te reira ei ereere ia koe.