Te Au Akava

11 E TANGATA ririnui e te toa uritumu te tangata ra ko Iepheta ngati Gileada, na Gileada oki a Iepheta i anau, e tamaiti ra aia na te vaine akaturi. 2 E puke tamariki tamaroa ta te vaine tikai a Gileada i anau iaia ra; e pakari akera nga tamaroa a taua vaine ra, kua tuaru atura ratou ia Iepheta, e kua karanga atura kiaia, Auraka toou ei kainga i te ngutuare o to matou nei metua tane, e tamaiti oki koe na te vaine ke. 3 Oro ke aturā Iepheta i aua nga taeake nona ra i reira, e noo atura i te enua ra ko Toba; e uipa maira te au tangata kanga ia Iepheta ra, e kua aere katoa oki i tona au aerenga. 4 E roa poto akera, kua tamaki maira te tamariki a Amona ia Iseraela.

5 E taua tamaki anga mai o te tamariki a Amona ia Iseraela ra, kua aere atura te aronga pakari i Gileada, e tiki ia Iepheta i taua enua ra ko Toba;

6 E kua karanga atura ratou kia Iepheta, E aere mai koe ei rangatira no matou, e tamaki tatou i te tamariki a Amona.

7 Kua tuatua mairā Iepheta ki te aronga pakari o Gileada, Kare aina kotou te makitakita mai iaku, e kua tuaru kotou iaku i te ngutuare o toku metua ra? eaa oki kotou i aere mai ei kiaku nei i tenana, kia rokoia kotou e te tumatetenga?

8 Kua karanga atura taua aronga pakari o Gileada ra kia Iepheta, No reira matou i oki akaou mai ei kia koe i teianei; kia aere katoa mai koe e tamaki katoa tatou i te tamariki a Amona, e ei rungao ia matou, i to Gileada katoa ra.

9 Kua tuatua mairā Iepheta ki taua aronga pakari o Gileada ra, Kia akaoki kotou iaku ei tamaki i te tamariki a Amona, e kia tuku mai a Iehova ia ratou ki mua i toku aroaro kia pou, ka riro ainei au ei rungao ia kotou i reira? 10 Kua karanga atura te aronga pakari o Gileada kia Iepheta, Ei kite a Iehova ia tatou nei, kia kore matou e akapera i taau i tuatua mai na.

11 Kua aere katoa mairā Iepheta i reira, koia e te aronga pakari katoa o Gileada, e kua akariro te au tangata iaia ei tutara e ei rangatira i rungao ia ratou; e kua akakite iorā Iepheta i te au tuatua ravarai nana ki mua i te aroaro o Iehova i Mizepa.

12 Kua tono aturā Iepheta i etai karere ki te ariki o te tamariki a Amona, karanga atura, Eaa taau iaku nei, i aere mai ei koe iaku nei, e tamaki i toku nei enua?

13 Kua tuatua maira te ariki o te tamariki a Amona ki te au karere a Iepheta ra, No te mea kua riro toku enua ia Iseraela, mei Aranona maira e ko Iaboka, e tae rava akera ki Ioridana, ia ratou i aere mai mei Aiphiti maira: e teianei, e akaoki ua mai taua au tapere na ma te au. 14 Kua tono akaou aturā Iepheta i te au karere ki te ariki o te tamariki a Amona:

15 E kua karanga atura kiaia, Te tuatua mairā Iepheta, Kare Iseraela i rave ua i te enua o Moabi, e te enua o te tamariki a Amona:

16 Ia Iseraela ra i aere mai mei Aiphiti ra, e kua na roto mai i te medebara e kua tae ki te Tai Muramura ra, e tae maira ki Kadesa;

17 Kua tono akera Iseraela i te au karere ki te ariki o Edoma, karanga atura, Teia taku tuatua kia koe, e tuku ake ana koe iaku e aere ana au na roto i to enua na: kare akerai taua ariki o Edoma ra i akarongo mai. E kua pera oki ratou i te unga i te au veka ki te ariki o Moabi, kare akerai aia i akataka; noo ua iora Iseraela i Kadesa.

18 Kua aere ua iora ratou na roto i te medebara, e kua akapini akera i te enua o Edoma, e te enua o Moabi, e kua aere iora na te pae o te enua o Moabi i te pae i te itinga o te rā ra; e kua patia iora i te puakapa i tetai pae i Aranona, kare ra i tae mai ki roto i te kotinga o Moabi ra; ko Aranona oki te kotinga o Moabi ra.

19 Kua tono akera Iseraela i te au karere ki te ariki o te ngati Amori ra, ki te ariki o Hesebona, ia Sihona; kua karanga atura Iseraela kiaia, Teia ta matou tuatua kia koe, e tuku ake ana koe ia matou e na roto matou i toou na enua ki to matou ngai tikai.

20 Mataku akerā Sihona i te tuku ia Iseraela kia na runga i tona kotinga; kua akaputuputu iora rā Sihona i te au tangata ravarai nona, kua patia iora i te puakapa i Iahaza, e kua tamaki maira ia Iseraela.

21 Kua tuku maira te Atua o Iseraela ko Iehova ia Sihona e tona katoa au tangata ki te rima o Iseraela, pou iora ratou; rauka iora te enua katoa o te ngati Amori, ko te tangata ïa no te reira enua, ia Iseraela.

22 Riro maira te tapere katoa o te ngati Amori ia ratou, mei Aranona mai e ko Iaboka, mei te medebara mai e ko Ioridana. 23 E teianei, kua tuaru te Atua o Iseraela ko Iehova i te ngati Amori ki mua i tona au tangata ia Iseraela, e ka riro ainei noou?

24 Kare ainei koe e mou i ta to atua ra i ta Kemosa e oronga mai noou ra? Koia katoa matou nei, ka mou matou i te enua o te aronga katoa ta to matou Atua ta Iehova e tuaru na mua ia matou. 25 E meitaki ainei koe ia Balaka, te tamaiti a Zipora, te ariki no Moaba ri? I māro mai ainei aia ia Iseraela, e kua tamaki mai ainei aia ia ratou?

26 Ka toru akenei o Iseraela anere anga i te mataiti i te noo anga i Hesebona e to reira au vila ra, e i Aroera e to reira au vila oki, e i roto katoa oki i te au oire ravarai i te pae o Aranona; eaa iora kotou i kore ei i rave i reira?

27 E teianei, kare au i takinga-kino ia koe, te takinga-kino nei ra koe iaku, ko koe i tamaki mai iaku nei: ei te Akava ra, ei ia Iehova, te tuku mai i te tika tikai ki te tamariki a Iseraela e te tamariki a Amona akonei.

28 Kare akerai te ariki o te tamariki a Amona i akarongo i te tuatua a Iepheta, i te karere i tonokia atu kiaia ra.

29 Kua aere maira te Vaerua o Iehova ki runga ia Iepheta i reira, kua aere iora aia na Gileada, e na Manase, e aere atu na Mizepe i Gileada, e mei Mizepe i Gileada aere ua atura aia i o te tamariki a Amona.

30 Kua tia iorā Iepheta i te tia kia Iehova ra, e karanga atura, Kia tuku mai koe i te tamariki a Amona ki toku nei rima,

31 Ko te ka aere mai mei roto mai i toku are ra e aravei mai iaku, kia oki mai au ma te ora mei ko i te tamariki a Amona ra, ka riro ïa na Iehova, e kare ra, ka apaiia e au ei atinga karakaratio. 32 Aere aturā Iepheta ki te tamariki a Amona e tamaki ia ratou; e kua tuku mairā Iehova ia ratou ki tona rima.

33 Ta atura aia ia ratou e pou maata rava mei Aroera atu, e tae ua atura ki Minita, e tae rava atura oki ki Abela-keramima, e rua ngauru o te oire. Vi atura te tamariki a Amona ki mua i te aroaro o te tamariki a Iseraela. 34 Kua aere mairā Iepheta ki Mizepa ki tona uaorai ngutuare: e i na! kua aere maira tana tamaine ki vao e aravei iaia, ma te tophe e te mehula: e tamaine okotai aia nana; kare rava ana e tamaroa, e te tamaine mari ra aia. 35 E kia akara maira aia iaia, kua aeae iora aia i ona kakau, e kua tuatua maira, Aue koe, e taku tamaine e! kua akaaka rava io nei au ia koe! ko koe tetai i tumatetengaʼi au nei! kua tuatua oki toku vaa kia Iehova, kare oki e tika kia akakore.

36 Kua karanga atura aia kiaia, E taku metua, kua tuatua toou vaa kia Iehova ra, e akapera mai koe kiaku mei ta to vaa i tuatua ra; kua akaoko mai oki a Iehova ia koe i to au enemi, i te tamariki a Amona ra.

37 E kua karanga atura aia ki tona metua tane, E akatika mai koe i teianei mea; e tuku ake ana koe iaku, ki aere ua au ki runga i te au maunga, e toku au oa katoa, e aue i taku paretenia anga nei, e kia rua ake marama.

38 Kua tuatua maira aia, Ka aere. Kua tuku atura aia iaia kia aere ua ana i e rua marama, aere atura aia e tona au oa katoa, e kua aue i tona paretenia anga ki runga i te au maunga. 39 E ope akera nga marama e rua ra, kua oki maira aia ki tona metua tane ra, e kua pera aia iaia mei tana i tia ra; e kare rava aia i kite i te tangata. Riro atura oki ei peu no Iseraela,

40 E aere rai te au tamaine i Iseraela ra i te au mataiti katoa, e paapaa i te tamaine a Iepheta ngati Gileada, taki a rā i te mataiti okotai.