Iobu

17 KUA pou toku aʼo, kua mutu toku au rā, kua rave te vaarua noku.

2 Kare ainei tei iaku nei te aronga aviri? e kare ainei te akara tamou nei toku mata i ta ratou akakoko?

3 Ka akataka ana i tenana i tetai paruru noku ia koe na; koai te ka rave mai i toku rima?

4 No te mea kua uunaia e koe te kite i to ratou ngakau; kare rai koe e akangateitei ia ratou.

5 Ko tei toma i tona aronga oa kia keiaia, ka kore ïa nga mata o ana puke tamariki.

6 Kua akariro aia iaku ei tuatua anga na te tangata nei; kua riro au ei mea viivii na ratou.

7 Kua aveave oki toku mata i te aue, e kua riro toku nei au melo katoa mei te ata ra.

8 E vavariaia teia e te aronga tiratiratu, e tu oki te aronga ara kore ki runga ei patoi i te pikikaa.

9 E tamou rai te tangata tuatua-tika i tona arataa, e tei viivii kore te rima ra, e tupu atu rai tona maroiroi i te maata anga.

10 Kareka ko kotou katoa na, okiria kotou, ka aere i tenana; kare oki e tangata pakari i kitea e au i roto ia kotou.

11 Kua kore oku puke rā; taku au akakoroanga, e tei manakoia e taku ngakau, kua motu ke ïa.

12 Kua taruri keia te po ei ao: e te mārama kua piri tika mai ïa ki te poiri.

13 Te manako nei au ki te vaarua, ko toku ïa are: kua oora au i toku roi i roto i te poiri.

14 Kua tuatua ana au ki te pe, Ko toku metua tane koe: ki te toke, Ko toku metua vaine, e ko toku tuaine.

15 Teiea iora toku manakonako anga i tenana? ko toku manakonako anga ra, koai te ka kite atu i te reira?

16 Ka eke ratou ki raro ki te ngutupa o te vaarua, i te ngai i taokotai uaʼi i te akaangaroianga i te one.