Numero

25 NOO iorā Iseraela i Sitima, e kua timata iora taua au tangata i te akaturi ki te au vaine Moabi ra.

2 Kua tiki mai oki taua aronga ra ia ratou e aere i te apai anga atinga na to ratou au atua: e kua kai oki te au tangata i ta ratou au atinga, e kua tupou ki raro i to ratou au atua. 3 Kua topiri akera to Iseraela kia Baala-peora: tupu akera te riri o Iehova ia Iseraela.

4 Kua tuatua mairā Iehova kia Mose, Ka tiki i te aronga mamaata ravarai i te au tangata nei, ka ri ei ki runga ki mua ia Iehova, ki mua oki i te rā nei, kia akaanga keia te riri maata o Iehova ia Iseraela ra. 5 Kua karanga aturā Mose ki te au akava o Iseraela, Ka ta kotou i te au tangata i topiri atura kia Baala-peora i tona uaorai papaki, i tona uaorai papaki.

6 E i na, kua aere maira tetai o te tamariki a Iseraela, kua arataki maira i tetai vaine ngati Midiana ki tona au taeake, i mua i te mata o Mose, e i mua i te mata o te uipaanga tamariki a Iseraela katoa ra, te aue anake ra ïa i te ngutupa Are uipaanga ra.

7 E kia akara akerā Phinehaza, te tamaiti a Eleazara, te tamaiti a Aarona taunga ra, i te reira, kua tu akera aia ki runga i rotopu i taua uipaanga ra, kua rave iora i te korare i tona rima;

8 Kua aru atura i taua tangata Iseraela ki roto i te pia moe ra, kua ko atura ia raua ravarai e tu mama atura, taua tangata Iseraela ra, e te vaine katoa i te kopu ra; kore akera te maki-mate i rotopu i te tamariki a Iseraela ra.

9 E taua aronga i mate takiri roa i taua maki-mate ra, e rua ïa ngauru e a ara i te tausani.

10 E kua tuatua mairā Iehova kia Mose, na ko maira,

11 Kua akaanga ke io nei a Phinehaza, te tamaiti a Eleazara, te tamaiti a Aarona taunga ra, i toku riri i te tamariki a Iseraela, i te maroiroi nona i rotopu ia ratou noku nei, i kore ei i pou te tamariki a Iseraela iaku i taua riri noku ra. 12 E tenana, e karanga atu kiaia, I na, kua oronga au i taku koreromotu au nona:

13 Nona ïa, e no tona uanga i muri ake iaia ra, koia te koreromotu ra i te taoonga taunga ra e tuatua ua atu; no te mea i maroiroi aia i tona ra Atua, e kua tapoki i te ara a te tamariki a Iseraela ra.

14 Ko te ingoa o taua ngati Iseraela i taia ra, ko tei taia katoaia ma te vaine ngati Midiana ra, ko Zimeri ïa, e tamaiti na Salu, e mataiapo ki o te ngati Simeona ra.

15 E te ingoa o taua vaine ngati Midiana i taia ra, ko Kosibi ïa, e tamaine na Zura; e tutara no tetai pae tangata, e mataiapo i Midiana ra.

16 Kua tuatua mairā Iehova kia Mose, na ko maira, 17 E taeko atu kotou i te ngati Midiana, e rave ka ta;

18 Kua taeko mai oki ratou ia kotou i ta ratou au ravenga pikikaa, i ta ratou i pikikaa io nei ia kotou no te ara i Peora ra, e i te vaine ra ko Kosibi, to ratou ra tuaine, te tamaine a tetai tutara i Midiana, i tei taia, i te tuatau maki-mate ra no te ara i Peora ra.