2 Samuela

20 TEI reira tetai tangata kanga, ko Seba te ingoa, e tamaiti aia na Bikeri, e ngati Beniamina: kua akatangi iora aia i te pu, e kua tuatua akera, Kare a tatou tuanga ia Davida, kare a tatou puapinga i te tamaiti a Iese: ei te puakapa, e Iseraela e.

2 Kua akaruke maira to Iseraela katoa ia Davida, e kua aru atura ia Seba te tamaiti a Bikeri ra: kua piri maira to Iuda ki to ratou ariki: mei Ioridana mai e tae rava atura ki Ierusalema.

3 Tae aturā Davida ki tona ngutuare i Ierusalema, kua rave iora te ariki i nga vaine tavini tino ngauru, tana i vaoo ei tiaki i te are, kua tuku iora ia ratou ki roto i te are tapeka anga, e kua angai atura ki te kai, kare ra i aere atu ki roto kia ratou. Popaniia iora ratou, e kua noo takaua iora ratou, e tae ua atura ki te rā i mate ei ra.

4 Kua karanga atura te ariki kia Amasa, E akaputuputu mai koe i to Iuda i eianei puke rā e toru nei, e ei ko nei katoa oki koe.

5 Kua aere aturā Amasa e akaputuputu mai i to Iuda; roa atura aia, kare akera i akono i nga rā i akakiteia atu kiaia ra.

6 Kua karanga aturā Davida kia Abisai, I teianei, ka maata ta Seba te tamaiti a Bikeri kino e rave ia tatou i ta Abasaloma: i teianei, ka rave koe i te au tavini o to pu nei, e arumaki atu, ko te rauka aea te oire patuia ra iaia, ko te ora atu.

7 Kua aru atura to Iaoba au tangata iaia, e te Kereti, e te Peleti, e te aronga toa katoa ra; riro atura ratou mei Ierusalema atu, e aruaru ia Seba, te tamaiti a Bikeri ra.

8 E tae atura ratou ki te toka maata i Gibeona ra, kua aere iorā Amasa i te aravei ia ratou. I tatuaia te kakau i akakakakauia e Ioaba ra i tetai tatua, tei reira tetai koke te akauta uaira ra ki te kaokao i te vaî ra, e te aere ua ra aia kua akatopa ua atura aia i taua vaî ra.

9 Kua karanga aturā Ioaba kia Amasa, Te ora ra koe, e taku teina? Kua rave akera to Ioaba rima katau i te kumikumi o Amasa e ongi iaia.

10 Kare akerā Amasa i kite i te koke i roto i tetai rima o Ioaba; kua puta iora aia ia Ioaba i taua koke ra i te îo kaokao ra, topa iora te ngakau ki raro i te one, kare akera i ko akaou; mate rava akera aia. Kua aruaru aturā Ioaba, raua ko tona taeake ko Abisai, ia Seba te tamaiti a Bikeri ra.

11 Kua tu ua iora tetai tangata o Ioaba i vaitata iaia, e kua karanga atura, Ko tei akatika ia Ioaba, e ko tei anoano ia Davida ra, ka aru aia ia Ioaba.

12 Te takaviriviri rā Amasa i roto i tona uaorai toto i te pae arataa ra. I akara ra taua tangata ra e, kua tu ua te au tangata ravarai ra, kua rave akera aia ia Amasa, e apai atura ki roto i te kainga, akaruke iora i taua arataa ra, e kua tapoki atura iaia ki tetai kakau, te akara atura oki aia e, kia tae te au tangata katoa kiaia ra, kua tu anake iora.

13 E kia apai keia atura aia i te arataa ra, kua aere iora te au tangata ravarai i te aru anga atu ia Ioaba, e te arumaki anga atu ia Seba te tamaiti a Bikeri ra.

14 Aere ua aturā Seba na roto i te au kopu ravarai o Iseraela, e tae atura ki Abela e Bete-maaka, e ki to Beerota katoa: e kua akaputuputuia ratou, e kua aru atura iaia ra.

15 Kua aere maira ratou, e kua akapini iaia i Abela o Bete-maaka, e kua akāū iora raotu i te one i taua oire ra, i mua mai i te patu i vao ra: kua tutuki iora te au tangata ravarai o Ioaba i taua patu ra kia ngaangaa atu ki raro.

16 Kua kapiki ua maira tetai vaine pakari no roto i taua oire ra i reira, Ka akarongo mai ana, ka akarongo mai ana; teia taku tuatua kia kotou, e karanga atu ana kia Ioaba, e aere mai aia ki ko nei, kia karanga atu au kiaia ra.

17 E vaitata maira aia kiaia, kua karanga atura taua vaine ra, Ko Ioaba ainei koe? Kua tuatua maira aia, Ko au ïa. Kua karanga atura aia kiaia, Ka akarongo mai na i te tuatua a to tavini vaine nei. Kua tuatua maira aia, Te akarongo nei au.

18 Kua karanga atura aia, na ko atura, Mātau oki ratou i te tuatua i muatangata, i te na ko e, E ui meitaki ana i Abela; ka akaoti atu ei.

19 Te noo ua nei au ma te au e te akono meitaki i Iseraela nei, e te kimi mai nei koe i te oire, e tetai metua vaine i Iseraela nei, e ta; eaa koe a apuku ei i te tuanga a Iehova?

20 Kua tuatua mairā Ioaba, na ko maira, Auraka, auraka au kia pera, kia apuku au i teianei oire e kia pou.

21 Kare ïa tena: ko tetai tangata no te maunga ra ko Epheraima, ko te tamaiti a Bikeri, ko Seba tona ingoa, kua akateitei io nei i tona rima i te ariki nei ia Davida: koia anake te tuku mai, e aere ke ïa au i te oire nei. Kua karanga atura tau vaine ra kia Ioaba, I na, ka tiria mai te mimiti o taua tangata ra ki ko nei kia koe nei na runga i te patu nei.

22 Aere atura taua vaine ra ma tona pakari ki te tangata ravarai; e tipuia iora te mimiti o Seba te tamaiti a Bikeri e ratou, e kua titiri atura ki vao mai kia Ioaba ra. Kua akatangi iora aia i te pu, kua akaruke maira te tangata ravarai i taua oire ra, aere atura ki te ngutuare tikai. Kua oki iorā Ioaba ki Ierusalema ki te ariki ra.

23 Tei rungā Ioaba i te nuku katoa o Iseraela: e ko Benaia te tamaiti a Iehoiada tei runga ïa i te Kereti, e tei runga i te Peleti:

24 E ko Adorama tei runga ïa i te apinga uipa: e ko Iehosaphata te tamaiti a Ahiluda, ko te akakite tuatua ïa:

25 E ko Seva, ko te tata tuatua ïa: e ko Zadoka e ko Abiatara, ko nga taunga ïa:

26 E ko Ira katoa i Iairi, e tangata maata ïa i o Davida ra.