Ieremia
51 TE NA ko mairā Iehova, I na, e akatupu au i tetai matangi mate ia Babulonia, e te aronga katoa e noo i reira ra, ko tei tu e māro mai iaku ra.
2 E tono au i te aronga tairiiri ki Babulonia ra, e na ratou aia e tairiiri, e e riringi atu i tona enua: e rave ra ratou iaia e pini ua ake, i taua rā tumatetenga ra.
3 E akamingi te tangata ana i tana ana ki te tangata ana ra, e kiaia rai e tu ki runga ma te rakei tamaki: auraka e akaperepere i te au tangata ou nona ra; e rave akapou rava kotou i te nuku katoa nana ra.
4 E tei taia ka inga aere ïa i te enua o te Kaledea, tei ko mama ravao i te au arataa nona ra.
5 Kare oki Iseraela i akarukeia, e Iuda katoa, e tona ra Atua, e Iehova Sabaota ra; ki uaʼi to ratou enua i te ara i Tei Tapu i Iseraela nei.
6 E rere ke atu kotou mei roto mai i Babulonia, kia ora te tangata katoa iaia uaorai: kia kore kotou e tipu keia i taua kino nona ra, ko te tuatau oki teia o te akaoko anga na Iehova; nana e tuku atu i tana utunga.
7 E kapu auro Babulonia i te rima o Iehova, i te akakona anga atu i te enua katoa ra; kua inu te pa enua i tana wina ra, e nenevaʼi te pa enua ra.
8 Kare e mamia, kua inga Babulonia e kua pou: ka kakaoa kotou iaia, ka rave i te vairakau i te mamae nona, peneiake aia ko te ora.
9 Ka akaora tika matou ia Babulonia, kare ra aia i ora: ka vaoo atu iaia, taki aere tatou katoa ki tona uaorai enua: kua tae rava oki tana utunga ki runga i te au rangi ra, e kua apaiia ki runga e tae rava atu ei ki te reva ra.
10 Kua tukuia mai e Iehova ta tatou tuatua-tika ra: ka aere mai tatou e akakite i Ziona nei, i te angaanga a to tatou Atua a Iehova.
11 Ka akakina i te au kakao, ka akaki i au paruru tamaki: kua akaarara mai a Iehova i te vaerua o te au ariki ngati Madai ra: ko tana oki i akakoro ia Babulonia nei, e akapou rava ïa; ko te taoko anga ïa oki na Iehova, te taoko anga i tona ra nao.
12 Ei te pae patu i Babulonia akatu ei i te reva, e akaketaketa i te tiaki, e tuku i te vaeau, e akataka ana i te aronga moetapapa: mei ta Iehova oki i akakoro ra, kua pera aia i tana i tuatua ra, ki tei noo i Babulonia.
13 E tei noo i te nia o te au vai e manganui, e tei maata ua atu taau ra apinga, kua tae toou ra openga, e te arite o toou noinoi anga apinga.
14 Kua taputou a Iehova Sabaota ra iaia uaorai, E akaki au ia koe ki te tangata mei te anue, e ka maeva ratou ki runga ia koe.
15 Kua anga aia i te enua i tona ra mana, kua akatinamou aia i te ao nei i tona ra pakari, e kua totoa aia i te rangi i te karape nona.
16 Kia tuku mai aia i tona reo, e aruru anga vai tei runga i te rangi ra, e te akapeke nei aia i te kou mei te openga maira o te enua ra; te anga nei aia i te uira e te ua, e te tuku maira aia i te matangi no roto i tona ra au vairanga ra.
17 Kua riro te tangata katoa nei ei neneva i te kite, kua taakamaia te au taunga katoa u te tiki kotikotiia ra: e pikikaa tona tiki akatoia ra, kare oki e aʼo o roto ia ratou.
18 E mea puapinga kore ratou, e angaanga na te aronga tareva ke; kia tae ki te tuatau e e tutakiiaʼi ratou ra, e pou ïa.
19 Kare te tuanga a Iakoba e tau i te reira; ko te Taunga oki aia no te au mea katoa nei: e ko Iseraela te kopu o tana tuanga: ko Iehova Sabaota tona ingoa.
20 E tapae tamaki koe noku, e au taoonga tamaki, ei ia koe i akapueurikiriki ei au i te pa enua: ei ia koe ra i pou ei iaku te au basileia;
21 Ei ia koe i akapueurikiriki ei au i te oroenua e tei noo ki rungao ra; ei ia koe i akapueurikiriki ei au i te kariota e tona akaoro katoa ra;
22 Ei ia koe oki e akapueurikiriki ei au i te tane e te vaine; ei ia koe ra e akapueurikiriki ei au i tei pakari e tei ou; ei ia koe ra i akapueurikiriki ei au i te tane ou e te paretenia;
23 Ei ia koe e akapueurikiriki ei au i te tiaki e tana anana; ei ia koe ra e akapueurikiriki ei au i tei arote e te puaka i ta-zugoia nana; ei ia koe ra e akapueurikiriki ei au i te au rangatira e te au tutara.
24 E taoko atu au ia Babulonia, e tei noo katoa i Kaledea, i te au kino katoa ta ratou i rave ia Ziona, ki mua i to kotou mata, te tuatua mairā Iehova.
25 I na, kare au e tau ia koe, e tera ra maunga akatarevake e, i tei akapou i te enua katoa ra, te tuatua mairā Iehova: e akatika au i toku rima ki runga ia koe ra, e akataka atu au ia koe na runga i te au mato ra, e akariro au ia koe ei maunga ka:
26 Kare oki tetai toka kapeutara ra e rauka ia ratou ki ko na ia koe ra, e tetai toka no te pange ra; e vai tanea rava ra koe e tuatau ua atu, te tuatua mairā Iehova.
27 E akatu kotou i tetai reva i te enua nei, e akatangi i tetai pu i te pa enua ra, e akateateamamao i te au enua e rave iaia, e akaputuputu i te au basileia e rave iaia, ko Ararata, e ko Mini, e ko Asekenaza; e akataka na i tetai rangatira e rave iaia, ka tuku maina i te au oroenua mei te anue uruuru ra.
28 Ka akateateamamao i te pa enua na e rave iaia, te au ariki ngati Madai, to ratou au rangatira, e to reira au tutara katoa, e te enua katoa no tona ra au.
29 Ka ruketekete oki taua enua nei, e ka aue: ko ta Iehova oki i akakoro ia Babulonia nei, e ope ïa i te tupu, ei akatanea i te enua ra ia Babulonia, auraka ei tangata.
30 Kua kore te aronga ririnui o Babulonia e tamaki, kua noo anake i te punanga: kua kore to ratou ririnui; kua riro ratou mei te vaine ra: kua ka tona au are, kua aatiia tona au tea.
31 E oro tetai taoi leta e akaaravei atu i tetai taoi leta, e tetai karere e akaaravei atu i tetai karere, e akakite ki te ariki o Babulonia, e kua riro takiri tona oire;
32 E kua rokoia uaia te au tomoanga, e kua ka te au kakao i te ai, e kua tumatetenga te au tangata tamaki.
33 Te na ko maira oki a Iehova Sabaota ra, te Atua o Iseraela, E tau te tamaine ra a Babulonia i te ngai pāpā sitona i te tuatau i pāpāiaʼi: kia rakoitio e rokoia mai ei aia e te tuatau akaū ra.
34 Na te ariki o Babulonia na Nebukanesa i kai iaku, e kua eke au iaia; kua riro au iaia mei te āriki kare o roto ra; kua apuku aia iaku mei te taae ra, kua akaki aia i tona kopu i te kai memeitaki naku nei, e kua akaruke aia iaku.
35 Te takinga-kino i raveia kiaku ki taku kopapa nei, ei runga ïa ia Babulonia, ka pera mai tei noo i Ziona ra; e taku toto nei, ei runga ïa i tei noo i Kaledea, ka pera mai Ierusalema ra. E teianei, te na ko mairā Iehova,
36 I na, ka akatika au i taau tuatua, ka taoko au i te riri i iri mai ki runga ia koe ra; e akamarō atu au i te tai nona, e tamarō au i tona au punavai.
37 E riro Babulonia ei au ututua, ei nooanga no te au taae; e ei vavaranga, ei aviri anga, e kare e tangata.
38 E ngunguru katoa ratou mei te liona: e mei te anau liona i te akatutu anga ia ratou uaorai.
39 Kia maana ratou e akatupu ei au i ta ratou au kaingakai, e akakona au ia ratou, kia rekareka ratou, e kia moe i te moe anga mutu kore, e kare e ara akaou, te tuatua mairā Iehova.
40 E arataki au ia ratou mei te punua mamoe ki te tainga ra; mei te mamoe toa e te puaka-nio toa katoa ra.
41 Aue te riro anga a Sesaka e! aue te poitirere o tei akameitakiia e te enua katoa nei e! aue a Babulonia e riro ei aviri anga i te pa enua e!
42 Kua tae mai te tai ki runga ia Babulonia: kua ninaia aia i te rai o tona au ngaru.
43 Kua riro tona au oire i te tanea, e enua papa-marō, e e medebara; e enua e kare rava e tangata e noo i reira, e kare rava ta te tangata nei tamaiti e na reira te aere.
44 E tutaki atu au ia Bela i Babulonia, e akaruaki mai au na tona vaa i tei apukuia e ia: kare oki te au enua e uipa akaou mai kiaia ra: e te patu katoa oki o Babulonia ka ngaoro ïa.
45 Aere kotou ki vao mei rotopu mai iaia, e taku iti-tangata e; kia ora oki te tangata katoa iaia uaorai, i te riri viviki o Iehova ra.
46 E ko te taitaia aea to kotou ngakau, e ko te mataku aea, i te rongo i akarongoia i te enua nei, e tae mai te rongo i teia mataiti, e i muri ake i tera mataiti, e rongo e te takingakino, ki runga i te enua nei, tetai tutara i tetai tutara.
47 E teianei, i na, e tae maira te au rā, e tutaki atu ei au i te au idolo i Babulonia, e rokoia tona au enua katoa i te tumatetenga, e inga aere ua oki tona aronga i taia i roto iaia ra.
48 Ei reira te au rangi e te enua katoa, e to roto katoa ia ratou ra, e peʼe ei i te peʼe ia Babulonia: na te pae i apatokerau mai oki e tae mai te āru iaia, te tuatua mairā Iehova.
49 Mei ia Babulonia i ingaʼi tei mate i Iseraela nei, koia katoa i Babulonia e ingaʼi tei mate no to te enua katoa ra.
50 Ko kotou ko tei ora i te koke ra, ka aere, auraka e tu ua; e akamanako ia Iehova i te atea ke ra, e akamanako katoa ia Ierusalema i roto i to kotou ngakau.
51 Kua raungara matou, no te mea kua akarongo matou i te akakino ra: kua ngaro to matou mata i te akama, no te mea kua tomokia mai e te tangata ke ke te au ngai tapu i te are o Iehova.
52 E teianei, i na, te tuatua mairā Iehova, e tae maira te au rā, e tutaki atu ei au i tina au idolo: e ngunguru ua te aronga i puta ra e pini ua ake tona ra enua.
53 Taea ua te au rangi ia Babulonia, akapakari ua tona punanga e teitei ua ake, naku e tuku mai te au āru iaia; te tuatua mairā Iehova.
54 E reo aue mei Babulonia mai, e te pou maata mei te enua mai o te Kaledea.
55 No te mea kua pou Babulonia ia Iehova, e te akakore nei te aruru maata iaia ra, aruru uaʼi tona au ngaru mei te tai maata ra, e varovaro ua maira to ratou tangi;
56 Kua tae mai oki te āru iaia, ia Babulonia, e tona au tangata ririnui kua riro, kua ope rava ta ratou au ana i te aatiia; e Atua taoko oki a Iehova, e nana e taoko marie.
57 E akakona atu au i tona ui ariki e tona aronga pakari, e tona ra au rangatira, e te au tutara, e tona aronga ririnui: e moe oki ratou i te moe anga mutu kore, kare e ara akaou mai, te tuatua maira te ariki, ko Iehova Sabaota ra tona ingoa.
58 Te na ko mairā Iehova Sabaota, Te patu parauare i Babulonia, e uritumu takiriia ïa, e tona au ngutupa teitei, e ka ïa i te ai: angaanga puapinga kore atura ta te aronga i rave, roiroi anga puapinga kore to te au tangata, no te ai: e ka roiroi ratou.
59 Te tuatua a te peroveta ra a Ieremia, i akaue atu ia Seraia, te tamaiti a Neria, te tamaiti a Maaseia, iaia i aere ma te ariki o Iuda ra ia Zedekia ki Babulonia ra, i te a o te mataiti o tona ra au. E ariki noo marie oki taua Seraia ra.
60 Kua tata iorā Ieremia ki roto i te buka okotai, i te au kino katoa e apaiia mai ki runga ia Babulonia, teia katoa nei au tuatua i tataia nei no Babulonia.
61 Kua karanga aturā Ieremia kia Seraia, Kia tae koe ki Babulonia ra, ka akara oki koe, e ka tatau koe, i teianei au tuatua katoa,
62 Ei reira koe ka tuatuaʼi e, E Iehova, kua tuatua ana koe i teianei ngai, e tipu ke au, e auraka rava tetai e toe i reira, mei te tangata e tae ua atu ki te puaka, kia tanea ra te reira e tuatau ua atu.
63 E ope akera taua tuatua i te tatauia e koe ra, ka ri ei koe i tetai toka ki rungao, ka tiora atu ei ki rotopu i te Eupharati:
64 Ka tuatuaʼi koe e, Ka pera to Babulonia tomo anga, e kare e tu akaou mai, no te kino taku e apai ki runga iaia ra e roiroi oki ratou. Oti ra ua te tuatua a Ieremia.