Iosua

7 KUA rave ra te tamariki a Iseraela i te ara i taua mea i taumaaia ra; kua rave oki a Akana te tamaiti a Karimi, te tamaiti a Zabadi, te tamaiti a Zera, no te kopu o Iuda, i taua mea taumaaia ra; e tupu akera te riri o Iehova i te tamariki a Iseraela.

2 I tono anā Iosua i te tangata ki Ai, mei Ieriko atu, i vaitata Ai ki Beteavena, tei te pae i te itinga o te rā i Betela, e kua tuatua ana aia kia ratou, i na ko ana e, Ka aere ka atoro aere i te enua. Kua tae oki taua au tangata ra, e kua atoro aere i Ai.

3 E kua oki mai ratou kia Iosua ra, e kua tuatua maira kiaia e, Auraka te tangata katoa e aere ki runga, kia rua ake tausani, e kia toru oki, kia aere e rave ia Ai; auraka e akaroiroi i te tangata ravarai i te aere anga ki reira, tokoia ua ake oki ratou.

4 Kua aere iora te tangata ki reira e toru paa tausani no roto i taua aronga ra; ati ua maira ra ratou ki mua i to Ai.

5 E kua ta ua maira to Ai ia ratou, e toru ngauru e ono ara i te tangata i mate: arumaki ua maira oki ratou ia ratou mei te ngutupa maira e tae rava maira ki Sebarima, ki te tainga ia ratou i te eke anga mai ki raro ra; ngaevaeva iora te ngakau o te tangata, riro atura mei te vai ra.

6 E kua aeae iorā Iosua i ona kakau, kua tipapa iora ki raro i te one ki mua i te aruna a Iehova e aiai ua atura, koia e te aronga pakari katoa o Iseraela, e kua tuku oki i te one pueu ki rungao i to ratou au mimiti.

7 Kua tuatua iorā Iosua, Aue, e taku Atu e Iehova e! Eaa koe i arataki mai ei i teia aronga ki teia pae Ioridana, e oronga ia matou ki te rima o te ngati Amori, kia pou matou? Naringa matou i noo ua i tetai pae Ioridana e, oti ra ua i reira e!

8 E te Atu e, e akapeea atu au, tei iki te ngati Iseraela i to ratou tua ki to ratou au enemi?

9 Ka kite oki te ngati Kanaana, e to te enua katoa, i taua tuatua ra, e ka riro i te takako rava ia matou, e ka tangaro i to matou ingoa i te ao nei: e eaa iora oki koe i reira i toou ingoa maata?

10 Kua tuatua mairā Iehova kia Iosua, Ka tu koe ki runga; eaa taau e tipapa uaʼi ki raro i to mata na?

11 Kua rave to Iseraela i te ara, kua tatipake oki ratou i te koreromotu naku, taku i akaue atu kia ratou ra; kua rave oki ratou i tei taumaaia ra; e kua keia oki ratou, e kua uuna oki ratou, e kua tuku i taua mea ra i roto i ta ratou uaorai au apinga.

12 I kore ei i mou te tamariki a Iseraela ki mua i to ratou au enemi, i iki ïa ratou i te tua ki mua i to ratou au enemi, no te mea kua taumaaia ratou; kare rava oki au e piri akaou atu kia kotou, kia kore kotou e ta i tei taumaaia i roto ia kotou na.

13 Ka tu, ka akatapu ana i te au tangata ra, ka karanga tu e, Ka akatapu ana ia kotou uaorai kia tapu apopo; te na ko maira oki te Atua o Iseraela ko Iehova, E mea taumaaia tei roto ia kotou na:

14 E teianei, kia popongi kotou ka aratakiia mai ei i to kotou au kopu katoa; e te kopu ta Iehova e akakite mai, e ta kopu-tangata mai ïa; e te kopu-tangata ta Iehova e akakite mai, e ta ngutuare mai ïa; e te ngutuare ta Iehova e akakite mai, e tataki tai mai ïa.

15 E tei akakiteia mai, tei iaia taua mea taumaaia ra, ka taʼuia ïa ki te ai, koia e tona katoa ra, no te mea kua akaatikau aia i te koreromotu a Iehova ra, e no te mea e kino tana i rave i roto ia Iseraela ra.

16 Kua tu akerā Iosia ki runga i te popongi akirata, kua arataki maira ia Iseraela, to ratou au kopu ra; e te kopu o Iuda tei akakiteia mai:

17 E kua arataki maira aia i te au kopu-tangata o Iuda ra, e te kopu-tangata ra o te ngati Zara tei akakiteia mai: kua arataki maira aia i taua kopu-tangata ngati Zara ra, i tataki taiia mai, e ko Zabadi tei akakiteia mai:

18 Kua arataki maira aia i taua ngutuare nona ra i tataki taiia mai, e ko Akana te tamaiti a Karimi, te tamaiti a Zabadi, te tamaiti a Zera, no te kopu o Iuda, tei akakiteia mai.

19 Kua karanga aturā Iosua kia Akana, Teia taku tuatua kia koe, e taku tamaiti, ko te Atua o Iseraela ko Iehova taau e akameitaki atu, e aaki tikai koe kiaia ra; e akakite mai koe kiaku i teianei i taau i rave, auraka kia uunaia iaku nei.

20 Kua tuatua mairā Akana kia Iosua, na ko maira, Kua ara tika rai au i te Atua o Iseraela ia Iehova, kua rave au i tera, e i tera:

21 Akara iora au i tetai kakau Babulonia meitaki ra, i roto i taua au apinga no te āru ra, e te au sekela ario e rua anere, e tetai manga auro e rima ngauru sekela kia aite, e noinoi akera au i taua apinga ra, e kua rave iora au; e i na, kua uunaia ki raro i te one i rotopu i toku akera puakapa, e te ario tei raro ake.

22 Kua tono aturā Iosua i te au veka, kua oro atura ratou ki taua puakapa ra; e i na, taua au mea ra, tei roto rai i tona puakapa ra te uuna angaia, e te ario oki i raro ake.

23 Kua rave maira ratou i taua au apinga ra ki vao i taua puakapa ra, e kua apai rava maira kia Iosua ra, e te tamariki ravarai a Iseraela ra, kua tuku iora i te atea ki mua i te aroaro o Iehova.

24 Kua opu iorā Iosua, e to Iseraela ravarai, ia Akana, te tamaiti a Zera ra, e te ario, e te kakau, e te manga auro, e tana au tamariki tamaroa, e te au tamaine, e tana au puakatoro, e te au asini, e te au mamoe, e te puakapa nona, e te au apinga ravarai nona ra; e apai atura ki te o o Akora ra.

25 Kua karanga aturā Iosua, Eaa koe i akatumatetenga mai ei ia tatou nei? ka tumatetenga katoa koe ia Iehova akonei. Kua peî iorā Iseraela ravarai iaia ki te toka, e kua taʼu ia ratou ki te ai, ma te peî rai ia ratou ki te toka.

26 Kua akaputuputu iora ratou i te toka e utua maata ki rungao iaia, te vai nei rai e tae rava mai nei ki teianei ra. Akaruke iorā Iehova i taua riri maata nona ra. I tuatuaiaʼi taua ngai ra e, Ko te o o Akora, e tae rava akenei ki teianei rā.