Galatia

1 PAULO e aposetolo, (kare ra i ta te tangata, kare oki i ta te tangata akonoanga, i ta Iesu Mesia ra, e te Atua Metua, ko tei akatu mai iaia mei te mate maira;)

2 E te au taeake ravarai iaku nei, ki te au ekalesia i Galatia na:

3 Ei ia kotou te aroa ua, e te au, no ko mai i te Atua Metua, e to tatou Atu oki ko Iesu Mesia,

4 Ko tei oronga mai iaia uaorai i ta tatou ara, kia ora tatou iaia i teianei ao kino, ko tei tau i ta te Atua, i ta to tatou Metua, i inangaro:

5 Ei iaia te kakā e tuatatau ua atu. Amene.

6 Te va ua nei au ko kotou i taka ke vave ua iaia i tei karanga ia kotou i te aroa ua o te Mesia, e kua āriki i te evangelia ke:

7 Kare ra oki te evangelia ke; te vai na ra te aronga i akapekapeka ia kotou, ko tei anoano i te ruri ke i te evangelia a te Mesia.

8 Ko matou uaorai oki, e tetai angela no te rangi mai, kia ako atu ia kotou i te evangelia ke, mari ra i tei akoia atu e matou kia kotou na, kia taumaaia aia.

9 Mei ta matou oki i tuatua i muatangana, te tuatua akaou atu nei au, Kia ako atu tetai i te evangelia ke ia kotou na, mari ra i tei ārikiia e kotou, kia taumaaia atu aia.

10 Te akataunga atu nei au i te tangata i teianei, e i te Atua aina? e te akono nei au i te mea e marekaʼi te tangata? naringa oki ko te tangata taku i akarekareka, kare ïa au i te tavini o te Mesia i reira.

11 E te akakite atu nei au kia kotou, e te au taeake, i te evangelia i akoia e au, kare ïa i ta te tangata nei.

12 Kare ïa i te mea tukuia mai e te tangata kiaku nei, kare oki au i apiiia, e mea akakiteia maira e Iesu Mesia.

13 I akarongo ana oki kotou i te rongo o taku akono anga i muatangana i te tuatua a te ngati Iuda, e e takinga-kino arite kore toku i te ekalesia o te Atua, e pou akera ïa iaku.

14 Ko au oki tei mua i te tuatua a te ngati Iuda ra i te tangata e manganui i toku uki i toku uaorai enua, e maroiroi maata rava toku i te au peu i tukuia mai e toku ui tupuna.

15 I te tuatua ra i anoano ei te Atua, (ko tei akataka iaku mei te kopu mairai o taku metua vaine, e kapiki iora iaku i tona aroa ua,)

16 I te akakite mai iaku i tana Tamaiti, kia tuatua aere au iaia ki o te etene ra: i reira rai, kare au i uiui ki te tangata:

17 Kare oki au i aere ki runga i Ierusalema i te aronga i riro ana ei aposetolo; aere ke atura ra au ki Arabia, e oki maira oki ki Damaseko.

18 E ope akera nga mataiti e toru ra, aere atura au ki runga ki Ierusalema kia kite au ia Petero, e noo iora au ki ona ra, raungauru ma rima akera po.

19 Kare atura e aposetolo i kitea e au, mari ra te taeake o te Atu ra ko Iakobo.

20 E teianei au tuatua taku e tata atu kia kotou na, i na, ki mua i te aroaro o te Atua, kare ua au i pikikaa.

21 E muri akera, aere atura au ki te pae i Suria e Kilikia;

22 Kare ua te au ekalesia i Iudea ra ko tei akarongo i te Mesia ra i kite i taku mata:

23 Ko te akarongo anake ua ta ratou i te rongo e, Ko te tangata i takinga-kino mai ia tatou i muatangana, te ako nei ïa i te tuatua tana i akakino i muatangana.

24 Akakakā atura ratou i te Atua iaku.