Te Au Akava

4 E MATE iorā Ehuda ra, kua rave akaou iora te tamariki a Iseraela i te kino ki mua i te mata o Iehova:

2 Kua tuku ua aturā Iehova ia ratou ki te rima o te ariki o Kanaana ra ko Iabina, i te ariki i Hazora ra; ko Sisera te rangatira o tona nuku, i Haroseta-goima te noo anga.

3 Kua tautopa atura te tamariki a Iseraela kia Iehova: e iva oki anere to Iabina kariota auri, e tinaimate maata rava tana i te tamariki a Iseraela e rua akera ngauru anga i te mataiti. 4 E tetai peroveta vaine ko Debora te ingoa, e vaine na Lapidota, ko tei akatika ia Iseraela i reira ra.

5 I raro ake i te nu tamara a Debora tona nooanga, i te va i Rama e Betela ra, i te maunga ra ko Epheraima; e e aere oki te tamariki a Iseraela iaia ra e kimi i te tuatua-tau. 6 Kua tono atura aia i te karere e tiki ia Baraka te tamaiti a Abinoama i Kedesanaphatali ra, e kua karanga atura kiaia, Kare ainei kua akaue mai te Atua o Iseraela nei ko Iehova e, E aere koe ka akakatoatoa i te tangata ki te maunga ra ko Tabora, e e arataki katoa i te au tangata okotai ngauru i te tausani no te au tamariki a Naphatali, e no te au tamariki a Zebuluna; 7 E naku e arataki mai i te rangatira o te nuku o Iabina ia Sisera kia koe nei, ki te kauvai ra ko Kisona, ma te au kariota, e te tangata ravarai nona, e naku aia e tuku atu ki toou na rima?

8 Kua tuatua mairā Baraka kiaia, E aere katoa koe ra, e tae ïa au i reira; kia kore ra koe e aere katoa ra, kare ïa au e tae.

9 Kua karanga atura aia, E aere katoa ïa au; kare ra koe e akangateiteiia i taua tere taau e aere nei; ka riro oki a Iehova i te oronga ia Sisera ki te rima o tetai vaine. Kua tu akerā Debora ki runga, e aere katoa atura raua ko Baraka ki Kedesa.

10 E kua akaputuputu mairā Baraka ia Zebuluna e ia Naphatali ki Kedesa; e aere atura te au tangata ki runga okotai ngauru i te tausani i te aru anga iaia, aere katoa atura raua ko Debora ki runga.

11 (No te au tamariki a Hobaba i te taeake o Mose ra taua tangata ra, ko Hebera ngati Keni ra, e kua akataka ke mai aia i te au ngati Keni ra, kua patia i tona puakapa i vaitata i te ale i Zaanaima i vaitata i Kedesa ra.) 12 E akakiteia aturā Sisera e, kua riro te tamaiti a Abinoama ra ko Baraka ki runga i te maunga ra ko Tabora.

13 Kua akaputuputu iorā Sisera i te au kariota katoa nona ra, e iva anere kariota auri, e te tangata ravarai i ona ra, mei Haroseta-goima mai, ki te kauvai ra ko Kisona. 14 Kua karanga aturā Debora kia Baraka, Ka tu, ko te rā oki teia e oronga mai ei a Iehova ia Sisera ki to rima na; kare aina kua riro anā Iehova na mua ia koe na? Kua eke iorā Baraka ki raro mei runga mai i taua maunga ra ko Tabora, e te aronga tangata okotai ngauru i te tausani i te aru anga iaia ra.

15 Eke iorā Sisera, e te au kariota katoa nona, ia Iehova, e te nuku katoa nona i taia ki te mata koke, ki mua i te aroaro o Baraka; eke iorā Sisera ki raro mei runga mai i tona kariota, oro ua atura na raro. 16 Arumaki atura rā Baraka i te au kariota, e te nuku ra, e tae ua atura ki Haroseta-goima; pou rava akera taua nuku o Sisera ra i te mata koke; kare rava akera tetai tangata i toe. 17 Karekā Sisera ra, i oro ua aia na raro, e tae atura ki te puakapa a te vaine a Hebera, ngati Keni ra, a Iaela; e au oki ta te ariki o Hazora ta Iabina, e te ngutuare o Hebera ngati Keni ra.

18 Aere aturā Iaela ki vao e aravei atura ia Sisera, e kua karanga atura kiaia, Ka tapae mai ana, e taku rangatira e, ka tapae mai ana i ko nei kiaku nei; auraka e mataku. E kua tapae atura aia kiaia ra ki roto i te puakapa ra, e kua tapoki aia iaia i te kakau.

19 Kua tuatua maira aia kiaia, O mai ana i tetai manga vai naku e inu, kua kaki vai au. Kua kiriti akera aia i tetai ue u, kua akainu atura iaia, e kua tapoki atura iaia.

20 Kua tuatua maira aia kiaia, Tu ua ana koe i roto i te ngutupa o te puakapa nei; e kia aere mai te tangata e ui mai kia koe, e kia tuatua mai e, E tangata aina to ko na? e karanga atu koe, Kare.

21 Kua rave iora ra taua vaine a Hebera ra a Iaela i tetai titi puakapa ra, e rave atura i te amara i tona rima, aere itoro marie atura kiaia ra, kua patiti atura i taua titi ra ki roto i te rairai nona ra, e mou rava atura ki raro i te one ra, kua tinainai oki aia i te moe, e kua roiroi; mate takiri rava akera aia.

22 E i na, te aruaru mairā Baraka ia Sisera, kua aere aturā Iaela ki vao e aravei atu iaia, e kua karanga atura kiaia, Ka aere mai, e naku e akakite kia koe i te tangata taau e kimi na. E aere katoa maira aia ki roto i te puakapa nona ra, e i na, te vai ua rā Sisera, kua mate rava, e te titi katoa i roto i tona rairai ra. 23 Eke iora te ariki o Kanaana ko Iabina i te Atua i taua rā ra ki mua i te aroaro o te tamariki a Iseraela ra.

24 Manuia atura te rima o te tamariki a Iseraela, e kua autu i te ariki o Kanaana ia Iabina, e pou rava akera taua ariki o Kanaana ra ko Iabina ia ratou.