Te Au Akava

3 TEIA oki taua au iti-tangata i vaooia e Iehova ei timata ia Iseraela ra, ratou ravarai tei kore i kite i te au tamaki katoa i Kanaana ra; 2 Kia kite katoa oki te au uki tamariki a Iseraela i te tamaki, te aronga kare rava i kite ra:

3 Ko nga tutara toko rima o te Philiseti ra, e te ngati Kanaana ravarai, e to Sidona ra, e te ngati Hevi i noo i te maunga ra ko Lebanona, mei te maunga ra ko Baala-heremona e tae ua atu ki te tomoanga ki roto ia Hamata.

4 Ko ratou taua aronga i vaooia ei timata ia Iseraela ra, kia kitea to ratou akarongo anga i te au akauenga a Iehova, tana oki i akaue mai ki to ratou ai metua ia Mose. 5 Noo iora te tamariki a Iseraela i rotopu i te ngati Kanaana, e te ngati Heta, e te ngati Amori, e te Perizi, e te ngati Hevi, e te ngati Iebusi: 6 E kua rave ratou i ta ratou au tamaine ei vaine na ratou; e kua oronga atu i ta ratou au tamaine ei vaine na ta ratou au tamariki tamaroa, e kua araara i to ratou au atua. 7 Kua rave te tamariki a Iseraela i te kino ki mua i te mata o Iehova, e kua akangaropoina i to ratou Atua ia Iehova, e kua araara i te au Baala e te au Asetoreta ra.

8 I otooto ei te riri o Iehova ia Iseraela, e kua tuku atura aia ia ratou i te rima o te ariki o Mesopotamia ra, ko Kusana-risataima: e ao atura te tamariki a Iseraela i o Kusana-risataima e varu akera mataiti.

9 E kia tautopa te tamariki a Iseraela ia Iehova ra, kua akatupu akerā Iehova i te akaora no te tamariki a Iseraela, ko tei akaora ia ratou, koia ko Oteniela te tamaiti a Kenaza ra, e teina no Kaleba. 10 E tei runga iaia te Vaerua o Iehova, e kua akatika aia ia Iseraela, aere atura aia ki te tamaki; e kua tuku mairā Iehova i te ariki o Mesopotamia ia Kusana-risataima ki tona rima; e ketaketa iora tona rima ia Kusana-risataima. 11 E au iora taua enua ra e a akera ngauru anga o te mataiti. Mate iorā Oteniela te tamaiti a Kenaza ra.

12 E kua rave akaou atura te tamariki a Iseraela i te kino ki mua i te mata o Iehova; e kua akamaroiroi aturā Iehova i te ariki o Moabi ia Egalona ei rave ia Iseraela, no te mea kua rave ratou i te kino ki mua i te mata o Iehova ra. 13 E kua akaputuputu maira aia i te tamariki a Amona, e ta Amaleka katoa, kiaia ra, kua aere atura e ta ia Iseraela, e rauka iora ia ratou te oire nu tamara ra. 14 Ao atura te tamariki a Iseraela i te ariki o Moabi ra ia Egalona, e okotai ngauru atura e varu ara i te mataiti ra.

15 Kia tautopa ra te tamariki a Iseraela ia Iehova ra, kua akatupu iorā Iehova i tetai akaora kia ratou, ko Ehuda, te tamaiti a Gera ra, e ngati Beniamina, e tangata rima kaui. E kua akau atura te tamariki a Iseraela i te apinga na te ariki o Moabi na Egalona, i tona rima.

16 I anga ua anā Ehuda i tetai koke mata rua nana, okotai kubiti i te roa: tākaiia iora e ia ki runga i tona ūā katau i raro ake i tona kakau ra.

17 E apai atura aia i te apinga ra ki te ariki o Moabi kia Egalona ra; e tangata matu maata oki a Egalona.

18 E oti akera taua apinga ra i te tukuia e ia ra, kua tuku atura aia i te au tangata i apai mai i taua apinga ra kia aere ana.

19 Kareka aia uaorai, i oki akera ïa i te au idolo akatikitikiia i vaoo i vaitata i Gilagala ra, e kua tuatua akera, E tuatua muna taku kia koe, e taku ariki e. Kua tuatua maira te ariki, Auraka ana e tuatua. Aere anake atura te aronga ravarai i vaitata iaia ra ki vao. 20 Kua aere aturā Ehuda kiaia; te noo ua ra aia i roto i tetai pia puangiangi nona uaorai, koia anake ra. Kua karanga aturā Ehuda, E tuatua taku kia koe no ko i te Atua ra. Kua tu maira aia ki runga i tona nooanga. 21 Kua nanao iorā Ehuda i tona rima kaui, e kua rave i te koke i tona ūā katau ra, kua ko atura ki roto i tona kopu:

22 Aere katoa atura te koke ma te pu katoa ki roto, kapi akera te tongaua ki runga i taua koke ra, kare akera i rauka taua koke ra kia unui ki vao i tona kopu ra; e kua mama oki i muri mai. 23 E kua aere aturā Ehuda ki vao i te tomoanga, topiri atura i te au pa no taua pia ra i muri iaia, taviri tamou atura.

24 E riro atura aia, kua aere maira te au tavini nona ra, kua akara iora, e i na, kua taviri tamouia te au pa o taua pia ra; kua tuatua akera ratou, Kua tapoki aia i ona vaevae i te pia puangiangi ra.

25 Kua tapapa iora ratou e taitaia ua atura i te roa; e i na, kare aia i kiriti i te au pa o taua pia ra; kua rave iora ratou i te taviri, kua kiriti akera i te au pa; e i na! te takoto ua ra to ratou pu i raro i te one, kua mate takiri rava. 26 Kua ora atura oki a Ehuda i taua roa ua anga no ratou ra, kua topa mai te au idolo akatikitikiia ra i muri, e kua tae rava atura ki Seira.

27 E tei te tae anga atu aia ra, kua akatangi iora aia i te pu i te maunga ra ko Epheraima, e kua eke maira te tamariki a Iseraela, ma ia katoa ki mua, mei runga mai i taua maunga ra.

28 Kua karanga atura aia kia ratou, Ka aru mai iaku: kua tuku mai oki a Iehova i to kotou au enemi ra i te ngati Moabi ki to kotou rima. Kua aru atura ratou iaia, e rauka iora te ara i Ioridana, e aere tika atu ei ki Moabi ra, e kare e tangata i tae na reira ia ratou. 29 Kua tae paa ki te ngauru i te tausani to Moabi i mate ia ratou i reira, e tangata mamaata anake e te toa; kare rava tetai i ora.

30 Eke iora Moabi i te rima o Iseraela i taua rā ra. E au iora taua enua ra e varu akera ngauru anga o te mataiti.

31 E muri ake ia Ehuda, ko Samagara te tamaiti a Anata ïa, mate iora te Philiseti iaia e ono ïa anere i te tangata i te rakau ko puakatoro; kua ora akera Iseraela iaia i reira.