Isaia

42 KA AKARA ana i toku tavini, taku e tauturu nei; tei ikiia e au ra, kua rekareka rava toku ngakau iaia; kua tukuia e au toku Vaerua ki runga iaia: nana e tuku atu i te tuatua-tau ki te au etene.

2 Kare oki aia e kapiki, e kare e akateitei, kare oki e akakite ua i tona reo kia rongoia i te arataa.

3 Te kakao paruparu ra, kare aia e aati; e te lamepa matemate ra, kare aia e tinai; e kia akatupu ravaia e ia te tuatua-tau nana.

4 Kare aia e apikepike, e kare rai e paruparu, e kia akatinamouia e ia te tuatau-tau i te enua nei: e tatari mai oki te pa enua taatai i tana ture.

5 Te na ko maira te Atua ra, ko Iehova, ko tei anga i te au rangi ra, e ko tei oora i te reira; ko tei totoa oki i te enua, e tei tupu ki rungao ra; ko tei oronga mai i te aʼo no te au tangata i rungao ra, e te vaerua no te aronga e aaere i reira:

6 Ko au ko Iehova, tei kapiki atu ia koe i te tuatua-tika: e naku e tāpu i to rima; e tiaki oki au ia koe, e e oronga ia koe ei koreromotu na te au tangata, ei turama no te etene.

7 Ei akapuera i te mata o te matapo: kia tukua mai te tuikaa i tapekaia ra; te aronga i noo i te poiri mei roto mai i te are tapeka anga ra.

8 Ko au ko Iehova; ko toku ïa ingoa; kare au e oronga i toku ra kakā no tetai ke, e te akameitaki iaku ra no te au idolo akatikitikiia ra.

9 Tei muatangana iora au tuatua, i na, kua tupu ïa te reira; e te akakite nei au i te tuatua ou: kare i tupu, te akakite atea nei au ia kotou i te reira.

10 E imene i te imene ou kia Iehova; te akameitaki iaia mei te openga mai o te enua ra; ko kotou ko tei aere ki te moana, e to reira ki katoa ra; te au enua taatai ra, e te noo i reira.

11 Kia kapiki nui te medebara e to reira au oire; te au vila i nooia e Kedara ra: ka imene mai oki te aronga i noo i Sela ra: ka maeva oki ratou i runga i te au take maunga ra.

12 Ka oronga ratou i te kakā kia Iehova, e ka akakite ratou i tona meitaki ki te au enua taatai ra.

13 E aere rai a Iehova mei te tangata ririnui ra; e akatupu aia i tona riri mei te tangata tamaki ra; e kapiki nui aia; e e aoa oki; e e akakite aia i tona ririnui i tona ra au enemi.

14 E muteki anga roa akenei toku; kua akatupua akenei au; kua tāpu au iaku uaorai: e kapiki nui au mei te vaine kia anau ra; e utiuti naunau au i toku aʼo, e e akaea rai oki.

15 E akatanea au i te au maunga e te au tuaivi, e te au ngangaere katoa ki rungao, e mae ïa iaku; e akariro au i te au kauvai ei enua papa-marō, e e tamarō oki au i te au punavai.

16 E arataki au i te matapo na te ara kare i kitea e ratou ra; na te au ara kare i kitea e ratou ra, e akatae rai au ia ratou na reira: e akariro au i te poiri ei mārama ki mua ia ratou, e te au ara mingimingi ra ei tikaoru ua: e pera au ia ratou, e kare au e akaruke ia ratou.

17 Kua oki ratou ki muri, kua mate i te akama, ko tei irinaki ki te au idolo akatikitikiia ra; ko tei karanga atu ki te au idolo akatoia ra, Ko kotou to matou atua.

18 Ka akarongo mai na, ko kotou, e te aronga taringa turi e; e akara matariki mai, ko kotou, e te aronga matapo, kia kite kotou.

19 Koai atu tei matapo, mari ra ko toku tavini nei? e tei turi, mari ra ko tei tonokia atu e au, i taku karere nei? koai atu tei matapo, mari ra ko tei apa kore nei? e tei matapo, mari ra ko te tavini o Iehova nei?

20 Te kite ra oki koe i te au mea e manganui, kare ra i utoa; te puata ua ra nga taringa, kare ra i akarongo.

21 Te mataora maira rā Iehova no tana uaorai tuatua-tika; nana e akamaata e nana e akateitei i te ture.

22 Ko teianei ra aronga, kua pou ïa, e kua āruia; kua mou anake ratou ki roto i te rua, e kua uunaia ki roto i te are tapeka anga; kua riro ratou mei te apinga noni e kare e akara; mei te mea āruia ra, e kare tetai e karanga e, E akaoki.

23 Koai to kotou e akarongo i teianei? ko te ka akono, e e akarongo a muri atu?

24 Naai i oronga ia Iakoba ei apinga noni, e ia Iseraela no te aronga āru? kare ainei a Iehova; i ara ai tatou ra? nona te au arataa kare i tika ia ratou i te aere, e nana te ture i akono koreia e ratou ra?

25 No reira aia i riringi mai ei i te veravera o tona riri ki runga iaia; e te ririnui o te tamaki: akapiniia akera aia i te ai mura, kare ra aia i akono i te reira; ka akera aia, kare ra aia i akamanako.