Nahuma

3 AUE to te oire toto e! kua ki takiri ïa i te pikikaa e te āru; kare te apinga noni i apai keia.

2 Te kokina anga o te taura pāpā, e te aruru o te kutukukutu anga o te au porotata ra, te oro ua anga o te au oroenua, e te rererere anga o te au kariota;

3 Te kake anga o te au tangata oroenua ra, te kakā anga o te au koke ra, e te kanapanapa anga o te au korare ra: te manganui o tei taia ra, e te auau anga o te tangata mate ra: kare e ope te au kopapa mate, kua inga aere ratou na runga i te au kopapa mate:

4 No te akaturi anga e manganui a te akaturi ra, a tei tu meitaki ra, te pu vaine o te aronga purepure, ko tei oko aere i te pa enua i tana akaturi anga, e te au kiato i tana purepure anga.

5 I na, kare au e tau ia koe, te tuatua mairā Iehova Sabaota ra; e tāki au i to pareu i runga i to mata, e e akakite au ki te pa enua i toou vai taaka ua anga, e te au basileia i toou akama.

6 E peî atu au ia koe ki te au mea viivii, kia viivii atu koe; e akariro atu au ia koe ei matakitaki anga.

7 E riro oki te aronga ravarai e akara ia koe i te oro ke ia koe, e ka tuatua e, Kua pou Nineve: naai aia e tangi atu? ka kimi tika au kiea i te akapumaana ia koe?

8 E meitaki maata ainei toou i to No-amona, tei roto oki i te au kauvai tona vairanga, kua akapiniia aia e te vai; te tai tona paruru, te tai oki tona patu?

9 Na to Kusa, e to Aiphiti, i akamaroiroi iaia ki te au nuku kare e pou kia tatau, ko Phuta e ko Lubi, ko toou ïa tauturu.

10 I apai keia ra aia, riro atura ei tuikaa, i pāpā ungaungātitiia tana au tamariki i te openga mai o te au arataa katoa ra, i tua keleroia e ratou tona aronga taoiau, e i tapekaia tona au tangata nunui ki te pirianganaoa.

11 E kona katoa oki koe; ka pipini rai koe; naau katoa e kimi i te akapuanga i te enemi.

12 Kua aite to au punanga ketaketa ravarai ki te au suke ma te suke para muatangana ra; kia ruruia ra, kua topa mai ïa ki roto i te vaa o te kai ra.

13 I na, kua tu a vaine ua toou ra au tangata i roto ia koe ra, ka kiriti amama roaia te au ngutupa o te enua ki to au enemi; e ka to au tea ki te ai.

14 Ka utui ana koe i te vai no te tamaki anga, ka akaketaketa ana i taau au punanga: ka aere ki roto i te vari, ka takatakai i te karakaraea; ka akapakari atu i te umu taʼu karakaraea.

15 Ei reira koe e pou ei i te ai; ka tipu keia koe e te koke; e keingaia koe e te reira mei to te ee ra; akamaata ua atu ia koe mei te tāpaki e maata ra.

16 Kua akamaata koe i toou au tangata oko e iti te au etu o te rangi ra: te matoa aere ra te au ee, e rere ke atura.

17 Kua aite toou ui ariki ki te au tāpaki e maata ra, e toou au rangatira mei te au tāpaki nunui ra, ko tei noo a nuku aere na roto i te koro i te rā anu ra: kia iti maira te rā ra, rere ke atura, e kare atura e kitea to ratou ngai e noo ra.

18 Kua moe to aronga tiaki, e te ariki o Asura e: kua akāvai ua to aronga nunui ki raro; kua pueurikiriki toou au tangata ki runga i to au maunga, e kare ua e tangata i te akaputuputu mai.

19 Kare e ora anga i te paruparu noou ra; e puta kino toou; te aronga katoa i kite i te rongo ia koe ra, e pokarakara ïa te rima ki runga ia koe ra, koai oki tei kore i taea e taua kino tukutuku kore noou ra?