Salamo

61 E AKARONGO mai, e te Atua, i taku i pati nei, e akono mai oki i taku nei pure.

2 Te kapiki nei au ia koe i te openga o te enua nei, i te poiri pu ua anga o toku nei ngakau; e arataki koe iaku ki te mato taea koreia e au i te teitei.

3 Kua mātauia oki koe ei akapuanga noku; ei punanga etaeta i te enemi.

4 Ka noo au i to puakapa e tuatau ua atu; ka ora au i raro ake i te tapoki o nga peau oou ra. Sela.

5 Kua akarongo mai oki koe, e te Atua, i taku i tia ra, kua oronga mai koe kiaku i te tuanga a te aronga i mataku i toou ingoa.

6 Ka akamaata koe i te au rā o te ariki ra; tona au mataiti ki tera uki ki tera uki.

7 Ka noo aia ki mua i te aroaro o te Atua e tuatau ua atu: e akonokono koe i te aroa e te tuatua-mou, ei akaora iaia.

8 E pera ua rai au i te imene akapaapaa i toou ra ingoa e tuatau ua atu; e rave rai au i taku i tia ra i tera rā i tera rā.