1 Paraleipomeno

29 KUA karanga atu rai te ariki ra ko Davida ki taua auipaanga katoa ra, Ko taku tamaiti nei ko Solomona, koia anake ta te Atua i iki ra, te vai ou ua nei aia e te pakari kore, te maata nei oki te angaanga: kare oki taua are nei no te tangata, no te Atura a no Iehova:

2 Kua kopî oki au i te apinga ma toku maroiroi katoa no te are o taku Atua, e auro no te au mea auro ra, e te ario no te au mea ario ra, e te veo no te au mea veo, e auri no te au mea auri, e rakau oki no te au mea rakau ra; e te toka sema, e te au toka ei taroto, e au toka kakâ e te tumatatini ra, e te au toka memeitaki katoa ra, e te toka sisa e manganui.

3 E no toku nei oki anoano i te are o toku Atua, te vai nei toku ra apinga noku uaorai, i te auro e te ario, ko taku ïa e oronga nei no te are o taku Atua, te taka ra tei kopîia e au no taua are tapu nei,

4 E toru tausani taleni auro, e auro Ophira, e itu oki tausani i te taleni ario meitaki ra, ei tapoki i taua are ra i roto:

5 Ko te auro ra no te au mea auro ra ïa, e te ario no te au mea ario ïa, e no te au angaanga katoa e raveia e te rima o te aronga taunga ra. E teianei, koai te tangata e tika iaia kia aere ma te rima i ki kia Iehova ra i teianei râ?

6 Te ui mataiapo tutara ra, e te aronga mamaata i runga i te au kopu o Iseraela ra, e te au rangatira no te au tausani, e no te au anere, e te au rangatira i te angaanga a te ariki ra, kua oronga ua mai ïa;

7 E kua apai maira i te auro no te angaanga i te are o te Atua, e rima tausani i te taleni, okotai ngauru i te tausani i te dareki, e te ario ra okotai ïa ngauru i te tausani i te taleni, e te veo ra okotai ïa ngauru ma varu i te tausani i te taleni, okotai anere i te tausani i te taleni auri.

8 E te aronga tei ia ratou te toka memeitaki ra, kua oronga ïa no te uipaanga apinga no te are o Iehova, i te rima o Iehiela te Geresona.

9 Mareka rava akera te tangata i te mea kua oronga ua ratou; e ma te ngakau meitaki i te oronga ua anga kia Iehova: mareka katoa akera te ariki ra ko Davida e rekareka maata.

10 Kua akameitaki aturā Davida ia Iehova i reira ki mua i te aroaro o taua uipaanga katoa ra:e kua karanga aturā Davida, Kia akameitakiia koe, e tuatau e tuatau ua atu, e te Atua o to matou metua o Iseraela, e Iehova.

11 Tei ia koe, e Iehova, te maata, e te mana, e te kakā, e te autu, e te tapunui: to runga i te rangi ra, e to runga i te enua, noou anake ïa; tei ia koe te au, e Iehova, e ko koe tei teitei ei upoko i te au mea katoa nei.

12 No ko na mai ia koe na te apinga e te akangateitei, e ko koe tei tutara ki rungao i te au mea katoa; e tei to rima te ririnui e te maroiroi; e tei to rima i te akamaata mai, e te oronga mai i te maroiroi ki te tangata katoa nei.

13 E teianei, e to matou Atua, te akameitaki nei matou ia koe, e te akapaapaa nei i toou ingoa kakâ.

14 Koai ra au nei, e eaa toku nei au tangata, e tikaʼi ia matou kia apai ua atu mei teianei te tu? No ko na mai ia koe na te au mea katoa nei, e no roto i taau ta matou i apai atu kia koe na.

15 I mua ia koe ra e aronga tangata ke oki matou, e te tuitarere, mei to matou ai metua katoa ra: to matou au rā i te ao nei e tau ïa ki te ata, kare rava e mouranga.

16 E to matou Atua, e Iehova e, ko teia katoa nei au apinga, i uipaia e matou ei akatu i te are noou, no to ingoa tapu ra, no ko na mai i to rima na, ko koe uaorai te Pu.

17 Kua kite oki au, e taku Atua, e unuunumou rai koe i te ngakau, e e mea mataora naau te tiratiratu. Kareka au nei, kua apai ua au i taua au mea katoa nei ma te tiratiratu o toku nei ngakau: e teianei, kua kite au ma te rekareka i to au tangata e noo nei, i te oronga ua anga i ta ratou kia koe ra.

18 E te Atua no to matou ai metua ra, no Aberahama, no Isaaka, e no Iseraela, e Iehova, e tamou koe i teianei ki roto i te akakoroanga o te au manako ngakau o to au tangata, e tuatau ua atu, e akonokono i to ratou ngakau kia koe:

19 E oronga mai oki koe ki taku tamaiti nei kia Solomona i te ngakau tika tikai, kia akono aia i taau au akauenga, taau au tuatua-akakite, e taau au akonoanga; e kia rave aia e kia akatu i te are i te apinga i kopîia e au.

20 Kua karanga aturâ Davida ki taua uipaang katoa ra, e teianei, e akameitaki i to kotou Atua ra ia Iehova. Kua akameitaki atura taua uipaanga katoa ra i te Atua o to ratou ai metua ra ia Iehova, e kua tupou to ratou mimiti ki raro e kua akamori ia Iehova, e kua tupou akera ki te ariki.

21 E ao akera i taua rā ra, kua ta iora ratou i te au atinga na Iehova, e kua apai i te au atinga karakaratio na Iehova, okotai tausani i te puakatoro, okotai tausani i te mamoe toa, okotai oki tausani i te punua mamoe, e to ratou au atinga inu, e te au atinga katoa e manganui na Iseraela ravarai:

22 Kua kai iora ratou e kua inu ki mua i te aroaro o Iehova i taua rā ra ma te rekareka maata. Kua akaariki akaou akera ratou i te tamaiti a Davida ia Solomona, ko te tu rua ïa, e kua akatainu ratou iaia i ta Iehova i anoano ei ariki maata, e ko Zadoka ei taunga ïa.

23 Kua noo iorā Solomona ki runga i te terono a Iehova, ei ariki ei tupau i tona metua ia Davida, e kua manuia tana; e kua akarongo maira Iseraela katoatoa iaia.

24 E te aronga mamaata katoa, e te aronga mana, e te au tamariki ravarai a te ariki ra a Davida, tei tatomo marie katoa ki te ariki ra kia Solomona.

25 Kua akamaata rava mairā Iehova ia Solomona i mua i te aroaro o Iseraela katoa, e kua oronga maira i te kakā ariki kiaia, kare ïa i orongaia mai ki tetai ariki no Iseraela i mua iaia.

26 Pera atura te tamaiti a Iese rā Davida i te ariki anga i runga ia Iseraela katoa.

27 E te au rā i ariki ei aia ki runga i Iseraela, e rua takau ïa mataiti; e itu ona mataiti i te ariki anga i Heberona, e toru ngauru ma toru i te ariki anga i Ierusalema.

28 Mate ruaine ua atura aia, kua ope tona au rā, ma te apinga maata, e ma te akangateitei: tupauia akera aia i te au e te tamaiti nana ra e Solomona.

29 E te au angaanga a te ariki ra a Davida, ko mua e ko muri, i na, kua tataia ïa i roto i te tuatua a te akara ra a Samuela, i roto oki i te tuatua a Natana peroveta, e i roto i te tuatua a te akara ra a Gada;

30 Ma te tuatua katoa o tona ra au, e tona ra ririnui, e te au tuatau i te na runga anga iaia, e te na runga anga ia Iseraela, e te na runga anga i te au basileia o te pa enua ravarai.